અમેરિકાની હિલ્ટન હોટેલમાં ભૂતકાળનું પુનરાવર્તન, 40 વર્ષ પહેલા રોનાલ્ડ રેગન અને હવે ટ્રમ્પ પર હુમલો, અમેરિકી સુરક્ષાનો ફિયાસ્કો
વ્હાઇટ હાઉસ કોરેસ્પોન્ડન્ટ્સ ડિનર દરમિયાન ડોનાલ્ડ ટ્રમ્પ પર ફરી જીવલેણ હુમલો થયો. બે વર્ષમાં ટ્રમ્પ પર બે હુમલા થયા છે. વોશિંગ્ટન ડીસીના હિલ્ટન હોટલમાં થયેલા ગોળીબારે સુરક્ષા વ્યવસ્થા પર ગંભીર સવાલો ઉઠાવ્યા છે. હુમલાખોર કોલ થોમસ એલન નામના યુવકની ધરપકડ થઈ છે. ત્યારે સવાલ ઉઠી રહ્યા છે કે શું આ ઇરાન પ્રેરિત હુમલો, લોન વુલ્ફ હુમલો હતો કે પછી સહાનુભૂતિ મેળવવા માટેનો પ્લાન હતો?- વાંચો
અમેરિકાના રાજકારણમાં હિંસાની ઘટનાઓ અટકવાનું નામ નથી લઈ રહી. લગભગ બે વર્ષ પહેલાં પેન્સિલવેનિયાની રેલીમાં ડોનાલ્ડ ટ્રમ્પ પર થયેલા હુમલા બાદ, જેમાં ગોળી તેમના કાનને સ્પર્શીને નીકળી ગઈ હતી, હવે ફરી એકવાર તેમને નિશાન બનાવવાનો પ્રયાસ કરવામાં આવ્યો છે. વોશિંગ્ટન ડીસીની પ્રતિષ્ઠિત હિલ્ટન હોટલમાં આયોજિત ‘વ્હાઇટ હાઉસ કોરેસ્પોન્ડન્ટ્સ ડિનર’ દરમિયાન આ ઘટના બની હતી, જ્યાં ટ્રમ્પ અને તેમના ઉપરાષ્ટ્રપતિ જેડી વેન્સની હાજરીમાં હોટલના બોલરૂમની બહાર સાત જેટલી ગોળીઓ ચલાવવામાં આવી હતી. આ હુમલાએ અમેરિકાની સર્વોચ્ચ સુરક્ષા એજન્સીઓ સામે અનેક ગંભીર પ્રશ્નો ઉભા કર્યા છે.
વોશિંગ્ટન ડીસીના હિલ્ટન હોટલમાં અફરાતફરીનો માહોલ
વ્હાઇટ હાઉસ કોરેસ્પોન્ડન્ટ્સ ડિનર એ એક વાર્ષિક કાર્યક્રમ છે જેમાં અમેરિકી રાષ્ટ્રપતિ અને વ્હાઇટ હાઉસને કવર કરતા પત્રકારો વચ્ચે અનૌપચારિક મુલાકાત થાય છે. આ એક હળવો કાર્યક્રમ હોય છે જેમાં રાષ્ટ્રપતિ પોતાની અને વિપક્ષની મજાક ઉડાવતા હોય છે. પરંતુ આ વખતે આ હાસ્ય-મજાકનો માહોલ ત્યારે ચીસાચીસ અને ચિચિયારીઓમાં ફેરવાઈ ગયો જ્યારે હોટલના ગેટની બહાર ગોળીબારનો અવાજ સંભળાયો. સુરક્ષાના કારણોસર જેડી વેન્સને તાત્કાલિક બહાર લઈ જવામાં આવ્યા અને જ્યારે ડોનાલ્ડ ટ્રમ્પને સુરક્ષાકર્મીઓએ ઘેરી લીધા હતા. જે દ્રશ્યો સામે આવ્યા છે તેમાં જોઈ શકાય છે કે ગોળીબારના અવાજ સાંભળીને તમામ પત્રકારો અને મહેમાનો જીવ બચાવવા માટે ટેબલો નીચે છુપાઈ ગયા હતા.
