Breaking News : આણંદના વાસદમાં બાળકીનું અપહરણ બાદ રેલવે ટ્રેક પરથી મૃતદેહ મળતા ચકચાર, અનેક ટીમો તપાસમાં જોડાઈ
આણંદના વાસદમાં સાડા ચાર વર્ષની બાળકીનું અપહરણ થયા બાદ તેનો મૃતદેહ રેલવે ટ્રેક પરથી મળી આવતા ચકચાર મચી છે. સીસીટીવી ફૂટેજમાં એક અજાણ્યો યુવક બાળકીને લઈ જતો દેખાયો હતો.
આણંદ જિલ્લાના વાસદમાં સાડા ચાર વર્ષની બાળકીનું અપહરણ થયા બાદ તેનો મૃતદેહ રેલવે ટ્રેક પરથી મળતા સમગ્ર વિસ્તારમાં ભારે ચકચાર મચી ગઈ છે. પ્રાથમિક માહિતી મુજબ, બાળકીનો મૃતદેહ ટ્રેન નીચે કપાયેલી હાલતમાં મળી આવ્યો હતો. ઘટનાની ગંભીરતાને ધ્યાનમાં રાખીને રેલવે પોલીસ અને સ્થાનિક પોલીસ દ્વારા તપાસનો ધમધમાટ શરૂ કરવામાં આવ્યો છે.
મળતી માહિતી અનુસાર, વાસદ રેલવે સ્ટેશન નજીક રહેતા એક પરિવારની સાડા ચાર વર્ષની બાળકીનું મંગળવારે રાત્રે આશરે 8:30થી 9:15 વાગ્યાના સમયગાળા દરમિયાન અપહરણ કરવામાં આવ્યું હતું. પોલીસના જણાવ્યા પ્રમાણે, અંદાજે 25થી 30 વર્ષનો એક યુવક બાળકીને પોતાની સાથે લઈ જતો સીસીટીવી કેમેરામાં કેદ થયો છે. અપહરણ બાદ યુવક સ્થળ પરથી ફરાર થઈ ગયો હતો.
બુધવારે વહેલી સવારે વાસદ અને અડાસ રેલવે સ્ટેશન વચ્ચેના ટ્રેક પરથી બાળકીનો મૃતદેહ મળી આવ્યો હતો. મૃતદેહ ટ્રેનની અડફેટે આવ્યો હોવાનું પ્રાથમિક રીતે સામે આવ્યું છે, પરંતુ સમગ્ર ઘટનાની હકીકત જાણવા માટે પોલીસે તમામ પાસાઓની તપાસ શરૂ કરી છે.
ઘટનાની જાણ થતાં જ વડોદરા રેલવે પોલીસ એક્શન મોડમાં આવી ગઈ હતી. એલસીબી, એસઓજી સહિત પાંચથી વધુ ટીમોને આરોપીની શોધખોળ માટે તૈનાત કરવામાં આવી છે. આણંદ પોલીસની એસઓજી અને એલસીબીની ટીમો તેમજ વાસદ પોલીસ પણ તપાસમાં જોડાઈ છે. પોલીસ સીસીટીવી ફૂટેજના આધારે આરોપીની ઓળખ અને તેની હિલચાલ અંગે માહિતી એકત્ર કરી રહી છે.
પોલીસનું કહેવું છે કે બાળકીનું અપહરણ કર્યા બાદ તેની સાથે અન્ય કોઈ ગુનો આચરવામાં આવ્યો હતો કે નહીં તે અંગે પણ તપાસ ચાલી રહી છે. મૃતદેહનું ફોરેન્સિક પોસ્ટમોર્ટમ કરાવવામાં આવશે, જેના આધારે મોતનું ચોક્કસ કારણ અને અન્ય મહત્વપૂર્ણ વિગતો સામે આવી શકશે.
Anand Horror: Little Girl Kidnapped & Killed Near Vasad Railway Station | TV9Gujarati#AnandCrime #VasadRailwayStation #ChildMurder #GirlAbduction #AnandNews #RailwayTrackDeath #ChildSafety #GujaratCrime #MissingGirl #TV9Gujarati pic.twitter.com/ltuDgBAHJi
— Tv9 Gujarati (@tv9gujarati) July 19, 2026
પોલીસ અધિકારીએ જણાવ્યું હતું કે રેલવે પ્લેટફોર્મ પર બે બાળકીઓ સૂઈ રહી હતી. તે દરમિયાન એક અજાણ્યો વ્યક્તિ ત્યાં આવ્યો અને સાડા ચાર વર્ષની બાળકીનું અપહરણ કરીને લઈ ગયો. ત્યારબાદ બીજા દિવસે સવારે પ્લેટફોર્મના અંત નજીક ટ્રેક પરથી બાળકીનો મૃતદેહ મળી આવ્યો હતો.
હાલ સમગ્ર મામલે અપહરણ, મોત અને તેના પાછળના કારણો અંગે પોલીસ દ્વારા સઘન તપાસ હાથ ધરવામાં આવી છે. આરોપીને ઝડપી પાડવા માટે વિવિધ ટીમો સતત કાર્યવાહી કરી રહી છે. મૃતક બાળકી સાથે અન્ય કોઈ ગંભીર ઘટના બની હતી કે નહીં તે અંગેનો ખુલાસો પોસ્ટમોર્ટમ રિપોર્ટ અને તપાસ પૂર્ણ થયા બાદ જ થઈ શકશે.
શ્વેતા રાઠવા અને જાહ્નવી પટેલ બની સર્ટિફાઇડ પેરાગ્લાઈડિંગ પાયલોટ, જુઓ Video
