Surat : ગોડાદરામાં યુવકની લાશનો ભેદ ઉકેલાયો, બે આરોપીની ધરપકડ
પોલીસે આરોપીઓની પૂછપરછ કરતા સામે આવ્યું હતું કે મૃતક યુવકનું નામ અખિલેશ રાધા સિંગ છે અને તેઓ ગોડાદરા ઋષિ નગર પાસે રહે છે. મૃતક તેમના જ ગામનો રહેવાસી હતો. દરમ્યાન ગત 11-06-2023 ના રોજ રવિવારની રજા હોય સાંજના ચારેક વાગ્યાના સુમારે ઝડપાયેલા બંને આરોપીઓ તથા મૃતક દેવધ ગામ પાસે ગયા હતા.
Surat: સુરતના ગોડાદરા વિસ્તારમાં એક યુવકની હત્યા(Murder) કરાયેલી લાશ મળી આવી હતી. આ બનાવમાં મૃતકની ઓળખ પણ થઇ ન હતી. દરમ્યાન આ ગુનાનો ભેદ સુરત ક્રાઈમ બ્રાંચની ટીમે ઉકેલી કાઢ્યો છે. આ ઘટનામાં સુરત ક્રાઈમ બ્રાંચની ટીમે મૃતકની ઓળખ કરવા સાથે બે આરોપીઓને ઝડપી પાડી કાયદેસરની કાર્યવાહી હાથ ધરી હતી.
ગત 13-06-2023 ના રોજ સુરતના ગોડાદરા વિસ્તારમાં આવેલ દેવઘગામ પાસે એક ખેતરમાંથી એક 40 થી 45 વર્ષીય યુવકની હત્યા કરાયેલી લાશ મળી આવતા ચકચાર મચી જવા પામી હતી. યુવકના માથાના ભાગે તથા શરીરના અન્ય ભાગે બોથડ પદાર્થ મારીને ઈજા કરી મોતને ઘાટ ઉતારી દેવામાં આવ્યો હતો. આ સમગ્ર મામલે ગોડાદરા પોલીસ મથકમાં ગુનો નોંધવામાં આવ્યો હતો.
પોલીસ દ્વારા તપાસ હાથ ધરવામાં આવી હતી દરમ્યાન સુરત ક્રાઈમ બ્રાંચની ટીમે આ ગુનાનો ભેદ ઉકેલી કાઢ્યો છે. આ ગુનામાં સુરત ક્રાઈમ બ્રાંચની ટીમે મૂળ બિહારના વતની મનજી બીષણુનાથ ઉર્ફે બીશુ કહાર ( ઉમર 55 ) અને જીતેન્દ્ર ઉર્ફે જીતુ કેશવર કહાર [ઉ.૩૭] ની ધરપકડ કરી હતી
પોલીસે આરોપીઓની પૂછપરછ કરતા સામે આવ્યું હતું કે મૃતક યુવકનું નામ અખિલેશ રાધા સિંગ છે અને તેઓ ગોડાદરા ઋષિ નગર પાસે રહે છે. મૃતક તેમના જ ગામનો રહેવાસી હતો. દરમ્યાન ગત 11-06-2023 ના રોજ રવિવારની રજા હોય સાંજના ચારેક વાગ્યાના સુમારે ઝડપાયેલા બંને આરોપીઓ તથા મૃતક દેવધ ગામ પાસે ગયા હતા.
આ વખતે આરોપી જીતુ કહારનો મૃતક અખિલેશ સાથે ખોરાકીના તથા રૂમના ભાડાના પૈસાની લેતીદેતી અંગે અગાઉથી ચાલ્યો આવતો ઝઘડો ફરીથી થતા જીતુએ ઉશ્કેરાઈને બાજુમાં પડેલો પત્થર અખિલેશને માથાના અને શરીરના ભાગે મારી મોતને ઘાટ ઉતારી દીધો હતો.
બનાવ અંગે ડીસીપી રૂપલ સોલંકીએ જણાવ્યું હતું કે ગોડાદરા વિસ્તારમાં અજાણ્યા ઇસમની લાશ મળી હતી અને તેની ઓળખ પણ થઇ શકી ન હતી. દરમ્યાન સુરત ક્રાઈમ બ્રાંચની ટીમે ઊંડાણ પૂર્વક તપાસ કરીને આ ગુનાનો ભેદ ઉકેલી કાઢ્યો છે. આ ઘટનામાં બે આરોપીની ધરપકડ કરવામાં આવી છે. તેમજ આરોપીઓની પૂછપરછમાં સામે આવ્યું છે કે તેઓ પોટલા ઉપાડવાનું કામ કરે છે.
આ દરમ્યાન આરોપી જીતું અને મૃતક અખિલેશનો રૂમ પર રહેવા અને જમવા બાબતે વારંવાર માથાકૂટ થતી હતી અને ગત ૧૧ જુન ના રોજ ફરીથી આ જ બાબતે ઝઘડો થતા અખિલેશની હત્યા કરી નાખવામાં આવી હતી. આ બનાવમાં બંને આરોપીની ધરપકડ કરી કાયદેસરની કાર્યવાહી હાથ ધરવામાં આવી છે.