સુરક્ષા વ્યવસ્થા પર ઉઠ્યા ગંભીર સવાલો
આ ઘટના માત્ર એક હુમલો નથી પરંતુ સુરક્ષામાં મોટી ચૂક છે. જે સ્થળે આ કાર્યક્રમ ચાલી રહ્યો હતો ત્યાં માત્ર ડોનાલ્ડ ટ્રમ્પ જ નહીં, પરંતુ તેમની પત્ની મેલાનિયા ટ્રમ્પ, ઉપરાષ્ટ્રપતિ જેડી વેન્સ, અડધાથી વધુ કેબિનેટ મંત્રીઓ અને સુરક્ષાના દિગ્ગજો પણ હાજર હતા. આશ્ચર્યની વાત એ છે કે FBIના ચીફ કાશ પટેલ અને નેશનલ ઈન્ટેલિજન્સના વડા તુલસી ગબાર્ડ જેવા ઉચ્ચ અધિકારીઓની હાજરી હોવા છતાં એક સશસ્ત્ર હુમલાખોર હોટલના બોલરૂમ સુધી પહોંચવામાં સફળ રહ્યો. એરપોર્ટ કરતા પણ વધુ કડક સુરક્ષા હોવા છતાં હથિયારો સાથે કોઈ વ્યક્તિ અંદર ઘૂસી જાય જે સુરક્ષા એજન્સીઓની ગંભીર બેદરકારી દર્શાવે છે.
કોણ છે હુમલાખોર કોલ થોમસ એલન?
હુમલાના સ્થળેથી સુરક્ષાકર્મીઓએ 31 વર્ષીય કોલ થોમસ એલન નામના યુવકની ધરપકડ કરી છે, જે કેલિફોર્નિયાનો રહેવાસી હોવાનું જાણવા મળ્યું છે. તેની પ્રોફાઈલ તપાસતા તે એક શિક્ષિત વ્યક્તિ લાગે છે, જેણે કેલ્ટેક (Caltech) યુનિવર્સિટીમાંથી કોમ્પ્યુટર સાયન્સમાં માસ્ટર્સ કર્યું છે. તેની પાસેથી ઘણી બધી છરીઓ, એક હેન્ડગન અને એક શોર્ટગન મળી આવી છે. હાલ તેની ધરપકડ કરીને તેના ડિજિટલ ફૂટપ્રિન્ટ્સ અને સોશિયલ મીડિયા એન્ગલની તપાસ કરવામાં આવી રહી છે .જેથી હુમલા પાછળનો હેતુ સ્પષ્ટ થઈ શકે.
હિલ્ટન હોટલનો ઇતિહાસ અને સુરક્ષાના પડકારો
આ એજ હિલ્ટન હોટલ છે જ્યાં લગભગ 40 વર્ષ પહેલાં 1981માં તત્કાલીન રાષ્ટ્રપતિ રોનાલ્ડ રીગન પર પણ જીવલેણ હુમલો થયો હતો. વારંવાર આવી ઘટનાઓ બનવાનું એક કારણ એ હોઈ શકે છે કે જ્યારે આવા હાઈ-પ્રોફાઈલ કાર્યક્રમો ચાલતા હોય ત્યારે હોટલના અન્ય રૂમ્સ ખાલી કરાવવામાં આવતા નથી, જેથી હોટલના અન્ય મહેમાનો અને કાર્યક્રમ વચ્ચે સુરક્ષામાં ખામી રહી જવાની શક્યતા વધી જાય છે. ડોનાલ્ડ ટ્રમ્પ આ જોખમને પહેલેથી જ ઓળખી ગયા હતા અને તેથી જ તેઓ વ્હાઇટ હાઉસની પાછળ એક સુરક્ષિત બોલરૂમ બનાવવા પર ભાર મૂકી રહ્યા છે જેથી ભવિષ્યમાં આવા જાહેર સ્થળોએ કાર્યક્રમો ન કરવા પડે.
વ્હાઇટ હાઉસમાં સુરક્ષિત બોલરૂમની જરૂરિયાત પર ટ્રમ્પનો તર્ક
આ હુમલાએ ડોનાલ્ડ ટ્રમ્પના એ વિવાદિત પ્રોજેક્ટને ફરી ચર્ચામાં લાવી દીધો છે, જેમાં તેઓ વ્હાઇટ હાઉસના પાછળના ભાગમાં એક અત્યાધુનિક અને સુરક્ષિત બોલરૂમ બનાવવાનો આગ્રહ રાખી રહ્યા છે. ટ્રમ્પના વિરોધીઓ આ પ્રોજેક્ટ પાછળ થતા ખર્ચની ટીકા કરતા રહ્યા છે, પરંતુ ટ્રમ્પનું માનવું છે કે હિલ્ટન જેવી જાહેર હોટલોમાં રાષ્ટ્રપતિની સુરક્ષા જાળવવી અત્યંત જટિલ કાર્ય છે. જો આ કાર્યક્રમ વ્હાઇટ હાઉસના પોતાના સુરક્ષિત પરિસરમાં જ આયોજિત થયો હોત, તો કદાચ હુમલાખોર આટલો નજીક પહોંચી શક્યો ન હોત. ટ્રમ્પ આ જોખમને પહેલેથી જ પારખી ગયા હતા અને તેથી જ તેઓ પોતાના કાર્યકાળમાં આ નિર્માણ કાર્યને વેગ આપી રહ્યા છે
શું આ સહાનુભૂતિ મેળવવા માટેનો કોઈ પ્લાન હતો?
