બાળકોનો બેડરૂમ ડિઝાઇન કરવા માગો છો? તો આ પોસ્ટ ખાસ વાંચો અને મેળવો આઈડિયા અને રાખો આટલી વસ્તુનું ખાસ ધ્યાન

આજકાલ ઘરમાં બાળકો માટે તેમનો અલગ બેડરૂમ ડિઝાઇન કરવાનું ચલણ વધ્યું છે. બાળકોના બેડરૂમની ડિઝાઇન એવી હોવી જોઈએ જે તેમનામાં સર્જનાત્મકતા વધારે અને અભ્યાસમાં પણ તેમનું મન લાગે. બેડ એવી રીતે ગોઠવવો જોઈએ કે તેમને અભ્યાસ કરવામાં કોઈ તકલીફ પણ ન પડે.

બાળકો માટે બેડરૂમ ડિઝાઇન કરતી વખતે બાળકોની સંખ્યા અને રૂમની સાઈઝ ખાસ ધ્યાનમાં રાખવી જોઈએ. જો ઘરમાં બે બાળકો હોય તો તેમને સુવા માટે ડબલ બેડની જગ્યાએ એક બેડની ઉપર બીજો બેડ હોય એવો બંક બેડ અથવા તો બેડની નીચે બીજો એક બેડ બનાવીને રાત્રે સૂતી વખતે સરકાવીને બહાર કાઢી શકાય એવો બેડ ડિઝાઇન કરાવી શકાય. જેથી જગ્યાની મોકળાશ રહે.

મોટી સમસ્યા સ્ટોરેજની હોય છે. તેમના રૂમમાં બુક્સ અને રમકડાં સ્ટોર કરવા યોગ્ય વ્યવસ્થા હોવી જોઈએ. આ માટે તમે એવા યુનિટ્સ બનાવી શકો જે સ્ટોર અને અભ્યાસ બંને માટે વાપરી શકાય. બાળકોના બેડ પણ સ્ટોરેજ ક્ષમતાવાળા બનાવી શકાય જેથી વધારાનો સામાન સાચવી શકાય.

બાળકો સ્વભાવે તોફાની હોય છે. તેથી તેમના રૂમમાં એવી વસ્તુ ન રાખવી જેથી તેમને ઇજા થાય. ઇલેક્ટ્રોનિક પ્લગ પણ નાના બાળકો પહોંચી ન શકે તેટલી ઊંચાઈએ હોવો જોઈએ. બાળકોનો રૂમ ડિઝાઇન કરતી વખતે સુરક્ષાનું ખાસ ધ્યાન રાખવું જોઈએ.