અત્યાર સુધી આ અમેરીકન રાષ્ટ્રપતિ ભારતની મુલાકાતે આવ્યા છે, જાણો ક્યારે આવશે બાઈડેન
અમેરિકી રાષ્ટ્રપતિ જો બાઈડેન G20 સમિટમાં ભાગ લેવા માટે ગુરુવારે ભારત આવશે અને આ દરમિયાન તેઓ વડાપ્રધાન નરેન્દ્ર મોદી સાથે દ્વિપક્ષીય બેઠક કરશે. બાઈડેન શનિવાર અને રવિવારે G20 સમિટના સત્તાવાર સત્રમાં ભાગ લેશે.
અમેરિકી રાષ્ટ્રપતિ જો બાઈડેન G20 સમિટમાં ભાગ લેવા માટે ગુરુવારે ભારત આવશે અને આ દરમિયાન તેઓ વડાપ્રધાન નરેન્દ્ર મોદી સાથે દ્વિપક્ષીય બેઠક કરશે. અમેરિકાના રાષ્ટ્રપતિના સત્તાવાર નિવાસસ્થાન અને કાર્યાલય વ્હાઇટ હાઉસે આ જાણકારી આપી. આ જાહેરાતના એક દિવસ પહેલા સોમવારે અમેરિકાની પ્રથમ મહિલા કોરોના વાયરસથી સંક્રમિત મળી આવ્યા હતા. આ પછી બાઈડેનની પણ તપાસ કરવામાં આવી હતી. તપાસ રિપોર્ટમાં પુષ્ટિ થઈ છે કે તેને ચેપ લાગ્યો નથી.
અમેરિકાના રાષ્ટ્રીય સુરક્ષા સલાહકાર જેક સુલિવને વ્હાઇટ હાઉસમાં એક પ્રેસ કોન્ફરન્સમાં જણાવ્યું કે, અમેરિકી રાષ્ટ્રપતિ G20 સમિટમાં ભાગ લેવા માટે ગુરુવારે ભારત આવશે. તેમણે કહ્યું કે બાઈડેન વડાપ્રધાન મોદી સાથે દ્વિપક્ષીય બેઠક કરશે. તેમણે કહ્યું કે, બાઈડેન શનિવાર અને રવિવારે G20 સમિટના સત્તાવાર સત્રમાં ભાગ લેશે.
ભારતની આઝાદી પછીના પ્રથમ 50 વર્ષમાં અમેરિકાના માત્ર ત્રણ રાષ્ટ્રપતિ ભારતની મુલાકાતે આવ્યા હતા. આ સાથે જ બાઈડેન છેલ્લા અઢી દાયકામાં ભારતની મુલાકાત લેનારા 5મા રાષ્ટ્રપતિ હશે.
1.ડ્વાઇટ ડી. આઇઝનહોવર
ડ્વાઇટ ડી. આઇઝનહોવર ભારતની મુલાકાત લેનારા પ્રથમ યુએસ પ્રમુખ હતા. તેઓ 1959માં ભારત આવ્યા હતા. તેમની મુલાકાત દરમિયાન તેઓ રાષ્ટ્રપતિ રાજેન્દ્ર પ્રસાદ અને વડાપ્રધાન નેહરુને મળ્યા અને ભારતની સંસદને સંબોધિત કરી હતી. આ મુલાકાત એવા સમયે થઈ હતી જ્યારે ભારત દુષ્કાળનો સામનો કરી રહ્યું હતું અને ખાદ્યપદાર્થોની કિંમતો વધી રહી હતી. આ સિવાય અહીં ઔદ્યોગિક ઉત્પાદન ઓછું હતું અને વિદેશી હૂંડિયામણનો પુરવઠો ઘણો ઓછો હતો.
2.રિચાર્ડ નિક્સન
રિચર્ડ નિક્સન ભારતની મુલાકાત લેનારા બીજા અમેરિકી રાષ્ટ્રપતિ હતા. તેઓ 1969માં ભારત આવ્યા હતા. આ દરમિયાન તેઓ કાર્યકારી રાષ્ટ્રપતિ હિદાયતુલ્લાહ અને વડાપ્રધાન ઈન્દિરા ગાંધીને મળ્યા હતા. તેઓ માત્ર 23 કલાક ભારતમાં હતા. નિક્સન પાકિસ્તાન તરફી હતા અને ભારતની બિનજોડાણની નીતિ વિરુદ્ધ હતા. અમેરિકાનું માનવું હતું કે તે સમયે ભારત-પાકિસ્તાનના સંબંધો બગડી રહ્યા હતા અને નિક્સનની મુલાકાતે આ વાતને દૂર કરવાનો પ્રયાસ કર્યો હતો.