આ હુમલા પાછળ ઘણી થિયરીઓ ચર્ચાઈ રહી છે. સૌથી પહેલી થિયરી ઈરાની કનેક્શનની છે. ટ્રમ્પના શાસનકાળ દરમિયાન સુલેમાની અને ત્યારબાદ તાજેતરમાં ખામનૈઈ જેવા નેતાઓને નિશાન બનાવવામાં આવ્યા હોવાથી ઈરાન પ્રત્યેનો આક્રોશ હુમલાનું કારણ હોઈ શકે છે. બીજી તરફ, તેને ‘લોન વુલ્ફ’ એટેક અથવા ડોમેસ્ટિક રેડિકલાઈઝેશનના ભાગ રૂપે પણ જોવામાં આવી રહ્યો છે, જેમાં ટ્રમ્પની ઇમિગ્રેશન નીતિઓથી નારાજ કોઈ સ્થાનિક વ્યક્તિએ આ કૃત્ય કર્યું હોય શકે. આ ઉપરાંત, સોશિયલ મીડિયા પર એવી અફવાઓ પણ છે કે શું આ સહાનુભૂતિ મેળવવા માટેનો કોઈ પ્લાન હતો, જોકે તેની પાસે કોઈ પુરાવા નથી.
હુમલા બાદ પણ ટ્રમ્પ ખુદની બડાશ મારવાનું ન ભૂલ્યા
હુમલાની ગંભીરતા છતાં ટ્રમ્પનો મિજાજ અકબંધ જોવા મળ્યો હતો. ગોળીબારના માત્ર 30 મિનિટ બાદ જ તેમણે સુરક્ષાકર્મીઓને કાર્યક્રમ ફરી શરૂ કરવા માટે કહ્યું હતું, જોકે પ્રોટોકોલના કારણે તેમને મંજૂરી આપવામાં આવી નહોતી. આ હુમલા દરમિયાન બુલેટપ્રૂફ જેકેટ પહેરેલા એક સુરક્ષા અધિકારીને ગોળી વાગી હતી, પરંતુ જેકેટના કારણે તેમનો જીવ બચી ગયો હતો. જ્યારે પત્રકારોએ ટ્રમ્પને પૂછ્યું કે શા માટે માત્ર તેમને જ વારંવાર નિશાન બનાવવામાં આવે છે, ત્યારે તેમણે પોતાના જ અંદાજમાં જવાબ આપ્યો કે, મેં એટલા મોટા અને ઐતિહાસિક કામો કર્યા છે કે લોકો મને એક પડકાર તરીકે જુએ છે.
વડાપ્રધાન મોદીએ હુમલાની નિંદા કરી
આ ઘટનાના સમાચાર વાયુવેગે ફેલાતા જ સમગ્ર વિશ્વના નેતાઓએ તેની આકરી નિંદા કરી છે. ભારતના વડાપ્રધાન નરેન્દ્ર મોદીએ આ ઘટના પર ચિંતા વ્યક્ત કરી અને લોકશાહીમાં હિંસાને કોઈ સ્થાન નથી તેમ જણાવ્યું હતું. આ સિવાય એન્થોની અલ્બેનીઝ, ઇમેન્યુઅલ મેક્રોન અને અન્ય વૈશ્વિક નેતાઓએ પણ ટ્રમ્પ અને તેમના પરિવારની સુરક્ષા અંગે રાહતનો શ્વાસ લીધો છે.
આ હુમલામાં એક સુરક્ષા ગાર્ડને ગોળી વાગી છે પરંતુ તે સુરક્ષિત છે. ટ્રમ્પે આ ઘટના બાદ પોતાના સુરક્ષાકર્મીઓની પ્રશંસા કરી અને કહ્યું કે તેઓ પોતાનું કામ ચાલુ રાખશે. જોકે, આ ઘટના બાદ અમેરિકામાં રાજકીય નેતાઓની સુરક્ષા અંગેના પ્રોટોકોલમાં મોટા ફેરફારોની શક્યતા છે.
