સુરત શહેરનાં દરેક વિસ્તારમાં દર વર્ષે મહાનગરપાલિકાની તિજોરીમાંથી કરોડો રૂપિયાનાં ખર્ચે રસ્તા બનાવવામાં આવે છે. અને રસ્તા કાર્પેટ-રિકાર્પેટ કરવામાં આવે છે. છતાં પણ વરસાદી પાણીનાં કારણે આ રસ્તાઓ ધોવાઇ જવાના કારણે વાહનચાલકો અને રાહદારીઓને ભારે મુશ્કેલી પડે છે પણ આ સમસ્યા નિવારવા હવે સુરત મહાનગરપાલિકા બનાવી રહી છે પ્લાસ્ટિકનાં રસ્તાઓ.
એક તરફ પ્લાસ્ટિક વેસ્ટને લઈને હવે લોકોમાં જાગૃતિ આવી રહી છે. ત્યારે સુરત શહેર માટે ગૌરવ લેવા જેવી બાબત એ છે કે પ્લાસ્ટિક વેસ્ટના નિકાલના મેનેજમેન્ટને લઈને સુરત મહાનગરપાલિકા સૌથી પહેલી રહી હતી. હવે તો સુરતના તમામ ઝોનમાંથી નીકળતા ઘન કચરામાંથી પ્લાસ્ટિકનો કચરો અલગ કરીને તેને રિસાઈકલ કરવાનો પ્લાન્ટ પણ છેલ્લા બે વર્ષથી સુરત કોર્પોરેશને કાર્યરત કર્યો છે.
સુરત શહેરમાંથી રોજનો હજારો ટન કચરો નીકળે છે. જેના માટે પાલિકા ડોર ટુ ડોર ગારબેજ કલેક્શનની ગાડીઓ ચલાવે છે. જોકે અન્ય કચરાનો નિકાલ તો આસાનીથી થઈ શકે છે. પરંતુ આ કચરામાંથી રોજબરોજના વપરાશમાં આવતું પ્લાસ્ટિક વેસ્ટ નિકાલ કરવું અઘરું બની જાય છે.
સુરત શહેરમાં રોજીંદો 2100 મેટ્રિક ટન કચરો નીકળે છે. જેમાં પ્લાસ્ટિકની થેલીઓ, દૂધ-છાશની થેલીઓ, વોટર બોટલ તેમજ અન્ય પ્લાસ્ટિક મટીરીયલ મળીને 157 મેટ્રિક ટન જેટલું પ્લાસ્ટિક વેસ્ટ નીકળે છે. આ ઉપરાંત સુરત એ ઔધોગિક શહેર હોવાથી યાર્ન, ચીંદી, કાપડના ડૂચા, ટેક્સટાઇલ માર્કેટ વેસ્ટ, વિવિંગ વેસ્ટ, નાયલોન વેસ્ટ દોરા સહિતનો કચરો પણ પ્લાસ્ટિક વેસ્ટમાં ગણી શકાય.
સુરતમાં દર વર્ષે સરેરાશ 300 કિમી જેટલો રસ્તો બનાવવા પાછળ સુરત મહાનગરપાલિકા 80 થી 90 કરોડ જેટલો ખર્ચો કરે છે. પણ છતાં મોટાભાગનાં રસ્તા હલકી ગુણવત્તાવાળા હોવાથી વરસાદ પડતાં જ તે ધોવાઇ જાય છે અને ખાડા ટેકરાવાળા બની જાય છે. આ સમસ્યા હલ કરવા હવે પ્લાસ્ટિકનાં ટકાઉ રોડ બનાવવાની દિશામાં કામગીરી હાથ ધરવામાં આવી છે.પ્લાસ્ટિક વેસ્ટનો ઉપયોગ કરીને પોલીમર બીટ્યુમીન રોડ બનાવવામાં આવે છે. હાલ પ્રાયોગિક ધોરણે 7 અલગ અલગ રોડ તૈયાર કરવામાં આવ્યા છે.
આ કામગીરીમાં ડામરનું પ્રમાણ ઘટાડવામાં આવતું નથી. પણ 1 મેટ્રીક ટન ડામરમાં 100 કિલો જેટલું પ્લાસ્ટિક વેસ્ટ ઉમેરવામાં આવે છે. હોટમિક્સ પ્લાન્ટમાં પ્લાસ્ટિકની કચરણ, ડામર અને કપચી એકબીજા સાથે ભેળવવામાં આવે છે. જેથી તેમાં પાણીની અસર થતી નથી. આનાં કારણે રોડની મજબુતાઇ વધશે તે નિશ્ચિત છે..
શા માટે જરૂર પડી પ્લાસ્ટિકનાં રોડ બનાવવાની ??
પ્લાસ્ટિક વેસ્ટનો ઉપયોગ કરી રોડ બનાવવાની રીત
એક વાત તો ચોક્કસ છે કે પ્લાસ્ટિક વેસ્ટનાં ઉપયોગથી પર્યાવરણને સૌથી મોટો ફાયદો થશે. અને વરસાદી પાણીની અસરથી રોડ ધોવાઇ જવાનું પણ અટકશે. સમગ્ર પ્રક્રિયા સરળ હોવાથી રોડ રિસરફેસનાં ખર્ચમાં પણ જંગી વધારો થશે નહિં.
Published On - 5:00 pm, Mon, 21 June 21