‘લશ્કરની મદદ વિના પહેલગામ આતંકવાદી હુમલો શક્ય નહોતો’, UNSC રિપોર્ટમાં ફરી પાકિસ્તાનનો પર્દાફાશ

સંયુક્ત રાષ્ટ્રના એક રિપોર્ટમાં પહેલગામ હુમલા અંગે પાકિસ્તાનનો પર્દાફાશ થયો છે. યુએનના રિપોર્ટમાં જણાવાયું છે કે 22 એપ્રિલ 2025ના રોજ ભારતના જમ્મુ અને કાશ્મીરની બૈસરન ખીણમાં થયેલા હુમલામાં લશ્કર-એ-તૈયબાની સીધી ભૂમિકા હતી. લશ્કરના ઈશારે જ આતંકવાદીઓએ પહેલગામમાં 26 નિર્દોષ લોકોની હત્યા કરી હતી.

યુએન સુરક્ષા પરિષદની પ્રતિબંધ દેખરેખ ટીમનું કહેવું છે કે પહેલગામ હુમલામાં ધ રેસિડેન્ટ ફ્રન્ટ દ્વારા લેવામાં આવેલી જવાબદારી સાચી હતી. તપાસમાં કહેવામાં આવ્યું છે કે લશ્કરે ટીઆરએફના કામમાં મદદ કરી હતી.

લશ્કર અને ટીઆરએફ વચ્ચે સીધો સંબંધ

મોનિટરિંગ ટીમના રિપોર્ટમાં કહેવામાં આવ્યું છે કે પહેલગામમાં હુમલો લશ્કર વિના થઈ શક્યો ન હોત. આ હુમલો લશ્કરના ઈશારે કરવામાં આવ્યો હતો. યુએનનો આ રિપોર્ટ એવા સમયે આવ્યો છે જ્યારે પાકિસ્તાન પહેલગામ વિશે દુનિયા સમક્ષ ખોટું બોલી રહ્યું છે.

યુએનએ પોતાના રિપોર્ટમાં કહ્યું છે કે લશ્કર અને ટીઆરએફ વચ્ચે સીધો સંબંધ છે. ભારત લાંબા સમયથી આ વાત કહી રહ્યું છે. ટીઆરએફની સ્થાપના વર્ષ 2019 માં થઈ હતી. પાકિસ્તાનની ગુપ્તચર એજન્સી આઈએસઆઈ અને લશ્કરના હાફિઝ સઈદે તેમાં ભૂમિકા ભજવી હતી.

પાકિસ્તાન TRF-લશ્કરને બચાવવામાં વ્યસ્ત છે

પહલગામ હુમલા પછી, પાકિસ્તાન TRF અને લશ્કર-એ-તૈયબાને બચાવવામાં વ્યસ્ત છે. જ્યારે પહલગામ હુમલા પછી યુએન સુરક્ષા પરિષદે નિવેદન બહાર પાડ્યું ત્યારે પાકિસ્તાને તેમાંથી TRFનું નામ કાઢી નાખ્યું. એટલું જ નહીં, તાજેતરના યુએન રિપોર્ટમાં, પાકિસ્તાનના કહેવા પર એક દેશે લશ્કરને નિષ્ક્રિય સંગઠન ગણાવ્યું છે.

પાકિસ્તાનના સંરક્ષણ પ્રધાન ખ્વાજા આસિફના મતે, હવે ત્યાં કોઈ આતંકવાદી સંગઠન સક્રિય નથી. પહેલગામ હુમલા પછી, પાકિસ્તાને લશ્કરના હાફિઝ સઈદ અને જૈશના મસૂદ અઝહરને ભૂગર્ભમાં જવાની ફરજ પાડી.

પાકિસ્તાનના ભૂતપૂર્વ વિદેશ પ્રધાન બિલાવલ ભુટ્ટોએ એક મુલાકાતમાં સંકેત આપ્યો હતો કે હાફિઝ સઈદ અને મસૂદ અઝહર અફઘાનિસ્તાનમાં હોઈ શકે છે. આ રીપોર્ટ એવા સમયે આવ્યો છે જ્યારે ભારતીય સંસદમાં પણ ઓપરેશન સિંદુર વિશે ચર્ચા ચાલી રહી છે.