19 સપ્ટેમ્બરના મહત્વના સમાચાર : ગુજરાતમાં એક દિવસમાં 6 આપઘાતથી ચકચાર, રાજકોટ અને વડોદરામાં વિદ્યાર્થિનીએ લગાવી મોતની છલાંગ, સુરતમાં બે પરિણીતાએ ટૂંકાવી જિંદગી, જૂનાગઢમાં ઝેરી દવા ખાઇ દંપતીની આત્મહત્યા

વડોદરા મહાનગરપાલિકાની સામાન્ય સભા દરમિયાન સત્તાપક્ષ અને વિપક્ષના કાઉન્સિલરો આમને-સામને આવી ગયા હતા. મેયર દ્વારા સભાસદોને સમય મર્યાદામાં બોલવા માટે કહેવામાં આવતા મામલો ઉગ્ર બન્યો હતો. આ દરમિયાન કોંગ્રેસના કાઉન્સિલર આશિષ જોશીના નિવેદનથી સભામાં ગરમાવો આવ્યો હતો. આશિષ જોશીએ કહ્યું હતું કે, ‘મેયર પાસે સમય ન હોય તો ડેપ્યુટી મેયર સભા સંભાળે.’ આ નિવેદન બાદ શાસક અને વિપક્ષના કાઉન્સિલરો વચ્ચે ઉગ્ર બોલાચાલી થઈ હતી. બંને પક્ષના સભ્યો સામસામે આવી જતા સામાન્ય સભામાં થોડા સમય માટે તંગદિલીનો માહોલ સર્જાયો હતો. સમગ્ર મામલે સભામાં હોબાળો થતાં અન્ય કામગીરી પણ પ્રભાવિત થઈ હતી.

જામનગરમાં ફૂડ વિભાગ દ્વારા શહેરના વિવિધ વિસ્તારોમાં સઘન તપાસ ઝુંબેશ હાથ ધરવામાં આવી છે. ખોડિયાર કોલોની, હવાઈ ચોક સહિતના વિસ્તારોમાં આવેલી ખાદ્ય પેઢીઓમાં તપાસ કરવામાં આવી હતી. પ્રદર્શન મેદાન સહિત કુલ 118 પેઢીઓમાં ફૂડ વિભાગની ટીમે ચેકિંગ હાથ ધર્યું હતું. તપાસ દરમિયાન 303 કિલો વાસી ખાદ્ય જથ્થાનો નાશ કરવામાં આવ્યો હતો. આ ઉપરાંત 10 કિલો ખરાબ ગુણવત્તાનું તેલ જપ્ત કરી નાશ કરાયું હતું. 59 કિલો પ્રિન્ટેડ પસ્તીનો જથ્થો પણ જપ્ત કરી નાશ કરવામાં આવ્યો છે. ખાદ્ય સુરક્ષાના નિયમોનું ઉલ્લંઘન કરનાર કુલ 19 પેઢીઓ સામે કાર્યવાહી કરવામાં આવી હતી. આ પેઢીઓ પાસેથી કુલ 77 હજાર રૂપિયાનો દંડ વસૂલવામાં આવ્યો છે.

મહેસાણાના ઊંઝામાં શંકાસ્પદ વરિયાળીની ફેક્ટરી પર ફૂડ વિભાગે દરોડો પાડ્યો છે. મકતુપુરની ગણેશ ક્લીનિંગ પેઢીમાં CID પોલીસની મદદથી ફૂડ વિભાગે સર્ચ ઓપરેશન હાથ ધર્યું હતું. તપાસ દરમિયાન ફેક્ટરીમાંથી કલરયુક્ત અને ભેળસેળવાળી હોવાની શંકાસ્પદ વરિયાળીનો જથ્થો મળી આવ્યો છે. ફેક્ટરીમાંથી 4 હજાર 800 કિલોથી વધુ વરિયાળી મળી આવી હતી. આ ઉપરાંત પ્રતિબંધિત ગ્રીન કલરનો જથ્થો પણ મળી આવ્યો છે. ફૂડ વિભાગે કુલ અંદાજે 2 લાખ રૂપિયાથી વધુનો મુદ્દામાલ સીઝ કર્યો છે. શંકાસ્પદ વરિયાળીના જથ્થાના સેમ્પલ લઈ વધુ તપાસ હાથ ધરવામાં આવી રહી છે. ફૂડ વિભાગની કાર્યવાહીથી ભેળસેળ કરતા તત્વોમાં ફફડાટ ફેલાયો છે.

ફક્ત 3 ઇંચ વરસાદમાં અમદાવાદના અનેક વિસ્તારો જળમગ્ન થતા હવે આ મુદ્દો મનપાની સંકલન સમિતિની બેઠકમાં પણ ગુંજ્યો છે. શુક્રવારે વરસેલા વરસાદ બાદ શહેરના અનેક વિસ્તારોમાં પાણી ભરાયા હતા. જેને લઈને સત્તા પક્ષ અને વિપક્ષના તમામ ધારાસભ્યોએ એકસૂરે જળભરાવની સમસ્યા દૂર કરવા રજૂઆત કરી હતી.

જમાલપુર-ખાડિયાના ધારાસભ્ય ઈમરાન ખેડાવાલાએ સામાન્ય વરસાદમાં જ સ્માર્ટ સિટી પાણીમાં ગરકાવ થતું હોવાનો આક્ષેપ કર્યો. તેમણે જણાવ્યું કે ત્રણ દરવાજા અંગ્રેજોના સમયના હોવા છતાં અત્યાર સુધી ડ્રેનેજ લાઇન ઓવરફ્લોની મોટી સમસ્યા જોવા મળી નહોતી. જોકે, પ્રથમ વખત અઢી ઇંચ વરસાદમાં ત્રણ દરવાજા વિસ્તારમાં પાણી ભરાયું હોવાનો તેમણે દાવો કર્યો. ખેડાવાલાએ મનપા તંત્રની કામગીરી સામે પણ સવાલો ઉઠાવ્યા.

બીજી તરફ વેજલપુરના ધારાસભ્ય અમિત ઠાકરે પણ પોતાના વિસ્તારમાં જળભરાવની સમસ્યા દૂર કરવા રજૂઆત કરી હતી. આ ઉપરાંત શિવરંજનીથી શ્યામલ સુધીના રોડની સમસ્યા દૂર કરવા પણ તેમણે મનપા તંત્ર સમક્ષ રજૂઆત કરી હતી. બેઠકમાં ધારાસભ્યોએ વરસાદી પાણીના નિકાલ માટે કાયમી ઉકેલ લાવવાની માગ કરી હતી.

અગ્રણી કલા મંચ ‘ઇન્ડિયા આર્ટ ફેર’ દ્વારા અમદાવાદમાં તેની બીજી એડિશનનું આયોજન કરવામાં આવ્યું છે. અમદાવાદના ધ બેરોનેટ હાઉસ ખાતે યોજાયેલા આ કલા પ્રદર્શનમાં દેશભરમાંથી કુલ 18 સહભાગીઓ એકસાથે આવ્યા છે. જેમાં અમદાવાદ સ્થિત પાંચ અગ્રણી ગેલેરીઓનો પણ સમાવેશ થાય છે. આ પ્રસંગે ઇન્ડિયા આર્ટ ફેરના ફેર ડિરેક્ટર જયા અશોકન તેમજ ઝાયડસ ફાઉન્ડેશનના વાઇસ ચેરપર્સન મેહા પટેલ સહિતના મહાનુભાવો ઉપસ્થિત રહ્યા હતા.