3.જીમી કાર્ટર
જીમી કાર્ટર ભારતની મુલાકાત લેનારા ત્રીજા અમેરિકી રાષ્ટ્રપતિ હતા. તેમણે 1978માં ભારતની મુલાકાત લીધી હતી. તેમની મુલાકાત દરમિયાન તેઓ રાષ્ટ્રપતિ નીલમ સંજીવા રેડ્ડી અને વડાપ્રધાન મોરારજી દેસાઈને મળ્યા હતા. આ સિવાય તેમણે સંસદને પણ સંબોધિત કરી હતી. તેમને ગુડગાંવના એક ગામ દૌલતપુર નસીરાબાદની મુલાકાત માટે સૌથી વધુ યાદ કરવામાં આવે છે જેનું નામ બદલીને કાર્ટરપુરી રાખવામાં આવ્યું હતું.
4. બિલ ક્લિન્ટન
બિલ ક્લિન્ટન 2000માં ભારત આવ્યા હતા. તેઓ રાષ્ટ્રપતિ કે આર નારાયણનને મળ્યા હતા. ઊર્જા અને પર્યાવરણ પર હસ્તાક્ષર કરાયેલા સંયુક્ત નિવેદન અંગે સંસદને સંબોધન કર્યું. ક્લિન્ટનની મુલાકાત અમેરિકન રાષ્ટ્રપતિની સૌથી લાંબી મુલાકાત હતી. આ મુલાકાતને ભારત-અમેરિકા સંબંધોમાં ટર્નિંગ પોઈન્ટ તરીકે જોવામાં આવે છે.
5. જ્યોર્જ ડબલ્યુ બુશ
જ્યોર્જ ડબલ્યુ બુશે 2006માં ભારતની મુલાકાત લીધી હતી. આ દરમિયાન અમેરિકા-ભારત નાગરીક પરમાણુ કરાર પર હસ્તાક્ષર થયા હતા. બુશની મુલાકાતે ભારતના ‘nuclear apartheid’ના અંતની ઘોષણા કરી અને બંને દેશોએ ભારત-યુએસ પરમાણુ કરાર પર હસ્તાક્ષર કર્યા.
6.બરાક ઓબામા
બરાક ઓબામા 2010 અને 2015માં ભારતની મુલાકાતે આવ્યા હતા. તેઓ પોતાના કાર્યકાળ દરમિયાન બે વખત ભારતની મુલાકાત લેનારા પ્રથમ અમેરિકી રાષ્ટ્રપતિ હતા. તેમની પ્રથમ મુલાકાત દરમિયાન ઓબામા રાષ્ટ્રપતિ પ્રતિભા પાટિલ અને પીએમ મનમોહનને મળ્યા હતા. આ દરમિયાન તેમણે સંસદને સંબોધિત કરી હતી. આટલું જ નહીં, યુએસ પ્રમુખે મુંબઈમાં યુએસ-ઈન્ડિયા બિઝનેસ કાઉન્સિલ અને એન્ટરપ્રેન્યોરશિપ સમિટમાં ભાગ લીધો હતો.
ઓબામા 2015માં બીજી વખત ભારતની મુલાકાતે આવ્યા હતા. પ્રજાસત્તાક દિવસની ઉજવણીમાં મુખ્ય અતિથિ બનેલા તેઓ પ્રથમ અમેરિકી રાષ્ટ્રપતિ હતા. આ દરમિયાન તેમણે પરમાણુ કરાર પર સફળતાની જાહેરાત કરી હતી. આ કરાર પર 2008માં સંમતિ થઈ હતી, પરંતુ એક યા બીજા કારણોસર અમેરિકન કંપનીઓએ ભારતમાં જવાબદારીઓને કારણે તેને 6 વર્ષ માટે મુલતવી રાખ્યું હતું.
7. ડોનાલ્ડ ટ્રમ્પ
અમેરિકી રાષ્ટ્રપતિ ડોનાલ્ડ ટ્રમ્પે 2020માં ભારતની મુલાકાત લીધી હતી. ભારતની તેમની પ્રથમ યાત્રા પર ડોનાલ્ડ ટ્રમ્પે તેમની પત્ની મેલાનિયા, પુત્રી ઈવાન્કા, જમાઈ જેરેડ કુશનર અને કેટલાક ઉચ્ચ અધિકારીઓ સાથે અમદાવાદ, આગ્રા અને નવી દિલ્હીની મુલાકાત લીધી હતી. તેણે 24 ફેબ્રુઆરીએ અમદાવાદમાં ત્રણ કલાક વિતાવ્યા હતા. આ દરમિયાન તેણે 22 કિલોમીટર લાંબા રોડ શોમાં ભાગ લીધો હતો. ત્યારબાદ તેમણે સાબરમતી આશ્રમ ખાતે મહાત્મા ગાંધીને શ્રદ્ધાંજલી આપી હતી અને વડા પ્રધાન નરેન્દ્ર મોદી સાથે ‘નમસ્તે ટ્રમ્પ’ કાર્યક્રમને સંબોધિત કર્યો હતો. ટ્રમ્પ ભારતની મુલાકાત લેનારા છેલ્લા રાષ્ટ્રપતિ હતા.
