Breaking News : સાબર ડેરી ના દુધિયા રાજકારણ પાછળ નો ગંદો ખેલ! વાયરલ ઓડિયોને લઈ અનેક સવાલ, જુઓ Video

સાબરકાંઠામાં સાબર ડેરીની ચૂંટણી જાહેર થતાં જ રાજકીય માહોલ ઉગ્ર બન્યો છે. આ ચૂંટણી પ્રચાર દરમિયાન સોશિયલ મીડિયા પર એક કથિત ઓડિયો ક્લિપ વાયરલ થઈ છે, જેણે સમગ્ર સહકારી ક્ષેત્રમાં હડકંપ મચાવ્યો છે. આ ઓડિયોમાં દૂધમાં ભેળસેળ, ભરતી પ્રક્રિયામાં ગેરરીતિ અને રાજકીય નેતાઓની સંડોવણી અંગેના ગંભીર આક્ષેપો કરવામાં આવ્યા છે.

વાયરલ ઓડિયો ક્લિપના મુખ્ય દાવાઓ અનુસાર, 1,200 લિટર દૂધને ગેરકાયદેસર રીતે 3,500 લિટર બનાવવાની વાતચીત થઈ હતી. આ આક્ષેપ લોકોના સ્વાસ્થ્ય અને દૂધની ગુણવત્તા અંગે ગંભીર ચિંતાઓ ઊભી કરે છે. જો આ દાવા સાચા હોય તો તે સ્પષ્ટ દર્શાવે છે કે દૂધમાં પાણી કે અન્ય કોઈ પદાર્થ ભેળવીને તેની માત્રા વધારવામાં આવી રહી છે, જે ડેરીના માપદંડો અને જાહેર આરોગ્ય બંને માટે જોખમી છે. આ ઉપરાંત, ઓડિયો ક્લિપમાં સાબર ડેરીમાં નોકરી મેળવવા માટે ₹10 લાખની માંગણી કરાતી હોવાના કથિત દાવા પણ સામે આવ્યા છે, જે ભરતી કૌભાંડ સૂચવે છે.

આ ઓડિયો ક્લિપમાં ધારાસભ્ય ધવલસિંહના નામનો પણ ઉલ્લેખ થતો હોવાની ચર્ચા છે, જેના કારણે આ મામલો રાજકીય રંગ પકડી રહ્યો છે. જોકે, TV9 ગુજરાતી આ વાયરલ ઓડિયો ક્લિપની સત્યતા કે તેમાં કરવામાં આવેલા દાવાઓની સ્વતંત્ર રીતે પુષ્ટિ કરતું નથી. ઓડિયોની અધિકૃતતા અને તેમાં થયેલી વાતચીતની હકીકત તપાસ બાદ જ સ્પષ્ટ થઈ શકશે.

આ ઓડિયો ક્લિપ જૂની હોઈ શકે છે, પરંતુ ચૂંટણીના માહોલમાં તેને ફરીથી વાયરલ કરવામાં આવી છે. સવાલ એ પણ છે કે, આખરે મનીષ નામનો સુપરવાઇઝર કક્ષાનો નાનો કર્મચારી આટલા મોટા વહીવટ કઈ રીતે ચલાવી શકે છે? જો આવા કાળા કારનામા થઈ રહ્યા હોય તો સત્તાધીશો (સરકાર, આરોગ્ય વિભાગ, સહકાર વિભાગ) અત્યાર સુધી શા માટે મૌન છે? શું ડેરીમાં ભ્રષ્ટાચારમાં નેતાઓની પણ સંડોવણી છે? બનાસ ડેરીની જેમ પશુપાલકોના હિતમાં કાર્ય કરવાને બદલે સાબર ડેરીમાં શા માટે ભ્રષ્ટાચાર ખદબદી રહ્યો છે?

હાલમાં સાબર ડેરીમાં ચેરમેન પદ માટે શામળ પટેલ, વિપુલ પટેલ અને ભોગીલાલ પટેલ સહિતના ડિરેક્ટરો વચ્ચે ખેંચતાણ ચાલી રહી છે. આ ઓડિયો ક્લિપ આવા સમયે સામે આવતા ચૂંટણીનો માહોલ વધુ ગરમાયો છે. કિંજલના મતે, આ માત્ર બે લોકો વચ્ચેનો સંવાદ નથી, પરંતુ તે સાબર ડેરીના વિસ્તૃત વ્યાપમાં ખોટી મંડળીઓ બનાવવાની અને ગાંધીનગર સુધીની સાઠગાંઠનો સંકેત આપે છે.

પ્રધાનમંત્રીના ગુજરાત પ્રવાસ દરમિયાન ઉચ્ચ નસલની ગાયો અને સારી ગુણવત્તાવાળા દૂધની વાતો વચ્ચે, સાબર ડેરીનો આ વિવાદ લોકોમાં અસમંજસ ઊભો કરે છે કે તેમને મળતું દૂધ ખરેખર ચોખ્ખું છે કે નહીં. આ સ્થિતિમાં, ફૂડ વિભાગ કે અન્ય સરકારી એજન્સીઓ દ્વારા આ મામલે તપાસ કરવામાં આવશે કે કેમ તે મોટો પ્રશ્ન છે. શું સાબર ડેરી ખરેખર ખેડૂતો માટે કામ કરી રહી છે કે કોન્ટ્રાક્ટરો માટે? 6 નવેમ્બરે યોજાનારી ચૂંટણીમાં શું મેન્ડેટમાં પરિવર્તન આવશે કે પુનરાવર્તન? આ તમામ સવાલોના જવાબ આગામી સમયમાં જ મળશે.

ભાવનગરની આ બિલ્ડિંગોમાં સુરક્ષાનું જોખમ? ફાયર NOC વિના 80 ઇમારતો! જુઓ Video