ઇન્ડિયા આર્ટ ફેરના ફેર ડિરેક્ટર જયા અશોકને જણાવ્યું હતું કે, આ આયોજનનો મુખ્ય હેતુ દિલ્હીમાં યોજાતા વાર્ષિક ફેરની સીમાઓથી આગળ વધીને દેશના વિવિધ પ્રાદેશિક શહેરોની કલાત્મક ક્ષમતાઓને રાષ્ટ્રીય સ્તરે મંચ પૂરો પાડવાનો છે. તેમણે જણાવ્યું કે હૈદરાબાદમાં આયોજિત પ્રથમ એડિશનને સારો પ્રતિસાદ મળ્યો હતો અને ત્યારબાદ અમદાવાદમાં યોજાઈ રહેલી બીજી એડિશનને લઈને પણ ઉત્સાહ જોવા મળી રહ્યો છે. પ્રદર્શનમાં વિવિધ કલાકારો અને ગેલેરીઓની કૃતિઓ રજૂ કરવામાં આવી છે.

વડોદરાના પાદરા નગરપાલિકાના કામમાં મજૂરોની સુરક્ષાને લઈને ગંભીર સવાલો ઉભા થયા છે. પાદરા નગરપાલિકાના કામના કથિત વીડિયો સામે આવ્યા છે, જેમાં ગટરના ગંદા પાણીમાં મજૂરોને સુરક્ષા સાધનો વિના ઉતારી કામ કરાવવામાં આવતું હોવાનો આક્ષેપ કરવામાં આવ્યો છે. બહારથી પણ કોઈપણ પ્રકારના સુરક્ષા સાધનો વિના મજૂરો પાસે કામ કરાવવામાં આવતું હોવાનો વીડિયો વાયરલ થયો છે. આ વીડિયો સામે આવ્યા બાદ કોન્ટ્રાક્ટર દ્વારા મજૂરોની સુરક્ષાને લગતા નિયમોનું પાલન કરવામાં આવે છે કે નહીં તે અંગે સવાલો ઉઠ્યા છે. સાથે જ મજૂરોની સુરક્ષાને લઈને પાદરા નગરપાલિકા તંત્રની કામગીરી સામે પણ સવાલો ઉઠી રહ્યા છે. સમગ્ર મામલે તંત્ર દ્વારા તપાસ કરવામાં આવે તેવી માગ ઉઠી છે.

અમરેલી જિલ્લાના સાવરકુંડલા પંથકમાં વરસાદી માહોલ છવાયો છે. વીજપડી, હાડીડા, નવાગામ અને ચીખલી સહિતના ગામોમાં વરસાદ વરસ્યો છે. દામનગર, ધુફણીયા અને આંબરડી સહિતના ગ્રામ્ય વિસ્તારોમાં પણ વરસાદ નોંધાયો છે. બીજી તરફ લાઠી અને આસપાસના ગ્રામ્ય પંથકમાં ઘોઘમાર વરસાદ શરૂ થતાં શેરીઓમાં પાણી વહેતા થયા છે. લાઠી શહેરમાં સારા વરસાદના કારણે રસ્તાઓ પર પાણી ફરી વળ્યા છે. રામપર અને તાજપર સહિતના ગામોમાં પણ વરસાદ વરસ્યો છે. વરસાદના કારણે સમગ્ર પંથકમાં ઠંડક પ્રસરી છે અને ખેડૂતોમાં પણ રાહત જોવા મળી રહી છે.

મોરબીમાં રાજ્યમંત્રી કાંતિ અમૃતિયા એક મહિલાની મદદે પહોંચ્યા હતા. લીલું ઘાસ વેચતી મહિલા પાસેથી હપ્તો લેવાતો હોવાની ફરિયાદ મંત્રી સમક્ષ કરવામાં આવી હતી. ફરિયાદ મુજબ, મનપાની પ્રાણી રંજાડ શાખાના કર્મચારી દ્વારા મહિલાને હેરાન કરવામાં આવતી હોવાનો આક્ષેપ હતો. મામલો જાણમાં આવતા કાંતિ અમૃતિયા સ્થળ પર પહોંચ્યા હતા અને મહિલાની રજૂઆત સાંભળી હતી. ત્યારબાદ મંત્રીએ સ્થળ પરથી જ મનપાના અધિકારીને મહિલાના રૂપિયા પરત કરાવવાની સૂચના આપી હતી. મહિલાના ₹3 હજાર પરત કરાવવામાં આવ્યા હતા. આ ઉપરાંત હપ્તો લેતા કર્મચારી સામે સસ્પેન્શનની કાર્યવાહી કરવાની પણ મંત્રીએ સૂચના આપી હતી.

બનાસકાંઠાના પાલનપુર શહેરમાં વરસાદ વરસતા અનેક વિસ્તારોમાં પાણી ભરાઈ ગયા છે. શહેરમાં માત્ર એક ઇંચ જેટલા વરસાદમાં જ આદર્શ હાઇસ્કૂલ રોડ, માધુપુરા રોડ અને ITI રોડ સહિતના વિસ્તારોમાં જળભરાવની સ્થિતિ સર્જાઈ છે. પાણી ભરાતા વાહનચાલકો અને સ્થાનિક નાગરિકોને હાલાકીનો સામનો કરવો પડી રહ્યો છે. સ્થાનિકોના જણાવ્યા મુજબ, અગાઉ પણ જળભરાવની સમસ્યા અંગે પાલિકા તંત્રને રજૂઆતો કરવામાં આવી હતી. જોકે, પાણીના નિકાલની યોગ્ય વ્યવસ્થા ન કરવામાં આવતા વરસાદ પડતાં ફરી એ જ સ્થિતિ સર્જાઈ છે. નાગરિકોએ તંત્ર દ્વારા કાયમી ઉકેલ લાવવામાં આવે તેવી માગ કરી છે.

સુરતના વરાછા અને કતારગામ વિસ્તારમાં લારી-ગલ્લા અને પાથરણાંવાળાઓના દબાણથી લોકોને મુશ્કેલી પડતી હોવાની ફરિયાદ કોર્પોરેટરોએ કરી છે. આ મામલે સ્થાયી સમિતિના ચેરમેન રાજન પટેલે સંબંધિત એજન્સીને તાત્કાલિક સર્વે રિપોર્ટ રજૂ કરવા સૂચના આપી છે. અર્થ પ્લાનિંગ રિસર્ચ સેન્ટરને સાત મહિના અગાઉ સર્વેની કામગીરી સોંપવામાં આવી હતી. સર્વે ચાલુ હોવાથી હાલ દબાણો સામે કડક કાર્યવાહી કરવામાં આવી રહી નથી. સ્ટ્રીટ વેન્ડિંગ પોલિસી અંતર્ગત ટાઉન વેન્ડિંગ કમિટી દ્વારા માર્ગોને વેન્ડિંગ, નો-વેન્ડિંગ અને રિસ્ટ્રિક્ટેડ ઝોનમાં વર્ગીકૃત કરવામાં આવ્યા છે. નોંધાયેલા ફેરિયાઓને જ ઓળખકાર્ડના આધારે વેપારની મંજૂરી મળશે. અગાઉના સર્વેમાં 34 હજાર વેન્ડર્સ નોંધાયા હતા. નવા સર્વે બાદ વાસ્તવિક સ્થિતિ સામે આવશે અને રિપોર્ટ મ્યુનિસિપલ કમિશનરને સોંપાશે.

