પાટણ ચાણસ્મા ઝીલિયા રોડ પર ગેંગવોરની ઘટનામાં સામે આવી છે. આ ઘટના 15 માર્ચની હોવાનું સામે આવ્યું છે. ભાવેશ દેસાઈ નામના શખ્સે પોલીસમાં ફોન કરીને કહ્યું હતું કે કેટલાંક શખ્સો તેના ફાર્મ હાઉસ પર હુમલો કરવા આવવાના છે. જેને પગલે 112ની વાન ઘટનાસ્થળે પહોંચી હતી. અને સાથે જ એક બીજી પોલીસ વાન પણ બંદોબસ્તમાં આવી હતી. પોલીસ પહોંચ્યાની પંદરેક મિનિટ બાદ 6 જેટલી ગાડીઓમાં બેફામ તત્વો ઉમટી પડ્યા હતા. અને પોલીસ વાન પર જ પથ્થરમારો કર્યો હતો.

પાટણના ચાણસ્મા ખાતે ગેંગવોરની ઘટના

સમગ્ર ઘટનામાં ચાણસ્મા પોલીસે ફરિયાદ નોંધાવી હતી. પોલીસ વાન પર બેફામ તત્વોએ પથ્થરમારો કર્યો હોવાની ફરિયાદ દાખલ થઈ હતી. જેમાં 20 જેટલા શખ્સો વિરુદ્ધ પોલીસે ફરિયાદ નોંધાવી છે.

ઘટના CCTVમાં કેદ

સમગ્ર ઘટનાક્રમ CCTVમાં કેદ થઈ છે. અને આખીયે ઘટના કાયદો-વ્યવસ્થા સામે સવાલ ઊઠાવી રહી છે. પાટણ જિલ્લામાં બેફામ તત્વોને જાણે પોલીસનો કોઈ ડર જ ન હોય તેવો ઘાટ સર્જાયો છે. થોડા દિવસ પહેલાં જ પાટણ શહેરમાં અંગત અદાવતમાં એક શખ્સને ધોળા દિવસે ગોળી મારી મોતને ઘાટ ઉતારી દેવાયો. અને હવે ચાણસ્મા વિસ્તારમાં ગેંગવોરના દ્રશ્યોથી અનેક સવાલ ઊઠી રહ્યા છે. ખંડણીખોર ગેંગના ઈસમો સરા જાહેર આતંક મચાવતા કેમેરામાં કેદ થયા છે. અને ઉપરથી ઘટનાસ્થળે પહોંચેલી પોલીસ આરોપીઓને ઝડપવાને બદલે ખુદ ત્યાંથી ભાગી ગઈ હતી.

8 પોલીસકર્મી સસ્પેન્ડ

જે બાદ શહેરમાં સામાન્ય માણસોની સુરક્ષા અંગે પણ સવાલ ઉભા થયા છે. જો કે પોલીસનો દાવો છે કે પોલીસ વધુ ફોર્સ સાથે પરત ફરી હતી. અને આતંક મચાવનારાઓને ઝડપ્યા પણ હતા. ઝીલિયા ગામે રામાપીરના મંદિરનું નિર્માણ થવાનું છે. અને તે જ મુદ્દે ફરિયાદી અને આરોપી વચ્ચે બબાલ થયાનો ખુલાસો થયો છે.

આ સમગ્ર મામલે 1 PI, 1 ASI અને હેડ કોન્સ્ટેબલ સસ્પેન્ડ કરવામાં આવ્યા છે. પાંચ GRD જવાનની કરાઇ હકાલપટ્ટી કરવામાં આવી છે. આમ કુલ 8 પોલીસકર્મીઓને તાત્કાલિક અસરથી સસ્પેન્ડ કરવામાં આવ્યા છે.

(ઈનપુટ ક્રેડિટ-સુનિલ પટેલ)

Breaking News : અમદાવાદની શાળાઓને ફરી એકવાર બોમ્બથી ઉડાવી દેવાની ધમકી, આ સ્ટોરી વાંચવા અહીં ક્લિક કરો