15 નવેમ્બરના મહત્વના સમાચાર : અમદાવાદની હવા બની ઝેરીલી, અનેક વિસ્તારોમાં AQI 300ને પાર, સૌથી વધુ ચાંદખેડામાં 324 AQI નોંધાયો

અમદાવાદના જુહાપુરા વિસ્તારમાં રહેણાક મકાનમાં ચાલતી ડ્રગ્સ ફેક્ટરીનો NCBએ પર્દાફાશ કર્યો છે. મોહમ્મદી પાર્ક વિસ્તારમાં આવેલા લબ્બૈક પાર્ક-2 સોસાયટીના એક ભાડાના મકાનમાં MD ડ્રગ્સ બનાવવામાં આવતું હોવાનો ખુલાસો થયો છે. NCBના નવા ઝોનલ ડાયરેક્ટર અને તેમની ટીમે દરોડા પાડીને આ કાર્યવાહી કરી હતી. તપાસ દરમિયાન મકાનમાંથી ડ્રગ્સ બનાવવા માટેનું મટિરિયલ સહિતની વિવિધ વસ્તુઓ મળી આવી છે. મકાનની બહાર એમ.એમ. પઠાણ નામનું બોર્ડ પણ લગાવેલું હતું. આ કેસમાં મધ્યપ્રદેશના મંદસૌરનું નેટવર્ક સામે આવ્યું છે. હવે આરોપીની કોફી શોપ પર પણ સઘન તપાસ કરવામાં આવશે.

મહેસાણામાં ST બસના ડ્રાઈવરની ગંભીર બેદરકારી સામે આવી છે. આદીવાડા ગામ નજીક નશાની હાલતમાં બસ ચલાવતા ડ્રાઈવરે સ્ટિયરિંગ પરથી કાબૂ ગુમાવ્યો હતો. જેના કારણે બસ રોડની સાઈડમાં નીચે ઉતરી ગઈ હતી. ઘટના બાદ તપાસ કરતાં ડ્રાઈવર નશાયુક્ત હાલતમાં હોવાનું સામે આવ્યું હતું. જોકે, પોલીસ ઘટનાસ્થળે પહોંચે તે પહેલાં જ ચાલક ફરાર થઈ ગયો હતો. સમગ્ર મામલે ST તંત્ર દ્વારા કાર્યવાહી કરવામાં આવી છે. નશાની હાલતમાં બસ ચલાવનાર ડ્રાઈવર ભરતદાન ગઢવીને સસ્પેન્ડ કરવામાં આવ્યા છે. આ ઘટનાને પગલે ST બસના મુસાફરોની સુરક્ષાને લઈને સવાલો ઊભા થયા છે.

અરવલ્લીના માલપુરના ગોવિંદપુર ગામે જમીન વિવાદમાં મારામારીની ઘટના સામે આવી છે. ખેતર ખેડવાની ના પાડતા બે શખ્સોએ ખેડૂત પર હુમલો કર્યો હોવાનો આક્ષેપ છે. હુમલાખોરોએ ખેડૂતને ગડદાપાટુનો માર માર્યો હતો અને દાતરડાથી હુમલો કર્યો હતો. જેમાં ખેડૂતના ડાબા હાથના કાંડાના ભાગે ઈજા પહોંચી છે. ઈજાગ્રસ્ત ખેડૂતને સારવાર માટે મોડાસાની સાર્વજનિક હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે. બીજી તરફ, સમગ્ર મામલે પુત્રની ફરિયાદના આધારે એક મહિલા અને એક પુરુષ સામે ગુનો નોંધાયો છે. ખેતરમાં થયેલી મારામારીના વીડિયો પણ સામે આવ્યા છે.