અમદાવાદમાં AMTSની બે બસ પર એક જ નંબરની પ્લેટ જોવા મળતા વિવાદ સર્જાયો છે. બંને બસ પર GJ27 TJ 3550 નંબરની પ્લેટ લગાવેલી હોવાનું સામે આવ્યું છે. એક સ્થાનિક વ્યક્તિએ આ અંગે પોલીસને જાણ કરતાં મેઘાણીનગર પોલીસે બંને બસની સરખી નંબર પ્લેટના મામલે તપાસ શરૂ કરી છે. RTO ટેક્સ બચાવવા માટે આ પ્રકારનો કારસો કરવામાં આવ્યો હોવાની આશંકા પણ વ્યક્ત કરવામાં આવી રહી છે.

આ મામલે કોંગ્રેસે AMTSની કોન્ટ્રાક્ટ એજન્સી સામે ગંભીર બેદરકારી બદલ FIR નોંધવાની માગ કરી છે. સાથે જ સંબંધિત એજન્સીનો કોન્ટ્રાક્ટ રદ કરી તેને કાયમ માટે બ્લેકલિસ્ટ કરવાની પણ માગ કરવામાં આવી છે. પોલીસે સમગ્ર મામલે વધુ તપાસ હાથ ધરી છે.

ગુજરાત યુનિવર્સિટીના પૂર્વ કુલપતિ નીરજા ગુપ્તાની અંગત ખરીદીના બિલના મામલે કોંગ્રેસે તપાસની માગ કરી છે. કોંગ્રેસે આક્ષેપ કર્યો છે કે ઉચ્ચ પદ પર રહેલા અધિકારીના કારણે યુનિવર્સિટીની તિજોરી અને ગરિમાને નુકસાન થયું છે. પૂર્વ કુલપતિએ નિયમ બહાર જઈ યુનિવર્સિટીની તિજોરીને નુકસાન પહોંચાડ્યું હોવાનો પણ આક્ષેપ કરવામાં આવ્યો છે. કોંગ્રેસે સરકાર પાસે સમગ્ર મામલે તપાસ કરાવી નુકસાનની ભરપાઈ કરાવવાની માગ કરી છે. સાથે જ લાંબા સમયથી આવી બાબતો સામે આવતી હોવા છતાં નક્કર કામગીરી ન થતી હોવાનો આક્ષેપ કર્યો છે.

ઉલ્લેખનીય છે કે વર્ષ 2024માં નીરજા ગુપ્તા એવોર્ડ સ્વીકારવા અમેરિકા ગયા હતા. તે દરમિયાન ન્યૂ જર્સીના ઝારા સ્ટોરમાંથી 149 ડોલર અને સેફોરામાંથી 139 ડોલરની ખરીદી કરાઈ હતી. જ્યારે દુબઈ એરપોર્ટ પરથી 97.50 ડોલરની ખરીદી કરવામાં આવી હતી. આમ, કુલ 386 અમેરિકન ડોલરની ખરીદીના બિલ ગુજરાત યુનિવર્સિટીમાં રજૂ કરાયા હોવાનો આરોપ છે. જોકે, આ બિલ નિયમ મુજબ રજૂ થયા હતા કે નહીં તે તપાસનો વિષય છે.

સુરતના રાંદેર વિસ્તારમાં ઝેપ્ટોના ગોડાઉનમાં ફૂડ વિભાગે ચેકિંગ હાથ ધર્યું હતું. ચેકિંગ દરમિયાન ગોડાઉનમાંથી એક્સપાયરી ડેટવાળી છાશ અને બ્રેડ મળી આવતાં ફૂડ વિભાગે કાર્યવાહી કરી છે. એક્સપાયરી વસ્તુઓ મળી આવતા ઝેપ્ટોને રૂ.25 હજારનો દંડ ફટકારવામાં આવ્યો છે. સાથે જ કંપનીને શોકોઝ નોટિસ પણ આપવામાં આવી છે. ફૂડ વિભાગની ટીમે ગોડાઉનમાં રહેલા અન્ય ખાદ્ય પદાર્થોની પણ તપાસ કરી હતી. ઉલ્લેખનીય છે કે, થોડા દિવસ અગાઉ સુરતમાં જ બ્લિન્કિટમાંથી વાસી લાડુ મળી આવ્યા હતા. ઓનલાઈન ફૂડ ડિલિવરી પ્લેટફોર્મના ગોડાઉનમાં એક્સપાયરી અને વાસી ખાદ્ય સામગ્રી મળતાં ફૂડ સેફ્ટીને લઈને સવાલો ઉઠ્યા છે.

સુરતના રાંદેર વિસ્તારમાં બે દિવસ પહેલા બનેલી હિટ એન્ડ રનની ઘટનામાં એક યુવકના મોત મામલે ફરાર કારચાલકને પોલીસે ઝડપી પાડ્યો છે. રાંદેર પોલીસે ગણતરીના કલાકોમાં જ આરોપીની ધરપકડ કરી હતી. અકસ્માતમાં એક યુવકનું મોત થયું હતું. ઘટનાના પગલે પોલીસે ફરાર કારચાલકની શોધખોળ શરૂ કરી હતી અને તેને ઝડપી પાડ્યો હતો. પોલીસે આરોપીની કાર પણ જપ્ત કરી રાંદેર પોલીસ સ્ટેશન ખાતે રાખી છે. જોકે, ધરપકડ બાદ ગણતરીના કલાકોમાં જ આરોપીને જામીન મળી જતા તે જામીન પર મુક્ત થયો હતો. હિટ એન્ડ રનના આ બનાવમાં પોલીસે વધુ તપાસ હાથ ધરી છે.

શ્રદ્ધા, ભક્તિ અને સેવાનું કેન્દ્ર એવા અંબાજીના ભાદરવી પૂનમના મેળાને લઈને પોલીસ તંત્ર સજ્જ બન્યું છે. અંબાજી મંદિર પરિસરમાં છેલ્લા એક અઠવાડિયાથી બોમ્બ સ્કવોડ દ્વારા સઘન ચેકિંગ કરવામાં આવી રહ્યું છે. બનાસકાંઠા જિલ્લાની BDDS એટલે કે બોમ્બ ડિટેક્શન એન્ડ ડિસ્પોઝલ ટીમ દ્વારા ડોગ સ્કવોડને સાથે રાખીને મંદિર પરિસરના વિવિધ સ્થળોએ તપાસ હાથ ધરાઈ છે. મેળા દરમિયાન અન્ય જિલ્લાઓમાંથી પણ બોમ્બ સ્કવોડની ટીમો બોલાવવામાં આવશે. મેળાના રૂટ સહિતના સંવેદનશીલ વિસ્તારોમાં પણ સઘન તપાસનું આયોજન કરવામાં આવ્યું છે. લાખો ભક્તોની સુરક્ષાને ધ્યાનમાં રાખીને પોલીસ દ્વારા ચાંપતો બંદોબસ્ત ગોઠવવામાં આવી રહ્યો છે, જેથી માતાજીના દર્શને આવતા ભક્તો સુરક્ષિત રીતે પરત ફરી શકે.

