Breaking News: શું Oscar જીતશે મરાઠી થ્રિલર ‘ગોંધલ’? ભારત તરફથી ઓસ્કાર 2027 ની ઓફિશિયલ રેસમાં થઈ એન્ટ્રી
મરાઠી સાયકોલોજીકલ થ્રિલર ફિલ્મ 'ગોંધલ' ને ઓસ્કાર 2027 માટે ભારતની સત્તાવાર એન્ટ્રી તરીકે પસંદ કરવામાં આવી છે. સંતોષ ડાવખરના નિર્દેશનમાં બનેલી આ ફિલ્મ અગાઉ પણ કેટલાય ફિલ્મ ફેસ્ટિવલમાં દર્શાવવામાં આવી છે. 14 નવેમ્બર 2025ના રોજ રિલીઝ થયેલી આ સાયકોલોજીકલ થ્રિલર ફિલ્મને IFFI માં બેસ્ટ ડાયરેક્ટરનો એવોર્ડ પણ મળી ચૂક્યો છે.
મરાઠી સાયકોલોજીકલ થ્રિલર ફિલ્મ ગોંધલ (Gondhal) ને લઈને મોટા સમાચાર સામે આવ્યા છે. રિપોર્ટ્સ અનુસાર, આ ફિલ્મને ઓસ્કાર 2027 (Oscar 2027) માટે ભારતની સત્તાવાર એન્ટ્રી તરીકે પસંદ કરવામાં આવી છે. સંતોષ ડાવખરના નિર્દેશનમાં બનેલી આ ફિલ્મ પોતાની અલગ વાર્તાને કારણે પહેલાથી જ ચર્ચામાં રહી છે.
‘ગોંધલ’ કેટલાય ફિલ્મ ફેસ્ટિવલમાં દર્શાવવામાં આવી ચૂકી છે અને ત્યાં તેને દર્શકો તથા જૂરી તરફથી સારો પ્રતિસાદ મળ્યો છે. ફિલ્મને અલગ-અલગ એવોર્ડ પણ મળી ચૂક્યા છે. હવે ઓસ્કારમાં પહોંચવાના આ સમાચારે મરાઠી ફિલ્મ ઈન્ડસ્ટ્રીમાં ઉત્સાહ વધારી દીધો છે.
Gondhal has been selected as India’s official entry for the 2027 Oscars.. pic.twitter.com/vqeWi3fgYH
— RVCJ Media (@RVCJ_FB) September 18, 2026
સંતોષ ડાવખરે કર્યું છે ‘નિર્દેશન’
ઓસ્કારની રેસમાં પહોંચતા પહેલા ‘ગોંધલ’ ઘણા મોટા ફિલ્મ ફેસ્ટિવલમાં પ્રશંસા મેળવી ચૂકી છે. 56મા ઈન્ટરનેશનલ ફિલ્મ ફેસ્ટિવલ ઓફ ઈન્ડિયા (IFFI) માં સંતોષ ડાવખરને ફિલ્મ માટે સિલ્વર પીકોક બેસ્ટ ડાયરેક્ટર એવોર્ડ મળ્યો હતો. IFFI જૂરીએ ફિલ્મની વાર્તા અને નિર્દેશનની પણ પ્રશંસા કરી હતી.
મરાઠી ફિલ્મ ‘ગોંધલ’ સિનેમાઘરોમાં 14 નવેમ્બર 2025ના રોજ રિલીઝ થઈ હતી. ગોંધલનું લેખન અને નિર્દેશન સંતોષ ડાવખરે કર્યું છે. ફિલ્મમાં કિશોર કદમ, ઈશિતા દેશમુખ, યોગેશ સોહની અને નિષાદ ભોઈર જેવા કલાકારો મુખ્ય ભૂમિકામાં છે.
Marathi film #Gondhal (2025) directed by #SantoshDavakhar is India’s official submission for the 99th Academy Awards (Oscars 2027).
Featuring Kishor Kadam, Ishita Deshmukh, Yogesh Sohoni, Nishad Bhoir, Suresh Vishwakarma, and Anuj Prabhu. pic.twitter.com/JM9XxYA8G5
— CinemaRare (@CinemaRareIN) September 18, 2026
શું છે ‘ગોંધલ’ની વાર્તા?
ફિલ્મ ‘ગોંધલ’ની વાર્તા મહારાષ્ટ્રની જૂની લોકકળા અને ધાર્મિક વિધિ ગોંધલની આસપાસ વણાયેલી છે. ફિલ્મમાં આ પરંપરાને વાર્તાનો મહત્વનો હિસ્સો બનાવવામાં આવ્યો છે. મૂવીની વાર્તા સુમન નામની એક મહિલાની છે, જેના લગ્ન એક અમીર પરિવારમાં થાય છે.
લગ્ન પછી તેની જિંદગી કંઈક એવી થઈ જાય છે કે, તે અંદરથી પરેશાન રહેવા લાગે છે. આ દરમિયાન તેની મુલાકાત સાહેબ નામના ગોંધલ કલાકાર સાથે થાય છે અને બંને એકબીજાની નજીક આવવા લાગે છે. આ પછી સુમન પોતાની જિંદગી બદલવા માટે એક મોટો અને ખતરનાક નિર્ણય લે છે. ત્યારબાદ ગોંધલની રાત્રે કેટલીક એવી ઘટનાઓ બને છે, જે આખી વાર્તાને એક નવો વળાંક આપી દે છે.
