Breaking News: મેક્સિકોમાં ડ્રગ માફિયા ‘અલ મેન્ચો’ ના મોત બાદ લાગ્યું સેલ્ફ લોકડાઉન, જાણો શું છે આ સમગ્ર ઘટના

મેક્સિકોના સૌથી શક્તિશાળી અને હિંસક ડ્રગ કાર્ટેલ, ‘જલિસ્કો ન્યુ જનરેશન કાર્ટેલ’ (CJNG) ના સર્વેસર્વા નેમેસિયો ઓસેગુએરા સર્વાન્ટેસ, જે સમગ્ર વિશ્વમાં ‘અલ મેન્ચો’ તરીકે જાણીતા હતા, તેમના મોતના સમાચારથી મેક્સિકોમાં અરાજકતાનો માહોલ સર્જાયો છે.

હિંસા અને આગચંપીની ઘટનાઓ

અલ મેન્ચોના મૃત્યુના સમાચાર વહેતા થતા જ જલિસ્કો અને તેની આસપાસના રાજ્યોમાં ભારે હિંસા ફાટી નીકળી છે. કાર્ટેલના સભ્યો દ્વારા રસ્તાઓ પર વાહનો સળગાવવામાં આવ્યા છે અને હાઈવે બ્લોક કરી દેવામાં આવ્યા છે. વિરોધી ગેંગ્સ વચ્ચે સત્તાના સંઘર્ષની દહેશતને પગલે સ્થિતિ ગંભીર બની છે.

લોકડાઉન અને કડક સુરક્ષા

સુરક્ષાના કારણોસર સ્થાનિક વહીવટીતંત્રે અનેક શહેરોમાં શાળાઓ, કોલેજો અને બજારો બંધ રાખવાનો આદેશ આપ્યો છે. લોકોને ઘરમાં જ રહેવાની સલાહ આપવામાં આવી છે, જેના કારણે પ્રભાવિત વિસ્તારોમાં ‘અઘોષિત લોકડાઉન’ જેવો નજારો જોવા મળી રહ્યો છે. પ્રવાસીઓને પણ પ્રભાવિત વિસ્તારોમાં ન જવાની ચેતવણી આપવામાં આવી છે.

ગવર્નરે શું કહ્યું?

જાલિસ્કોના ગવર્નરે ‘કોડ રેડ’ જાહેર કરી દીધો છે. સોમવારે દસ રાજ્યોમાં શાળાઓ બંધ રહી હતી. એરોમેક્સિકોએ પશ્ચિમ મેક્સિકોમાં તેની તમામ ફ્લાઇટ્સ સ્થગિત કરી દીધી છે. યુનાઇટેડ સ્ટેટ્સે પ્યુર્ટો વલ્લાર્ટા, કેનકુન, તુલુમ, તિજુઆના અને અન્ય છ રાજ્યોના કેટલાક ભાગો માટે ‘શેલ્ટર વોર્નિંગ’ (આશ્રય ચેતવણી) જારી કરી છે. ઓછામાં ઓછા સાત અન્ય દેશોએ પણ આવી જ એડવાઇઝરી બહાર પાડી છે.

CJNG મેક્સિકોના તમામ 32 રાજ્યો અને ઓછામાં ઓછા 40 દેશોમાં સક્રિય છે. ઇતિહાસ સાક્ષી છે કે કોઈપણ કાર્ટેલ નેતાની હત્યા હંમેશા ઉત્તરાધિકાર માટેના યુદ્ધોને જન્મ આપે છે – જેવું ઓવિડિયો ગુઝમેન વિરુદ્ધના ઓપરેશન પછી કુલિયાકાનમાં જોવા મળ્યું હતું. એલ મેન્ચોનું મૃત્યુ મેક્સિકોમાં ડ્રગ તસ્કરી માટે આ પેઢીનો સૌથી મોટો ફટકો છે. આ ઘટના એક મહત્વપૂર્ણ વળાંક સાબિત થશે કે પછી કોઈ વધુ ભયાનક સ્થિતિની શરૂઆત, તે તો આવનારો સમય જ બતાવશે.