મુંબઈની IIT બોમ્બેમાં એન્જિનિયરિંગના બીજા વર્ષમાં અભ્યાસ કરતા વિદ્યાર્થીએ હોસ્ટેલમાં આપઘાત કરતાં ચકચાર મચી છે. પરીક્ષા દરમિયાન મોબાઈલનો ઉપયોગ કરતા વિદ્યાર્થી ઝડપાયા બાદ ગણતરીના કલાકોમાં આ ઘટના બની હોવાનું સામે આવ્યું છે. પ્રશ્નપત્રના જવાબ મેળવવા માટે પેપર ChatGPT પર અપલોડ કર્યાનો આરોપ પણ લગાવવામાં આવ્યો છે. વિદ્યાર્થીના મોત બાદ IIT બોમ્બેના અન્ય વિદ્યાર્થીઓએ ધરણાં કરી આપઘાતની વધતી ઘટનાઓ અંગે સંચાલકો પાસેથી જવાબ માગ્યો હતો. બીજી તરફ, સંચાલકોએ મૃતક વિદ્યાર્થી સામે કોઈ શિસ્તભંગની કાર્યવાહી કરવામાં આવી ન હોવાનું જણાવ્યું છે. વિદ્યાર્થીના મોતને લઈને મુંબઈ પોલીસે પુરાવા એકત્ર કરી તપાસ શરૂ કરી છે. ઘટનાને પગલે કેમ્પસમાં પણ ચકચાર મચી છે.

જામનગરના જામજોધપુરના ધોરીયા નેસ સીમમાં પોલીસે દરોડો પાડી મોટી માત્રામાં વિદેશી દારૂનો જથ્થો ઝડપી પાડ્યો છે. પોલીસે રૂ.23.40 લાખની કિંમતની 15 હજારથી વધુ દારૂની બોટલો કબજે કરી છે. ટ્રકમાંથી દારૂનું કટીંગ કરવામાં આવી રહ્યું હોવાની બાતમીના આધારે પોલીસે રેડ કરી હતી. પોલીસે ટ્રક સહિત કુલ રૂ.44.40 લાખનો મુદ્દામાલ કબજે કર્યો છે. જોકે, પોલીસની રેડ દરમિયાન ટ્રકચાલક અને ત્રણ બાઇકસવાર સ્થળ પરથી ફરાર થઈ ગયા હતા. પોલીસે ફરાર આરોપીઓની શોધખોળ શરૂ કરી છે. સમગ્ર મામલે પોલીસે દારૂનો જથ્થો ક્યાંથી આવ્યો અને કોને પહોંચાડવાનો હતો તે સહિતની વિગતો મેળવવા વધુ તપાસ હાથ ધરી છે.

ગાંધીનગરમાં ગણપતિ વિસર્જન દરમિયાન નદીમાં ડૂબી જવાની ઘટના સામે આવી છે. ત્રણ મિત્રો શાહપુર બ્રિજ નીચે નદીમાં ગણપતિ વિસર્જન માટે ગયા હતા. આ દરમિયાન ત્રણેય યુવકો નદીના પાણીમાં તણાઈ ગયા હતા. ઘટનાની જાણ થતાં ફાયર વિભાગની ટીમને જાણ કરવામાં આવી હતી. ફાયર વિભાગે તાત્કાલિક રેસ્ક્યૂ ઓપરેશન હાથ ધરી બે યુવકોને સલામત રીતે બહાર કાઢ્યા હતા, જ્યારે એક યુવકની શોધખોળ શરૂ કરવામાં આવી છે. ઉલ્લેખનીય છે કે નદીમાં ગણપતિ વિસર્જન ન કરવા માટે કલેક્ટર દ્વારા જાહેરનામું બહાર પાડવામાં આવ્યું છે. તેમ છતાં અનેક સ્થળોએ પૂરતો બંદોબસ્ત ન હોવાનો આક્ષેપ પણ કરવામાં આવી રહ્યો છે. હાલ ગુમ થયેલા યુવકની શોધખોળ માટે રેસ્ક્યૂ કામગીરી ચાલી રહી છે.

ગુજરાત યુનિવર્સિટીના પૂર્વ કુલપતિ નીરજા ગુપ્તા પર અંગત ખરીદીના બિલ યુનિવર્સિટીમાં રજૂ કરી પાસ કરાવ્યાનો આરોપ લાગ્યો છે. દુબઈ અને અમેરિકાથી ખરીદેલી વસ્તુઓના બિલ ગુજરાત યુનિવર્સિટીમાં રજૂ કરાયા હોવાનો દાવો કરવામાં આવી રહ્યો છે. નિવૃત્ત જજની તપાસ વચ્ચે લિપસ્ટિક, આઈલાઈનર, બ્યુટી પ્રોડક્ટ્સ અને ડ્રેસ સહિતની વસ્તુઓના બિલ સામે આવ્યા છે. અમેરિકાના પ્રવાસ દરમિયાન કરાયેલી ખરીદીના બિલ TV9 પાસે આવ્યા હોવાનો દાવો છે.

વર્ષ 2024માં પૂર્વ કુલપતિ નીરજા ગુપ્તા એવોર્ડ સ્વીકારવા અમેરિકા ગયા હતા. તે દરમિયાન ન્યૂ જર્સીના ઝારા સ્ટોરમાંથી 149 અમેરિકન ડોલર અને સેફોરામાંથી 139 અમેરિકન ડોલરની ખરીદી કરવામાં આવી હતી. જ્યારે દુબઈ એરપોર્ટ પરથી 97.50 અમેરિકન ડોલરની વસ્તુઓ ખરીદાઈ હતી. આમ, વિદેશ પ્રવાસ દરમિયાન કુલ 386 અમેરિકન ડોલરની ખરીદીના બિલ ગુજરાત યુનિવર્સિટીમાં રજૂ કરાયા હોવાનો આરોપ છે. જોકે, આ ખરીદી યુનિવર્સિટીના નિયમો હેઠળ હતી કે નહીં તે અંગે તપાસમાં હકીકત સ્પષ્ટ થશે.

સુરતના વરાછા વિસ્તારમાં થયેલી મોબાઈલ ચોરીનો પોલીસે ભેદ ઉકેલી આરોપીને ઝડપી પાડ્યો છે. સહકર્મીનો મોબાઈલ ચોરીને આરોપી ફરાર થયો હતો. ઘટનાની જાણ થતાં પોલીસે CCTV ફૂટેજના આધારે આરોપીની શોધખોળ શરૂ કરી હતી. તપાસ દરમિયાન આરોપી રેલવે સ્ટેશન તરફ ગયો હોવાનું સામે આવ્યું હતું. પોલીસે રેલવે સ્ટેશન પર પહોંચી ટ્રેનમાં બેસે તે પહેલાં જ આરોપીને ઝડપી પાડ્યો હતો. પોલીસે આરોપીની ધરપકડ કરી તેની પાસેથી ચોરી કરાયેલો મોબાઈલ કબજે કર્યો છે. CCTV ફૂટેજ અને અન્ય વિગતોના આધારે પોલીસે સમગ્ર મામલે તપાસ હાથ ધરી હતી. આરોપીની પૂછપરછ બાદ ચોરી અંગે વધુ વિગતો સામે આવવાની શક્યતા છે.

જૂનાગઢ માર્કેટિંગ યાર્ડમાં તુવેરની મબલક આવક નોંધાઈ છે. યાર્ડમાં ખેડૂતોની જણસીની આવક શરૂ થઈ ગઈ છે, જેમાં તુવેરની બમ્પર આવક જોવા મળી રહી છે. ખુલ્લી હરાજીમાં તુવેરના પ્રતિ મણ 1600થી 1750 રૂપિયા સુધીના ભાવ મળતા ખેડૂતોમાં ખુશી જોવા મળી રહી છે. બીજી તરફ, મગફળીની પણ ધીમી આવક શરૂ થઈ છે. માર્કેટમાં આવેલી અંદાજે 150 બોરી મગફળીના પ્રતિ મણ 1300થી 1400 રૂપિયા સુધીના ભાવ બોલાયા હતા. વેપારીઓ દ્વારા જણસીના રોકડા નાણાં ચૂકવવામાં આવી રહ્યા છે, જેને પગલે ખેડૂતોમાં આનંદની લાગણી જોવા મળી રહી છે.

