Surat : સુરતના રસ્તા પર માતેલા સાંઢની જેમ દોડતા ડમ્પરો છાસવારે વાહનચાલકોને કાળનો કોળિયો બનાવી લેતા હોય છે. ત્યારે કાપોદ્રા વિસ્તારમાંથી મોપેડ લઈને જઈ રહેલા વૃદ્ધને ડમ્પરે પાછળથી ટક્કર લગાવી (Accident) હતી. સમગ્ર ઘટના સીસીટીવી કેમેરામાં કેદ થઈ હતી. કાપોદ્રા પોલીસે (Kapodra police )અકસ્માતે મોતનો ગુનો નોંધી વધુ તપાસ હાથ ધરી છે.
જોકે બીજી તરફ મૃતકના પરિવારજનોએ જણાવ્યું હતું કે, ડમ્પર ચાલક સામે આકરા પગલાં લેવાની અમારી માગ છે. પરંતુ પોલીસે આ કેસમાં હળવી કલમો દાખલ કરી છે. જેથી અમારી માગ છે કે, ડમ્પર ચાલક સામે સદોષ માનવ વધનો ગુનો દાખલ કરવામાં આવે.
મૂળ ભાવનગરના ગારીયાધારના વતની અને સુમુલ ડેરી રોડ સરદાર નગર સામે અલૌકિક એપાર્ટમેન્ટ ખાતે રહેતા મુળજીભાઈ વાલજીભાઈ પટેલ (67) કાપડના વ્યવસાય સાથે સંકળાયેલા છે. તેમના બે પુત્રો વેસુ ખાતે કાપડનો ધંધો કરે છે. મુળજીભાઈ શનિવારે સરથાણા ખાતે રહેતા તેમના બનેવીના ખબર અંતર પુછવા માટે ગયા હતા. ત્યાંથી મોપેડ પર પરત ફરતી વેળા કાપોદ્રા બીએસપીએસ મંદિર સામે બ્રીજ પાસે ટ્રક ચાલકે તેમને અડફેટે લેતા વ્હીલ તેમના માથા પરથી ફરી વળતા ઘટનાસ્થળે જ મોત નીપજ્યું હતું.
અન્ય એક બનાવમાં પુણા સરદાર માર્કેટ પાસે લક્ઝરી બસે અડફેટે લેતા યુવકનું મોત થયું હતું.મૃતકના સંતાનોએ જણાવ્યું હતું કે, શહેરમાં પ્રતિબંધ હોવા છતાં બેફામપણે ડમ્પરની અવરજવર રસ્તા પર જોવા મળે છે. ત્યારે અકસ્માત સર્જનાર ડમ્પર કોની પરમિશનથી એ સમયે રસ્તા પરથી પૂરપાટ ઝડપે પસાર થઈ રહ્યો હતો.
સીસીટીવીમાં કેદ થયુ છે કે, ડમ્પર ચાલકે બેફામ રીતે ડમ્પર ચલાવીને મોપેડ ચાલક પર ચડાવી દીધું હતું. જેના કારણે તેમનું ઘટનાસ્થળે જ મોત થયું હતું. જોકે આ સમગ્ર ઘટનામાં પોલીસે હળવી કલમો દાખલ કરી હોવાથી જે જામીન પાત્ર છે. તો અમારી માગ છે કે, સદોષ માનવવધનો ગુનો દાખલ કરવામાં આવે અને આકરી સજા ચાલકને કરવામાં આવે. જેથી આવા અકસ્માતો થતા અટકી શકે.