સેનાની તૈનાતી

મેક્સિકોની ફેડરલ પોલીસ અને આર્મીને હાઈ એલર્ટ પર રાખવામાં આવી છે. એરપોર્ટ અને સરહદી વિસ્તારોમાં ચુસ્ત બંદોબસ્ત ગોઠવી દેવાયો છે. નિષ્ણાતોનું માનવું છે કે અલ મેન્ચોના ગયા પછી કાર્ટેલ પર કબજો મેળવવા માટે આંતરિક લડાઈ વધી શકે છે, જે આગામી દિવસોમાં વધુ હિંસક બની શકે છે.

અલ મેન્ચો કોણ હતો?

• મોસ્ટ વોન્ટેડ ડ્રગ લોર્ડ: અલ મેન્ચો મેક્સિકોનો સૌથી કુખ્યાત અને મોસ્ટ વોન્ટેડ ડ્રગ માફિયા (ડ્રગ લોર્ડ) હતો.
• તેનો જન્મ 1966 માં થયો હતો અને તે શરૂઆતમાં અમેરિકામાં તસ્કરી કરતો હતો. 28 વર્ષની ઉંમરે અમેરિકામાંથી ડિપોર્ટ થયા બાદ તે મેક્સિકોની પોલીસ/સેનામાં જોડાયો હતો. ત્યાંથી તેણે અન્ય ડ્રગ માફિયાઓ સાથે સાંઠગાંઠ કરીને પોતાનું સામ્રાજ્ય ઊભું કર્યું હતું.
• CJNG કાર્ટેલનો વડો: તેણે 2009 માં ‘CJNG’ (કાર્ટેલ ડી જાલિસ્કો ન્યુવા જનરેશન) નામનું પોતાનું એક અત્યંત શક્તિશાળી ડ્રગ કાર્ટેલ બનાવ્યું હતું.
• ખાનગી સેના અને હથિયારો: તેની પાસે પોતાની એક વિશાળ અને અત્યંત આધુનિક પ્રાઇવેટ આર્મી હતી, જે બખ્તરબંધ વાહનો, AK-47 અને રોકેટ લોન્ચર્સ જેવા ઘાતક હથિયારોથી સજ્જ હતી.
• ઇનામ: અમેરિકાએ અલ મેન્ચો પર 1.5 કરોડ ડોલર (લગભગ 100 કરોડ રૂપિયાથી વધુ) નું ઇનામ રાખ્યું હતું અને તેની માહિતી મેક્સિકોની સેનાને આપી હતી.
• સૈન્ય ઓપરેશનમાં મોત: 22 ફેબ્રુઆરીના રોજ મેક્સિકોની સેનાએ અલ મેન્ચોની ધરપકડ કરવા માટે એક ઓપરેશન હાથ ધર્યું હતું. આ ઓપરેશન દરમિયાન થયેલા સામસામા ગોળીબારમાં અલ મેન્ચો માર્યો ગયો.

ટોળકીની પ્રતિક્રિયા અત્યંત હિંસક હતી. ગણતરીના કલાકોમાં જ 20 રાજ્યોમાં 250 જેટલા નાકાબંધી (બ્લોકેડ) ના સમાચાર સામે આવ્યા. ગ્વાડાલાજારામાં 20 બેંકોને આગ ચાંપી દેવામાં આવી. પ્યુર્ટો વલ્લાર્ટાના પ્રવાસી વિસ્તારોમાં ધુમાડાના ગોટા ઉડતા દેખાયા, કારણ કે તમામ જમીની પરિવહન ઠપ્પ થઈ ગયું હતું અને પ્રવાસીઓએ એરપોર્ટ સુધી રોડ માર્ગે જવાનું જોખમ ઉઠાવવાને બદલે પોતાની ફ્લાઈટ્સ છોડી દીધી હતી.

આ ભયાનક હિંસા અને આગજનીને કારણે જ અમેરિકા, ભારત, ઓસ્ટ્રેલિયા સહિત દુનિયાભરના દેશોએ પોતાના નાગરિકોને સુરક્ષિત રહેવા માટે એડવાઇઝરી જારી કરવી પડી હતી.

એલ મેન્ચોની મોત બાદ મેક્સિકોમાં અરાજકતા! ફિફા વર્લ્ડ કપના આયોજન પર જોખમ? ફ્લાઈટ્સ રદ અને વર્લ્ડ કપ મેચો ખસેડવાની ચર્ચા, વાંચવા માટે અહીં ક્લિક કરો