રાજકોટમાં બ્યુટીપાર્લર સંચાલિકાની હત્યાનો ભેદ પોલીસે ઉકેલી લીધો છે. પોલીસે હત્યામાં સંડોવાયેલા બંને આરોપીઓની ધરપકડ કરી છે. પોલીસ તપાસમાં સામે આવ્યું છે કે આગ્રાના બે શખ્સોએ લૂંટના ઇરાદે મહિલાની હત્યા કરી હતી. આરોપીઓએ રૂ.2 લાખની લોન ચૂકવવા માટે લૂંટનો પ્લાન બનાવ્યો હોવાનું પોલીસ તપાસમાં ખુલ્યું છે. આ માટે આરોપીઓએ મૃતક મહિલાની રેકી કરી હતી. રેકી કર્યા બાદ લૂંટના ઇરાદે બ્યુટીપાર્લર સંચાલિકા પર હુમલો કરી હત્યા કરવામાં આવી હોવાનું સામે આવ્યું છે. બંને આરોપીઓની ધરપકડ બાદ પોલીસે સમગ્ર ઘટનાક્રમ અંગે વધુ તપાસ હાથ ધરી છે. પોલીસ તપાસમાં હત્યાના કારણ અને આરોપીઓની ભૂમિકા અંગે વધુ વિગતો સામે આવવાની શક્યતા છે.

વાવ-થરાદના લોરવાડા ગામે એક ચોંકાવનારી ઘટનાની ચર્ચા ચાલી રહી છે. ભાવાભાઈ પ્રજાપતિ નામના વૃદ્ધે ઘરના આંગણે જીવતી સમાધિ લીધી હોવાની લોકમુખે ચર્ચા છે. કથિત રીતે સમાધિ લેતા પહેલા વૃદ્ધે વીડિયો રેકોર્ડ કર્યો હોવાનો દાવો કરવામાં આવી રહ્યો છે. એકલવાયું જીવન જીવતા વૃદ્ધનો વીડિયો સોશિયલ મીડિયા પર વાયરલ થયા બાદ તેઓ જોવા મળ્યા ન હોવાનો સ્થાનિકોનો દાવો છે. છેલ્લા ચાર-પાંચ દિવસથી જીવતી સમાધિની ચર્ચાએ જોર પકડ્યું છે. જોકે, વૃદ્ધે ખરેખર સમાધિ લીધી છે કે અન્યત્ર જતા રહ્યા છે તેને લઈને અનેક તર્ક-વિતર્ક થઈ રહ્યા છે. પરિવારજનો અને સ્થાનિકોએ આ મામલે કંઈપણ કહેવાનું ટાળ્યું છે. વૃદ્ધ ક્યાં ગયા તે અંગે તપાસ કરવાની માગ ઉઠી છે. વાયરલ વીડિયો કે જીવતી સમાધિના દાવાની TV9 પુષ્ટિ કરતું નથી.

નર્મદાના ડેડિયાપાડાની મોસ્કુટ આશ્રમશાળામાં એક ચોંકાવનારી ઘટના સામે આવી છે. 9 સપ્ટેમ્બરે પ્રાર્થનાસભા દરમિયાન એક બાદ એક 11 જેટલા બાળકો અચાનક ધૂણવા લાગતા શાળામાં દોડધામ મચી ગઈ હતી. ઘટનાનો વીડિયો પણ સામે આવ્યો છે. આશ્રમશાળાના શિક્ષિકાના જણાવ્યા મુજબ, એક બાળકી પાણી પીને પરત આવી ત્યારે ધૂણતી ધૂણતી આવી હતી. ત્યારબાદ અન્ય બાળકો પણ ધૂણવા લાગ્યા હતા. શરૂઆતમાં ફૂડ પોઈઝનિંગની આશંકા વ્યક્ત કરાઈ હતી, જોકે તપાસમાં ફૂડ પોઈઝનિંગ ન હોવાનું સામે આવ્યું હતું. 108ની મદદથી બાળકોને હોસ્પિટલ ખસેડાયા હતા અને વધુ તપાસ માટે રાજપીપળા સિવિલ હોસ્પિટલ લઈ જવાયા હતા. બાળકો શારીરિક અને માનસિક રીતે સ્વસ્થ હોવાનો દાવો કરાયો છે. ઘટનાને લઈને શિક્ષકો વચ્ચેના આંતરિક વિખવાદની ચર્ચા પણ ચાલી રહી છે.

બદલાતી સામાજિક વ્યવસ્થાના કારણે પારિવારિક અણબનાવના કિસ્સાઓ વધી રહ્યા છે, ત્યારે સુરત પાટીદાર સમાજે મહત્વની પહેલ કરી છે. આવા વિવાદો કોર્ટ સુધી ન પહોંચે અને સામાજિક મધ્યસ્થીથી સુખદ સમાધાન થાય તે માટે ‘સમાધાન પંચ’ની રચના કરવામાં આવી છે. આ પંચ બંને પક્ષકારોને રૂબરૂ બોલાવી સામાજિક સ્તરે વિવાદનો ઉકેલ લાવવાનો પ્રયાસ કરશે. પંચમાં સુરતના વિવિધ વિસ્તારોમાંથી 11 જેટલા સામાજિક આગેવાનોની કમિટી બનાવવામાં આવશે. છૂટાછેડા અને મિલકત વિવાદ જેવા મામલામાં મધ્યસ્થી દ્વારા શાંતિપૂર્ણ નિરાકરણ લાવવાનો પ્રયાસ થશે. સાથે જ યુવક-યુવતીઓ પોતાના સમાજમાં લગ્ન કરે તે અંગે પણ જાગૃતિ લાવવામાં આવશે. સુરત બાદ રાજ્યના અન્ય જિલ્લાઓમાં પણ ‘સમાધાન પંચ’ બનાવવાની યોજના છે.

સુરતમાં નવરાત્રી પહેલાં સોશિયલ મીડિયા પર વાયરલ થયેલી ‘રેન્ટ અ ગરબા પાર્ટનર’ની પોસ્ટને લઈને વિવાદ સર્જાયો છે. નવરાત્રી દરમિયાન ગરબા પાર્ટનર ભાડે મેળવવાની જાહેરાત કરતી પોસ્ટ સામે હિન્દુ સંગઠનોએ વિરોધ નોંધાવ્યો છે. સંગઠનોનો આક્ષેપ છે કે આવી જાહેરાતો યુવાઓને ગેરમાર્ગે દોરવાનો પ્રયાસ છે. હિન્દુ પરિષદે વાયરલ મેસેજને સમાજ, ધર્મ અને સંસ્કૃતિ વિરુદ્ધનું કાવતરું ગણાવ્યું છે અને આવા મેસેજ ફેલાવનારા તત્વોને શોધી કડક કાર્યવાહી કરવાની માગ કરી છે. સંગઠનોએ સાયબર વિભાગને પણ કાર્યવાહી કરવા અપીલ કરી છે. સાથે જ નવરાત્રી દરમિયાન લવ જેહાદ, ડ્રગ્સ અને દારૂ જેવા દૂષણો સામે પગલાં લેવા અને યુવાધન સુરક્ષિત રહે તેવા પ્રયાસો કરવાની માગ કરી છે.

