Breaking News : તંત્રની બેદરકારી જ કહેવાય ને..! અંકલેશ્વરમાં 30 વર્ષ જૂની પાણીની ટાંકી ધરાશાયી, જુઓ Video
ભરૂચના અંકલેશ્વરના ભડકોદરામાં 30 વર્ષ જૂની પાણીની ટાંકી ધરાશાયી થતાં તંત્રની ગંભીર બેદરકારી સામે આવી છે. સ્થાનિકોએ અગાઉ રજૂઆત કરી હોવા છતાં પગલાં લેવાયા નહોતા, જેને કારણે હવે ભ્રષ્ટાચારના આક્ષેપો સાથે 300થી વધુ ઘરો પાણીની સમસ્યાનો સામનો કરી રહ્યા છે.
ભરૂચ જિલ્લાના અંકલેશ્વરમાં એક મોટી દુર્ઘટના સર્જાઈ છે, જ્યાં 7 જૂનના રોજ ભડકોદરા વિસ્તારમાં આવેલી 30 વર્ષ જૂની પાણીની ટાંકી અચાનક ધરાશાયી થઈ ગઈ હતી. આ ઘટનામાં સદનસીબે કોઈ જાનહાનિ થઈ ન હતી, પરંતુ તેણે સ્થાનિક તંત્રની કામગીરી અને જવાબદારી પર ગંભીર સવાલો ઊભા કર્યા છે. આ ટાંકી “પત્તાના મહેલની જેમ” તૂટી પડતા સ્થાનિકોમાં ભય અને રોષનો માહોલ છે.
આ દુર્ઘટના પાછળ તંત્રની ગંભીર બેદરકારી હોવાના આક્ષેપો થઈ રહ્યા છે. સ્થાનિક રહીશોએ જણાવ્યું હતું કે, વર્ષ 2023માં જ તેમણે પંચાયતમાં લેખિત રજૂઆત કરીને આ જર્જરિત અને જોખમી ટાંકીને ઉતારી લેવાની માંગ કરી હતી. તેમ છતાં પંચાયતે આ રજૂઆતને અવગણી હતી અને ટાંકી સોસાયટીની ખાનગી માલિકીની હોવાનું કારણ ધરીને પોતાની જવાબદારીમાંથી હાથ ખંખેરી લીધા હતા. આક્ષેપ એ પણ છે કે નવી ટાંકી મંજૂર થયા બાદ પણ જૂની અને જોખમી ટાંકીને દૂર કરવાને બદલે માત્ર ઉપરછલ્લું સમારકામ કરવામાં આવ્યું હતું, જે આખરે ટાંકીના પતનનું કારણ બન્યું.
એક સ્થાનિક નાગરિકે ઘટના અંગે માહિતી આપતા જણાવ્યું હતું કે, “દુખદ વાત એ છે કે એની અંદર પાણી ભરી અને આ પંચાયત દ્વારા એનું સમારકામ કરી રહ્યા હતા. ત્યારે ત્યાં એક બાઈ એ મોટર ચાલુ કરીને પાણી ભરતા હતા. એમના ત્યાંથી મોટર ચાલુ કરીને હટવાથી તરત જ એ ટાંકી ધરાશય થઈ ગઈ છે.” આ ઘટના દર્શાવે છે કે દુર્ઘટના કેટલા નજીકના અંતરેથી ટળી હતી અને થોડી ગફલત મોટી જાનહાનિ નોતરી શકી હોત.
આ સમગ્ર મામલે હવે ભ્રષ્ટાચારના ગંભીર આક્ષેપો કરવામાં આવી રહ્યા છે. સ્થાનિકો અને પ્રજાના પ્રતિનિધિઓ માંગ કરી રહ્યા છે કે ટાંકીના નિર્માણ, જાળવણી અને સમારકામની કામગીરીમાં જેટલા પણ અધિકારીઓ અને નેતાઓ સંડોવાયેલા છે, તેમની સામે કડક અને તાત્કાલિક કાર્યવાહી કરવામાં આવે. તેમની માંગ છે કે આવા જવાબદાર લોકોને જેલના સળિયા પાછળ ધકેલવામાં આવે, જેથી ભવિષ્યમાં આવી બેદરકારી અને ભ્રષ્ટાચારને રોકી શકાય.
ટાંકી તૂટી પડવાના કારણે હવે 300થી વધુ મકાનોના રહીશો પાણીની ગંભીર સમસ્યાનો સામનો કરી રહ્યા છે. દૈનિક જરૂરિયાત માટે પાણી મેળવવામાં તેમને હાલાકી ભોગવવી પડી રહી છે. જોકે, પંચાયત દ્વારા બોરવેલ અને ટેન્કર મારફતે પાણી પહોંચાડીને સમસ્યા હળવી કરવાના દાવા કરવામાં આવી રહ્યા છે.
જોકે, આ કામગીરી કેટલી અસરકારક છે તે સમય જ કહેશે. ટાંકીને ટકાવી રાખવા માટે પંચાયત દ્વારા “સાવચેતીના પગલા રૂપે જર્જરિત કામને સમારકામ ચાલુ રાખવામાં આવેલો” હોવાનો પણ ઉલ્લેખ થયો હતો. હવે, બોરમાંથી ડાયરેક્ટ કનેક્શન આપીને પાણીની સુવિધા પૂરી પાડવાની વ્યવસ્થા કરવામાં આવી રહી છે. આ ઘટના સ્થાનિક માળખાકીય સુવિધાઓની જાળવણી અને તંત્રની જવાબદેહી અંગે પુનર્વિચાર કરવા મજબૂર કરે છે.
ભૂતિયા ડિમોલિશનને લઈને મોટા સમાચાર ! ડિમોલિશન ભૂતિયા નહીં હોવાનો કોર્પોરેશનનો દાવો
