અમેરિકામાં રહેતા ભારતીય વિદ્યાર્થીઓ અને કામદારો માટે મહત્વપૂર્ણ અપડેટ, USCISના નવા નિયમો બાદ વિઝા અને ગ્રીન કાર્ડ પ્રક્રિયામાં મોટો ફેરફાર

અમેરિકામાં અભ્યાસ કરતા અથવા કામ કરતા ભારતીયો માટે મહત્વપૂર્ણ સમાચાર સામે આવ્યા છે. અમેરિકાની યુએસ સિટિઝનશિપ એન્ડ ઇમિગ્રેશન સર્વિસિસ (USCIS) એ વિઝા, ગ્રીન કાર્ડ અને અન્ય ઇમિગ્રેશન સંબંધિત અરજીઓ માટે નવા નિયમો અમલમાં મૂક્યા છે. નવા નિયમો મુજબ હવે અરજદારોને અરજી કરતી વખતે તમામ જરૂરી દસ્તાવેજો એકસાથે જ સબમિટ કરવા પડશે. જો અરજી અધૂરી હશે અથવા જરૂરી પુરાવા જોડવામાં નહીં આવે તો USCIS અધિકારીઓ સીધી અરજી નામંજૂર પણ કરી શકશે.

શું બદલાયું?

USCISએ સ્પષ્ટ કર્યું છે કે ઇમિગ્રેશન લાભ મેળવવા માટે અરજદાર પોતાની લાયકાત સાબિત કરવા માટે સંપૂર્ણપણે જવાબદાર રહેશે. એટલે કે વિઝા, ગ્રીન કાર્ડ અથવા અન્ય કોઈ ઇમિગ્રેશન લાભ માટે અરજી કરતી વખતે તમામ જરૂરી દસ્તાવેજો અને પુરાવા શરૂઆતથી જ સબમિટ કરવા જરૂરી રહેશે.

જો અધિકારીઓને લાગશે કે અરજીમાં જરૂરી માહિતી અથવા દસ્તાવેજોની મોટી ખામી છે, તો તેઓ Request for Evidence (RFE) અથવા Notice of Intent to Deny (NOID) મોકલ્યા વગર પણ અરજીને સીધી નામંજૂર કરી શકે છે.

જૂના નિયમોમાં શું જોગવાઈ હતી?

અગાઉ જો કોઈ અરજદારની અરજીમાં દસ્તાવેજો અધૂરા હોય અથવા વધારાના પુરાવાની જરૂર હોય, તો USCIS સામાન્ય રીતે RFE (રિક્વેસ્ટ ફોર એવિડન્સ) અથવા NOID (નોટિસ ઓફ ઇન્ટેન્ટ ટુ ડિનાય) જારી કરતું હતું.

આવા સંજોગોમાં અરજદારોને વધારાના દસ્તાવેજો સબમિટ કરવા માટે લગભગ 12 અઠવાડિયાનો સમય આપવામાં આવતો હતો. જો RFE અથવા NOID અમેરિકાની બહાર મોકલવામાં આવ્યું હોય, તો જવાબ આપવા માટે વધારાના 14 દિવસ પણ આપવામાં આવતા હતા.

આ વ્યવસ્થાના કારણે અરજદારોને પોતાની અરજીમાં રહેલી ખામીઓ સુધારવાની તક મળતી હતી.

નવા નિયમો હેઠળ શું થશે?

હવે USCISનું વલણ વધુ કડક બન્યું છે. નવા નિયમો અનુસાર અરજદારે અરજી દાખલ કરતી વખતે જ પોતાની પાત્રતા દર્શાવતા તમામ જરૂરી દસ્તાવેજો રજૂ કરવા પડશે.

જો અરજીમાં જરૂરી પુરાવા અથવા દસ્તાવેજો ન હોય, તો અધિકારીઓ કોઈ વધારાની તક આપ્યા વગર અરજી સીધી નામંજૂર કરી શકે છે. જોકે, જો અધિકારીને લાગશે કે વધારાની માહિતી માગવી યોગ્ય છે, તો જ RFE અથવા NOID જારી કરવામાં આવશે.

USCISએ સ્પષ્ટ કર્યું છે કે આ નિયમ તાત્કાલિક અમલમાં આવ્યો છે અને તે નવી તેમજ પહેલેથી પેન્ડિંગ રહેલી બંને પ્રકારની અરજીઓ પર લાગુ પડશે.

ભારતીય વિદ્યાર્થીઓ અને કામદારો પર શું અસર પડશે?

આ નવો નિયમ ખાસ કરીને અમેરિકામાં અભ્યાસ કરતા ભારતીય વિદ્યાર્થીઓ અને વિવિધ વિઝા પર કામ કરતા ભારતીય કર્મચારીઓને અસર કરશે.

ઘણા ભારતીયો સમયાંતરે વિઝા એક્સટેન્શન, વર્ક ઓથોરાઇઝેશન, OPT (Optional Practical Training) અથવા ગ્રીન કાર્ડ માટે અરજી કરતા હોય છે. હવે આવી તમામ અરજીઓમાં એક પણ જરૂરી દસ્તાવેજ બાકી ન રહે તેની ખાસ કાળજી રાખવી પડશે.

જો અરજી અધૂરી રહેશે અથવા યોગ્ય પુરાવા જોડવામાં નહીં આવે, તો અરજી સીધી નામંજૂર થવાની શક્યતા વધી શકે છે. તેથી અરજદારો માટે અરજી કરતા પહેલાં તમામ દસ્તાવેજોની ચકાસણી કરવી અને સંપૂર્ણ માહિતી સાથે અરજી સબમિટ કરવી હવે પહેલાં કરતાં વધુ મહત્વપૂર્ણ બની ગઈ છે.

ભારતીયો માટે સારા સમાચાર, અમેરિકાના રાજ્યો હવે સીધા વર્ક વિઝા સ્પોન્સર કરી શકશે!