અમદાવાદમાં ગુજરાત યુનિવર્સિટીના પૂર્વ કુલપતિ નીરજા ગુપ્તા સાથે જોડાયેલા વિવાદમાં NSUIએ વિદેશ પ્રવાસ દરમિયાન થયેલી ખરીદીને લઈને વિરોધ નોંધાવ્યો છે. NSUIએ આક્ષેપ કર્યો છે કે નીરજા ગુપ્તાએ દુબઈ અને અમેરિકાના પ્રવાસ દરમિયાન કરેલી વ્યક્તિગત ખરીદીના બિલ ગુજરાત યુનિવર્સિટીમાં રજૂ કર્યા હતા. NSUIના જણાવ્યા મુજબ, સામે આવેલા બિલોમાં લિપસ્ટિક, કપડાં અને બ્યુટી પ્રોડક્ટ સહિતની વસ્તુઓની ખરીદીનો ઉલ્લેખ છે. સંગઠનનો આરોપ છે કે બ્રાન્ડેડ સ્ટોરમાંથી કરવામાં આવેલી વ્યક્તિગત ખરીદીના બિલ યુનિવર્સિટીમાં નાખવામાં આવ્યા હતા. સમગ્ર મામલે NSUIએ વિરોધ નોંધાવી જવાબદારી નક્કી કરવાની માગ કરી છે.

અમદાવાદમાં AMTSની બે બસમાં એક જ નંબરની પ્લેટ જોવા મળતા વિવાદ સર્જાયો છે. બંને બસ પર GJ 27 TJ 3550 નંબરની પ્લેટ લગાવવામાં આવી હોવાનું સામે આવ્યું છે. આ અંગે એક સ્થાનિક વ્યક્તિએ પોલીસને જાણ કરી હતી. માહિતી મળતા મેઘાણીનગર પોલીસે બંને બસની સરખી નંબર પ્લેટના મામલે તપાસ શરૂ કરી છે. પ્રાથમિક તબક્કે બંને બસ પર એક જ નંબર કેવી રીતે લગાવવામાં આવ્યો તે અંગે તપાસ હાથ ધરવામાં આવી રહી છે. RTO ટેક્સ બચાવવા માટે નંબર પ્લેટમાં ગેરરીતિ કરવામાં આવી હોવાની પણ આશંકા વ્યક્ત કરવામાં આવી રહી છે. પોલીસે સમગ્ર મામલે વધુ તપાસ હાથ ધરી છે.

ગાંધીનગર મહાનગરપાલિકાની ચૂંટણીને લઈને ભાજપે તૈયારીઓ તેજ કરી છે. ચૂંટણી માટે આજે ભાજપની મહત્વપૂર્ણ બેઠક યોજાશે. ચૂંટણી પ્રભારી અને નિરીક્ષકોની અધ્યક્ષતામાં બપોરે 2 વાગ્યાથી બેઠકનું આયોજન કરવામાં આવ્યું છે. ગાંધીનગર ભાજપ સાથે સંકળાયેલા આશરે 100 જેટલા હોદ્દેદારો સાથે બેઠકમાં સંકલન કરવામાં આવશે. મનપા ચૂંટણી માટે ઉમેદવારોની પસંદગીના ધારાધોરણો અંગે પણ ચર્ચા કરવામાં આવશે. આગામી સોમવારથી ભાજપ દ્વારા ચૂંટણીમાં દાવેદારી કરનારા ઉમેદવારોને સાંભળવાની શરૂઆત કરવામાં આવશે. બેઠક દરમિયાન ચૂંટણીલક્ષી તૈયારીઓ અને ઉમેદવારોની પસંદગી પ્રક્રિયા અંગે મહત્વના નિર્ણયો લેવાય તેવી શક્યતા છે.

રાજકોટની મારવાડી કોલેજમાં 19 વર્ષીય વિદ્યાર્થીનીએ 10મા માળેથી ઝંપલાવી આપઘાત કર્યો હોવાની ઘટના સામે આવી છે. અલ્લા વ્યંકટેશ સૌબર્નિકા નામની વિદ્યાર્થીનીના મોતથી કોલેજ કેમ્પસમાં ચકચાર મચી છે. વિદ્યાર્થીનીએ કયા કારણોસર આ પગલું ભર્યું તે અંગે હાલ કોઈ સ્પષ્ટ માહિતી સામે આવી નથી. ઘટનાની જાણ થતાં કુવાડવા પોલીસની ટીમ ઘટનાસ્થળે પહોંચી હતી. પોલીસે મૃતદેહને પોસ્ટમોર્ટમ માટે મોકલી આપ્યો છે. વિદ્યાર્થીનીના આપઘાતનું કારણ જાણવા માટે પોલીસે પરિવારજનોના નિવેદન સહિતની દિશામાં તપાસ શરૂ કરી છે. સમગ્ર મામલે વધુ તપાસ કુવાડવા પોલીસ દ્વારા હાથ ધરવામાં આવી રહી છે.

સાબરકાંઠાના હિંમતનગરમાં ટ્રેનની અડફેટે વિદ્યાર્થિનીનું મોત થતાં કરુણ ઘટના સામે આવી છે. બળવંતપુરા ફાટક પાસે આ અકસ્માત સર્જાયો હતો. મળતી માહિતી મુજબ, વિદ્યાર્થિની કોલેજ જવા માટે ઘરેથી નીકળી હતી. તે દરમિયાન બળવંતપુરા ફાટક નજીક ટ્રેનની અડફેટે આવી જતાં તેનું ઘટનાસ્થળે જ મોત થયું હતું. ઘટનાની જાણ થતાં આસપાસના લોકો એકઠા થઈ ગયા હતા અને પોલીસને જાણ કરવામાં આવી હતી. પોલીસે ઘટનાસ્થળે પહોંચી મૃતદેહને પોસ્ટમોર્ટમ માટે ખસેડી વધુ તપાસ હાથ ધરી છે. આશાસ્પદ દીકરીના અચાનક મોતથી પરિવારજનોમાં શોકનો માહોલ છવાયો છે. પરિવાર પર દુઃખનો પહાડ તૂટી પડ્યો છે.

કચ્છના ભુજના મીરજાપર ગામે વન વિભાગે મોટી કાર્યવાહી હાથ ધરી છે. ધાર્મિક સ્થળના નામે કરાયેલા ગેરકાયદે દબાણ સામે કાર્યવાહી કરી દરગાહ સહિત આસપાસના ગેરકાયદે બાંધકામો દૂર કરવામાં આવ્યા છે. ભુજ પશ્ચિમ રેન્જના જંગલ વિસ્તારમાં વન વિભાગે દબાણ હટાવવાની ડ્રાઇવ હાથ ધરી હતી. કાર્યવાહી દરમિયાન વન વિભાગની અંદાજે 3 હજાર ચોરસ મીટર જમીન દબાણમુક્ત કરાવવામાં આવી છે. વન વિભાગના જણાવ્યા મુજબ, દબાણ હટાવાયેલી જમીનની કિંમત અંદાજે રૂ.15 કરોડ છે. નોટિસની સમયમર્યાદા પૂર્ણ થયા બાદ કાર્યવાહી કરવામાં આવી હતી. પોલીસના ચુસ્ત બંદોબસ્ત વચ્ચે મીરજાપર જંગલ વિસ્તારમાં ગેરકાયદે દબાણો દૂર કરવામાં આવ્યા હતા.

