‘સરકાર’ ખેડૂતોનું લોહી ચૂસી રહી છે! બટાકાના ભાવ ‘ના’ આપ્યા ને ખાતરમાં ₹500 વધારી દીધા… આ કેવો વિકાસ?

બનાસકાંઠાના ખેડૂતો NPK ખાતરના ભાવમાં થયેલા ₹500ના વધારાથી ભારે રોષે ભરાયા છે. જિલ્લામાં પહેલેથી જ વરસાદની અછત અને દુષ્કાળ જેવી પરિસ્થિતિ પ્રવર્તી રહી છે, ત્યારે ખાતરના ભાવ વધારાએ ખેડૂતોની મુશ્કેલીઓમાં વધારો કર્યો છે. આ ભાવ વધારાને કારણે બટાકા, પપૈયા અને રાઈ જેવા પાકોના ઉત્પાદન પર વિપરીત અસર થવાની ભીતિ સેવાઈ રહી છે.

ખેડૂતોને ‘પડ્યા પર પાટુ’

ગયા વર્ષે પણ બટાકાના પૂરતા ભાવ ન મળવાને કારણે ખેડૂતોને મોટું નુકસાન ભોગવવું પડ્યું હતું. કોલ્ડ સ્ટોરેજમાં હજુ પણ બટાકાનો મોટો જથ્થો પડ્યો છે. ચાલુ વર્ષે વરસાદની ઘટને કારણે ચોમાસુ પાક પણ સંતોષકારક રીતે લઈ શકાયો નથી. ખેડૂતો માટે પડ્યા પર પાટુ જેવી સ્થિતિ સર્જાઈ છે.

NPK ખાતર બટાકાના પાક માટે અત્યંત આવશ્યક હોવાથી, તેના ભાવ વધારાથી ખેડૂતો ફરી પાયમાલ થવાની આશંકા વ્યક્ત કરી રહ્યા છે. બનાસકાંઠાના ખેડૂતો હવે સરકાર પાસે આ વિસ્તારને દુષ્કાળગ્રસ્ત જાહેર કરીને તાત્કાલિક સહાય આપવાની માંગ કરી રહ્યા છે.

ખેડૂતો રસ્તા પર

ખેડૂતોની આર્થિક સ્થિતિ એટલી કફોડી બની ગઈ છે કે, આગામી દિવાળીનો તહેવાર કેવી રીતે ઉજવવો તેની પણ તેમને ચિંતા સતાવી રહી છે. આ સ્થિતિમાં શિયાળુ અને ઉનાળુ પાક લેવાની શક્યતાઓ પણ ઓછી દેખાઈ રહી છે.

ખેતીની સાથે પશુપાલન પર પણ નિર્ભર રહેતા ખેડૂતો માટે ઢોરઢાંખરને કેવી રીતે જીવાડવા, તે મોટો પ્રશ્ન બની ગયો છે. બીજું કે, પીવાના પાણીની પણ અછત વર્તાઈ રહી છે.

‘સરકાર’ ખેડૂતોને આર્થિક સંકટમાંથી બહાર કાઢે

વરસાદની અછતને કારણે ખેડૂતોની કમર તૂટી ગઈ છે. ખેડૂતો નિસહાય બની ગયા છે અને સરકાર સમક્ષ એકમાત્ર માંગણી કરી રહ્યા છે. તેમની માંગ છે કે, બનાસકાંઠા જિલ્લાને તાત્કાલિક દુષ્કાળગ્રસ્ત જાહેર કરવામાં આવે અને ખેડૂતોને આ આર્થિક સંકટમાંથી બહાર કાઢવા માટે યોગ્ય પેકેજ અને વળતર આપવામાં આવે.

જો સરકાર દ્વારા આ બાબતે કોઈ નક્કર પગલાં લેવામાં નહીં આવે, તો આ વર્ષે ખેડૂતોની સ્થિતિ અત્યંત ગંભીર બની જશે તેવી આશંકા વ્યક્ત કરવામાં આવી રહી છે.

Breaking News : ગુજરાતના ખેડૂતો વીજકાપ અને સિંચાઈ સમસ્યાઓથી પરેશાન, કિસાન સંઘે સરકારને ઘેરી