Rajkotમાં સીઆર પાટીલનો આજે વન ડે વન ડિસ્ટ્રીક્ટ કાર્યક્રમ, ગોંડલમાં કરશે શક્તિપ્રદર્શન

ગુજરાતમાં (Gujarat) ભાજપે (BJP) વિધાનસભા ચૂંટણીની તૈયારીઓ આરંભી છે. જેના ભાગરૂપે ભાજપ પ્રદેશ પ્રમુખ સી.આર.પાટીલનો (CR Paatil) વન ડે વન ડિસ્ટ્રીક્ટ કાર્યક્રમ કરી રહ્યા છે. જેમાં તેઓ દરેક જિલ્લામાં ડોક્ટર, વકીલ, સાધુસંતો, ઉદ્યોગપતિ, શ્રમિકો તેમજ ગંગાસ્વરૂપા બહેનો સાથે સંવાદ કરે છે. આ ઉપરાંત દરેક જિલ્લામાં ભાજપના કાર્યકર્તાઓ સાથે પણ મુલાકાત કરશે. ત્યારે હવે વન ડે વન ડિસ્ટ્રીકટ કાર્યક્રમ અંતર્ગત સી.આર.પાટીલ રાજકોટમાં કાર્યક્રમ કરશે.

ગોંડલમાં સી. આર. પાટીલ કરશે શક્તિ પ્રદર્શન

ગુજરાતમાં વધુમાં વધુ લોકો સાથે સંપર્ક થઈ શકે તે માટે ભાજપે માઈક્રો પ્લાનિંગ કર્યું છે. પ્રવાસ, સંપર્ક અને બેઠકના મૂળમંત્ર સાથે સંગઠનને વધુ ને વધુ સંગઠિત કરવાના ધ્યેય સાથે ભાજપ પ્રદેશ અધ્યક્ષ સી.આર.પાટીલ સમગ્ર રાજ્યના 33 જિલ્લાઓમાં ” વન ડે વન ડીસ્ટ્રીકટ ” કાર્યક્રમ અંતર્ગત પ્રવાસ કરી રહ્યા છે. જે અંતર્ગત ભાજપ પ્રદેશ પ્રમુખ સી.આર.પાટીલનો આજે રાજકોટમાં કાર્યક્રમ છે. ગોંડલ વિધાનસભાની બેઠક પર સી.આર.પાટીલ શક્તિ પ્રદર્શન કરશે. ગોંડલમાં એક હજાર બાઇક ચાલકોની રેલી સાથે પાટીલનું ભવ્ય સ્વાગત કરાશે. રેલી બાદ ગોંડલ યાર્ડમાં કાર્યકરોને સી.આર.પાટીલ સંબોધન કરશે. તો 22 જુલાઇએ રાજકોટ શહેરમાં સી.આર.પાટીલ વિવિધ કાર્યક્રમ કરશે.

182 બેઠકો પર કબજો મેળવવા ભાજપની કવાયત

ગુજરાત વિધાનસભાની ચૂંટણી (Gujarat Assembly Election 2022) ને લઇ ભાજપ (BJP) મિશન 182 પ્રમાણેના ટાર્ગેટ પર કામ કરી રહી છે, ત્યારે 182 બેઠકો પર કબજો મેળવવા ભાજપે પ્રયાસ શરૂ કર્યા છે. વડાપ્રધાન નરેન્દ્ર મોદી સમગ્ર દેશમાં અવિરત પ્રવાસ કરી રહ્યા છે તેજ રીતે ભાજપ પ્રદેશ પ્રમુખ સી.આર. પાટીલ પણ દેશભરમાં સતત પ્રવાસ દ્વારા સંગઠનનું સશક્તિકરણ કરી રહ્યા છે. જેના ભાગરુપે રાજકોટમાં ભાજપનો વન-ડે વન ડિસ્ટ્રીક કાર્યક્રમ યોજાશે.

ભાજપને વધુ બેઠક મળે તે માટેનો રોડમેપ તૈયાર કરાશે

ભાજપ પ્રદેશ અધ્યક્ષ સી.આર.પાટીલ આજથી બે દિવસ રાજકોટની (Rajkot) મુલાકાતે છે. આ દરમિયાન તેઓ રાડકોટ જિલ્લામાં ભાજપની (BJP) સ્થિતિનો તાગ મેળવશે. એટલું જ નહીં બુથ અને પેજ સમિતિની પણ સમીક્ષા કરશે. સાથે સાથે ધારાસભ્યો, જિલ્લા અને તાલુકા સભ્યોની કામગીરીનો ગ્રાઉન્ડ રિપોર્ટ મેળવશે અને ત્યારબાદ રાજકોટમાં ભાજપને વધુ બેઠક મળે તે માટેનો રોડમેપ તૈયાર કરશે.