જુનાગઢમાં ઝેરી દવા પી દંપતીએ આપઘાત કર્યો હોવાની ઘટના સામે આવી છે. ઝેરી દવા પી લેતા પતિ-પત્નીને સારવાર માટે તાત્કાલિક હોસ્પિટલ ખસેડવામાં આવ્યા હતા. જોકે, સારવાર દરમિયાન બંનેના મોત થયા હતા. પ્રાથમિક માહિતી મુજબ, આર્થિક સંકડામણના કારણે દંપતીએ આ પગલું ભર્યું હોવાની આશંકા છે. સાથે જ દંપતીમાંથી કોઈ એક કે બંને માનસિક બીમારીથી પીડિત હોવાની માહિતી પણ પ્રાથમિક તપાસમાં સામે આવી છે. ઘટનાની જાણ થતાં એ ડિવિઝન પોલીસ હોસ્પિટલ ખાતે પહોંચી હતી અને સમગ્ર મામલે તપાસ હાથ ધરી છે. પોલીસે દંપતીના પરિવારજનોના નિવેદન સહિત અન્ય વિગતો મેળવવા તપાસ શરૂ કરી છે.

રાજકોટ મહાનગરપાલિકામાં ડેપ્યુટી મેયરના આવાસ ફાળવણીના આક્ષેપોને લઈને રાજકારણ ગરમાયું છે. જનરલ બોર્ડની બેઠક શરૂ થાય તે પહેલાં કોંગ્રેસના કોર્પોરેટરો બેનરો સાથે મનપા કચેરીએ પહોંચ્યા હતા અને વિરોધ નોંધાવ્યો હતો. ‘આવાસના નામે ભ્રષ્ટાચાર કરવાનું બંધ કરો’ના બેનરો સાથે કોંગ્રેસે મનપાના આવાસ કૌભાંડની તપાસની માગ કરી છે. વિપક્ષે આક્ષેપ કર્યો છે કે ડેપ્યુટી મેયરને આવાસ ફાળવતી વખતે તેમની પાત્રતા ચકાસવામાં આવી નહોતી. કોંગ્રેસના જણાવ્યા મુજબ, છેલ્લા 10 વર્ષમાં થયેલી આવાસ ફાળવણીની પણ તપાસ થવી જોઈએ. વિપક્ષે દાવો કર્યો છે કે નિષ્પક્ષ તપાસ કરવામાં આવે તો 50 ટકા આવાસ મનપાના અધિકારીઓ અને નેતાઓના સગાંને ફાળવાયા હોવાનું સામે આવી શકે છે.

હાલ ગુજરાતમાં સેવા સંકલ્પ અભિયાન ચાલી રહ્યું છે, ત્યારે આ અભિયાન અંતર્ગત ગુજરાતના નાયબ મુખ્યપ્રધાન હર્ષ સંઘવીએ Gen Z સાથે સંવાદ કર્યો હતો. હર્ષ સંઘવી વડોદરાના સાવલીમાં આયોજિત કાર્યક્રમમાં પહોંચ્યા હતા. સેવા સંકલ્પ અભિયાન યાત્રા અંતર્ગત યોજાયેલા યુવા સંવાદમાં તેમણે યુવા પેઢી સાથે દિલ ખોલીને વાત કરી હતી. સંવાદ દરમિયાન તેમણે યુવાનોને સોશિયલ મીડિયાના બદલે સરકારી યોજનાઓ અને કારકિર્દીની તકો પર ધ્યાન કેન્દ્રિત કરવા જણાવ્યું હતું. આયુષ્માન ભારત, સ્ટાર્ટઅપ પ્રોત્સાહનો અને આવાસ નીતિ સહિતની યોજનાઓનો લાભ લેવા તેમજ જવાબદારી, સ્વચ્છતા અને આત્મનિર્ભરતા અપનાવવા અપીલ કરી હતી. હર્ષ સંઘવીએ કહ્યું હતું કે, “નસીબથી કંઈ મળ્યું એ માત્ર કહેવામાં જ સારું લાગે છે. જો જીવનમાં કંઈ બનવાનું સપનું જોતા હોઈએ તો તેને સાકાર કરવા પ્રયાસ પણ કરવા પડે છે.” તેમણે યુવાનોને અન્ય લોકો શું કરી રહ્યા છે તેના બદલે પોતાના સપના સાકાર કરવા પ્રયાસ કરવા જણાવ્યું હતું. સાથે જ ડ્રગ્સના દૂષણથી દૂર રહેવા અને ડ્રગ્સ મુક્ત ભારતના નિર્માણમાં સહભાગી બનવા અપીલ કરી હતી.

સુરતમાં ઘરકંકાસના કારણે પરિણીતાએ ગળેફાંસો ખાઈ જીવન ટૂંકાવ્યું હોવાની ઘટના સામે આવી છે. બે બાળકોની માતાના આપઘાતથી પરિવાર શોકમાં ગરકાવ થયો છે. મળતી માહિતી મુજબ, પતિ ઘરે મોડો આવતો હોવાથી બંને વચ્ચે અવારનવાર બોલાચાલી થતી હતી. પતિ કામના કારણે મોટાભાગે બહાર રહેતો હોવાનું પણ સામે આવ્યું છે. પરિણીતાને પતિના અન્ય કોઈ સાથે સંબંધ હોવાની શંકા હતી, એવો પરિજનોનો દાવો છે. આ મામલે ઘરકંકાસને કારણે પરિણીતાએ અંતિમ પગલું ભર્યું હોવાની આશંકા વ્યક્ત કરવામાં આવી રહી છે. ઘટનાની જાણ થતાં પોલીસે સ્થળ પર પહોંચી મૃતદેહને પોસ્ટમોર્ટમ માટે ખસેડ્યો હતો. પોલીસે સમગ્ર મામલે તપાસ હાથ ધરી છે.

અમદાવાદના ગીતા મંદિર વિસ્તારનો એક વીડિયો સોશિયલ મીડિયા પર વાયરલ થયો છે. વીડિયોમાં કેટલાક તત્વો દ્વારા ધોળા દિવસે રસ્તા પરથી પસાર થતા રાહદારીઓને રોકી તેમની તપાસ કરવામાં આવતી હોવાનું દેખાઈ રહ્યું છે. રાહદારીઓને ડરાવી-ધમકાવી રૂપિયા પડાવાતા હોવાનો પણ આરોપ લગાવવામાં આવી રહ્યો છે. જાગૃત નાગરિકે સમગ્ર ઘટનાનો વીડિયો ઉતારી સોશિયલ મીડિયા પર વાયરલ કર્યો હોવાની માહિતી છે. જોકે, TV9 ગુજરાતી વાયરલ વીડિયોની પુષ્ટિ કરતું નથી. વીડિયોમાં દેખાતા કેટલાક તત્વો સગીર હોવાનો દાવો પણ કરવામાં આવી રહ્યો છે. એક તરફ સુરક્ષિત શહેરના દાવા વચ્ચે સામે આવેલા આ દ્રશ્યોને લઈને અનેક સવાલો ઊભા થઈ રહ્યા છે.

