
વિશ્વભરમાં પોતાની આગવી ઓળખ ધરાવતી પોપ સિંગર ટેલર સ્વિફ્ટ ફરી એકવાર ચર્ચામાં આવી છે. તેમને ‘દાદાસાહેબ ફાળકે ઈન્ટરનેશનલ ફિલ્મ ફેસ્ટિવલ એવોર્ડ્સ 2026’માં ‘ઈન્ટરનેશનલ આર્ટિસ્ટ ઓફ ધ યર’ના ખિતાબ માટે નામ જાહેર કરવામાં આવ્યું હોવાના અહેવાલો સામે આવ્યા છે.
આ સમાચારની સાથે જ ટેલર સ્વિફ્ટનું એક જૂનું નિવેદન પણ ચર્ચામાં આવ્યું છે, જેમાં તેમણે બોલિવૂડ ફિલ્મ માટે ગીત ગાવાની ઈચ્છા વ્યક્ત કરી હતી. એટલું જ નહીં, તેમણે ભારતીય સંગીતકાર એ.આર. રહેમાનનાં પણ ભરપૂર વખાણ કર્યા હતા.
20 નવેમ્બરના રોજ જાહેર થયેલા એવોર્ડ વિજેતાઓની યાદીમાં ભારતીય સિનેમાની સાથે આંતરરાષ્ટ્રીય મનોરંજન જગતની જાણીતી હસ્તીઓનાં નામ પણ સામેલ હોવાનું જણાવાયું છે. સંગીત ક્ષેત્રે તેમના યોગદાન બદલ ટેલર સ્વિફ્ટને ‘ઈન્ટરનેશનલ આર્ટિસ્ટ ઓફ ધ યર’ તરીકે પસંદ કરવામાં આવ્યા હોવાનો દાવો કરવામાં આવ્યો છે. આ ઉપરાંત દક્ષિણ ભારતીય સિનેમાના દિગ્ગજ અભિનેતા કમલ હાસન અને હોલિવૂડના જાણીતા દિગ્દર્શકો જેમ્સ કેમેરોન તથા પોલ થોમસ એન્ડરસનને પણ સન્માનિત કરવામાં આવ્યા હોવાના અહેવાલ છે.
ભારતીય ફિલ્મ ઉદ્યોગ સાથે જોડાવાની ટેલર સ્વિફ્ટની ઈચ્છા અગાઉ પણ સામે આવી ચૂકી છે. એક જૂના ઈન્ટરવ્યુમાં તેમણે બોલિવૂડ ફિલ્મોમાં કામ કરવાની શક્યતા અંગે વાત કરી હતી. ‘હિન્દુસ્તાન ટાઈમ્સ’ સાથેની વાતચીત દરમિયાન તેમને પૂછવામાં આવ્યું હતું કે શું તેઓ ક્યારેય બોલિવૂડ ફિલ્મમાં કામ કરવાનું પસંદ કરશે? તેના જવાબમાં ટેલરે જણાવ્યું હતું કે હિન્દી ભાષા ન આવડતી હોવાથી ફિલ્મમાં અભિનય કરવો તેમના માટે થોડો મુશ્કેલ બની શકે છે. જોકે, જો તેમને બોલિવૂડ ફિલ્મ માટે ગીત ગાવાની તક મળે તો તેઓ ચોક્કસ તેને પસંદ કરશે.
ટેલર સ્વિફ્ટના આ નિવેદનથી ભારતીય સંગીતપ્રેમીઓમાં ઉત્સુકતા જોવા મળી હતી. જો ભવિષ્યમાં તેઓ કોઈ હિન્દી ફિલ્મ માટે પોતાનો અવાજ આપે, તો તે ભારતીય અને આંતરરાષ્ટ્રીય સંગીત જગત વચ્ચે એક ખાસ સહયોગ બની શકે છે.
ટેલર સ્વિફ્ટ માત્ર બોલિવૂડ ફિલ્મો જ નહીં, પરંતુ ભારતીય સંગીત પ્રત્યે પણ રસ ધરાવે છે. આ જ ઈન્ટરવ્યુ દરમિયાન તેમણે જાણીતા ભારતીય સંગીતકાર અને ઓસ્કર વિજેતા એ.આર. રહેમાનનાં વખાણ કર્યા હતા. ટેલરે જણાવ્યું હતું કે તેમણે રહેમાન વિશે ઘણું સાંભળ્યું છે અને તેઓ તેમને અત્યંત પ્રતિભાશાળી સંગીતકાર માને છે. તેમનું સંગીત સીધું હૃદયને સ્પર્શે છે તેવો અભિપ્રાય પણ તેમણે વ્યક્ત કર્યો હતો. આ સાથે જ તેમણે એ.આર. રહેમાનનો લાઈવ મ્યુઝિક પર્ફોર્મન્સ જોવાની ઈચ્છા પણ દર્શાવી હતી.
આ એવોર્ડ સમારોહમાં ભારતીય ફિલ્મ જગતની પણ ખાસ ચર્ચા રહી હતી. અહેવાલો અનુસાર, રણવીર સિંહ અભિનીત ફિલ્મ ‘ધુરંધર’ને શ્રેષ્ઠ ફિલ્મનો એવોર્ડ મળ્યો હતો. ફિલ્મના દિગ્દર્શક આદિત્ય ધરને શ્રેષ્ઠ દિગ્દર્શક તરીકે પસંદ કરવામાં આવ્યા હતા, જ્યારે રણવીર સિંહને શ્રેષ્ઠ અભિનેતાનો પુરસ્કાર મળ્યો હતો. બીજી તરફ, ફિલ્મ ‘સૈયારા’ માટે અનીત પદ્દાને શ્રેષ્ઠ અભિનેત્રીનો એવોર્ડ આપવામાં આવ્યો હોવાનો ઉલ્લેખ કરવામાં આવ્યો છે.
આ ઉપરાંત, ભારતીય સિનેમામાં લાંબા સમયથી આપેલા યોગદાન બદલ કમલ હાસન અને સંગીત ક્ષેત્રે તેમના અમૂલ્ય યોગદાન બદલ સંગીતકાર ઈલૈયારાજાને પણ સન્માનિત કરવામાં આવ્યા હોવાના અહેવાલ છે. આમ, આ એવોર્ડ સમારોહમાં ભારતીય અને આંતરરાષ્ટ્રીય મનોરંજન જગતની હસ્તીઓ એકસાથે ચર્ચામાં રહી છે.
એક્ટ્રેસ પ્રિયંકા ચોપરાની દીકરી માલતીના મુખે ગુંજ્યો ગાયત્રી મંત્ર
Published On - 7:40 pm, Sat, 21 November 26