International Yoga Day : અમેરિકા, લંડન, ન્યુયોર્ક સહિત દેશના ખૂણે ખૂણે થી આવ્યા વિશ્વ યોગ દિવસની ઉજવણીના વીડિયો, જુઓ

વિશ્વ યોગ દિવસ 2025ના ઉત્સવની ઉજવણી ન્યૂયોર્ક સ્થિત ભારતના કૉન્સ્યુલેટ જનરલ ઓફિસે ઉમંગભેર કરી. ટાઉન ઑફ ગ્રીનબર્ગ અને ઈન્ડિયન કલ્ચરલ એસોસિએશન ઑફ નોર્થ અમેરિકા (ICANA)ના સહયોગથી વેસ્ટચેસ્ટર વિસ્તારમાં આયોજિત યોગ કાર્યક્રમમાં મોટી સંખ્યામાં નાગરિકોએ ભાગ લીધો. સવારની ઠંડી હવા અને શાંતિપૂર્ણ વાતાવરણ વચ્ચે લોકો યોગાભ્યાસ દ્વારા તંદુરસ્ત જીવનશૈલી તરફ પ્રેરિત થયા.

ટાઈમ્સ સ્ક્વેર, જે દુનિયાના સૌથી વધુ ચર્ચિત સ્થળોમાંથી એક છે, ત્યાં પણ Consulate General of India, New York દ્વારા વિશાળ યોગ સત્ર યોજાયું. અહીં લોકોએ શારીરિક, માનસિક અને આત્મિક સંતુલન માટે યોગના મહત્વને ઉજાગર કર્યું.

કૉન્સ્યુલેટે પોતાના ઓફિશિયલ હેન્ડલ પરથી લખ્યું કે, “આ ઉત્ત્સાહભર્યા ક્ષણો ‘One Earth, One Health’ના સૂત્ર સાથે સંપૂર્ણ રીતે મેળ ખાતા જોવા મળ્યા.”

ન્યૂયોર્ક ઉપરાંત, વોશિંગ્ટન ડી.સી.માં ભારતીય દૂતાવાસ દ્વારા લિન્કન મેમોરિયલ ખાતે યોગ કાર્યક્રમ યોજાયો. અહીં ભારતીય મૂળના નાગરિકો ઉપરાંત સ્થાનિક અમેરિકનોએ પણ મોટી સંખ્યામાં ભાગ લીધો. કાર્યક્રમમાં વિખ્યાત અભિનેતા અનુપમ ખેરની ખાસ હાજરી નોંધાઈ.

ભારતના અમેરિકામાં રાયભારી વિનય મોહન ક્વાત્રાએ લોકોનું આવકારતાં જણાવ્યું કે, “યોગ ભારતની સંસ્કૃતિનું પ્રાચીન વારસું છે. આજનો દિવસ માત્ર આસનો માટે નહીં, પણ સમગ્ર માનવતા માટે આંતરિક શાંતિ અને સમૃદ્ધિ તરફ પગલાં છે.”

યોગ ગુરુ આચાર્ય ગોવિંદ બ્રહ્માચારીએ યોગને માત્ર શારીરિક કસરત નહીં, પણ આધ્યાત્મિક અને માનસિક વિકાસ માટેના સાધન તરીકે વર્ણવ્યો. ડૉ. સ્મિતા પટેલે પણ યોગના આરોગ્યલાભોને ઉજાગર કરતા આજે રજૂ થયેલી થીમ “One Earth, One Health”ના મહત્વ પર પ્રકાશ પાડ્યો.