નવસારીમાં પોલીસ જાપ્તામાંથી કેદી ફરાર થતાં પોલીસ દોડતી થઈ છે. વાંસદામાં આંગડિયા પેઢીની લૂંટના ગુનામાં ઝડપાયેલો આરોપી રાજારામ ચૌધરી ફરાર થયો છે. છેલ્લા બે દિવસથી બીમારીની ફરિયાદ બાદ આરોપીને હોસ્પિટલમાં સારવાર માટે દાખલ કરવામાં આવ્યો હતો. સારવાર પૂર્ણ થયા બાદ પોલીસ જાપ્તા હેઠળ તેને પરત લઈ જવામાં આવી રહ્યો હતો. તે દરમિયાન આરોપી પોલીસને ચકમો આપી ફરાર થઈ ગયો હતો. ઘટનાની જાણ થતાં પોલીસ તંત્રમાં દોડધામ મચી ગઈ હતી. ફરાર આરોપીને ઝડપી પાડવા પોલીસે અલગ-અલગ 10 ટીમો બનાવી શોધખોળ શરૂ કરી છે. પોલીસે આસપાસના વિસ્તારોમાં તપાસ હાથ ધરી છે.

જામનગરના રાજકોટ હાઇવે પર આવેલા શ્રીમોમાઇ ટ્રાન્સપોર્ટમાં થયેલી ઘરફોડ ચોરીનો પંચકોશી પોલીસે ભેદ ઉકેલી ત્રણ રીઢા ચોરોને ઝડપી પાડ્યા છે. પોલીસે આરોપીઓ પાસેથી રૂ.1.99 લાખનો મુદ્દામાલ રિકવર કર્યો છે. ચોરીમાં ઉપયોગમાં લેવાયેલી બે બાઇક પણ પોલીસે જપ્ત કરી છે. CCTV ફૂટેજ અને પોલીસને મળેલી બાતમીના આધારે તપાસ હાથ ધરવામાં આવી હતી. તપાસ દરમિયાન ત્રણેય આરોપીઓ સુધી પોલીસ પહોંચી હતી. પોલીસે આરોપીઓની ધરપકડ કરી તેમની પાસેથી ચોરીનો મુદ્દામાલ કબજે કર્યો છે. હાલ પોલીસે સમગ્ર મામલે વધુ તપાસ હાથ ધરી છે.

અમદાવાદના મણિનગર વિસ્તારમાં આવેલી એડ્યુનોવા સ્કૂલની આખરે માન્યતા રદ કરવામાં આવી છે. DEOની તપાસમાં શાળામાં અનેક ગેરરીતિઓ સામે આવી હતી. સપ્ટેમ્બર 2024માં DEO દ્વારા શિક્ષણ વિભાગને અહેવાલ સોંપવામાં આવ્યો હતો. જોકે, લગભગ બે વર્ષ બાદ શિક્ષણ વિભાગે કાર્યવાહી કરી શાળાની માન્યતા રદ કરવાનો નિર્ણય લીધો છે.

DEOની તપાસમાં ખુલાસો થયો હતો કે શાળા પાસે શૈક્ષણિક BU પરમિશન જ નહોતી. ઉપરાંત, શાળા દ્વારા રમતનું મેદાન દર્શાવવામાં આવ્યું હતું, પરંતુ વાસ્તવમાં શાળા પાસે પોતાનું રમતનું મેદાન ન હોવાનું પણ સામે આવ્યું હતું. સાથે જ શાળામાં JEE-NEET માટે ટ્યુશન ક્લાસ ચલાવવામાં આવતા હોવાનો ખુલાસો થયો હતો. તપાસના આધારે શિક્ષણ વિભાગે શાળાની માન્યતા રદ કરી છે.

મધ્ય પ્રદેશના નલખેડામાં બગલામુખી મંદિર પાસે ગમખ્વાર દુર્ઘટના સર્જાઈ છે. ભારે વરસાદ બાદ વરસાદી નાળામાં પાણીનો પ્રચંડ પ્રવાહ આવતા એક કાર તણાઈ ગઈ હતી. કારમાં સવાર 8 શ્રદ્ધાળુઓના મોત થયા છે, જેમાં 3 બાળકો અને 2 મહિલાઓનો સમાવેશ થાય છે.

મળતી વિગતો અનુસાર, કારમાં સવાર લોકો ઓડિશાથી ઉજ્જૈન દર્શન કરવા પહોંચ્યા હતા. ત્યારબાદ તેઓ નલખેડામાં આવેલા બગલામુખી મંદિરમાં દર્શન કરવા માટે ગયા હતા. જોકે, ગત રાત્રે ધોધમાર વરસાદ બાદ વરસાદી નાળામાં પાણીનો પ્રવાહ વધી ગયો હતો અને પાણીના જોરદાર પ્રવાહમાં કાર તણાઈ ગઈ હતી.

ઘટનાની જાણ થતાં સ્થાનિકો મદદ માટે દોડી આવ્યા હતા. તંત્રની ટીમ પણ ઘટનાસ્થળે પહોંચી હતી અને બચાવ કામગીરી હાથ ધરી હતી. દોરડાની મદદથી કારને પાણીમાંથી બહાર કાઢવામાં આવી હતી, પરંતુ કારમાં સવાર લોકોને બચાવી શકાયા નહોતા. બચાવ ટીમે કારમાંથી તમામ મૃતદેહોને બહાર કાઢી આગળની કાર્યવાહી હાથ ધરી છે.

સુરતમાં પાણીજન્ય અને મચ્છરજન્ય રોગચાળાના કેસોમાં ચિંતાજનક વધારો થયો હોવાનો સ્થાનિકોનો આક્ષેપ છે. કતારગામના ટેનામેન્ટમાં 40થી 50 જેટલા બાળકો અચાનક બીમાર પડ્યા હોવાની માહિતી સામે આવી છે. બાળકોમાં વાયરલ સહિતની બીમારીઓ સાથે ડેન્ગ્યુ અને મેલેરિયાના લક્ષણો હોવાનો દાવો કરાયો છે. બીજી તરફ, વડીલો અને યુવાનોમાં ચિકનગુનિયાના કેસો તેમજ તીવ્ર સાંધાના દુખાવાની ફરિયાદો વધી છે. વરસાદી અને ગંદા પાણીના નિકાલના અભાવથી ગંદકી અને મચ્છરોનો ઉપદ્રવ વધ્યો હોવાનું સ્થાનિકો જણાવી રહ્યા છે. સરકારી અને ખાનગી હોસ્પિટલોમાં તાવ, ઉલટી-ઉબકા અને કળતરના દર્દીઓની સંખ્યા વધતા લાંબી કતારો જોવા મળી રહી છે. પાલિકામાં ફરિયાદો છતાં કામગીરી નહીં થતાં રોષ છે.

‘ગરબા પાર્ટનર’ અને તેને ભાડે આપવાની સોશિયલ મીડિયા પર વાયરલ થયેલી પોસ્ટના મામલે સાયબર ક્રાઈમ બ્રાન્ચે તપાસ શરૂ કરી છે. પ્રાથમિક તપાસમાં પોસ્ટ શેર કરનારા લોકો અમદાવાદ, મુંબઈ અને સુરતના હોવાનું સામે આવ્યું છે. આ લોકો પોતાના ફોટા સાથે ‘ગરબા પાર્ટનર’ની પોસ્ટ સોશિયલ મીડિયા પર શેર કરી રહ્યા હોવાનું પણ તપાસમાં સામે આવ્યું છે. સાયબર ક્રાઈમ બ્રાન્ચ દ્વારા વાયરલ પોસ્ટની પાછળ કોણ છે અને તેનો હેતુ શું છે તે અંગે તપાસ કરવામાં આવી રહી છે. જોકે, હાલ સુધી આ મામલે કોઈ છેતરપિંડી થઈ હોવાની ફરિયાદ પોલીસને મળી નથી. સમગ્ર મામલે સાયબર ક્રાઈમ બ્રાન્ચ વધુ તપાસ કરી રહી છે.