અમદાવાદ : નશાના ઉપયોગમાં લેવાતી કફ સિરપની 200 બોટલો સાથે બે આરોપીની ધરપકડ
અમદાવાદની SOG ક્રાઇમની ટીમે દાણીલીમડા વિસ્તારમાંથી નશાના ઉપયોગમાં લેવાતી કફ સિરપની 200 બોટલો સાથે બે આરોપીની ધરપકડ કરી
અમદાવાદ : રાજ્યભરમાં ગેરકાયદેસર રીતે નશાકારક પદાર્થોનું વેચાણ વધી રહ્યું છે. ત્યારે પોલીસે (Police) પણ આવા શખ્સોની સામે સખત કાર્યવાહી કરી એક બાદ એક આરોપીઓને પકડી રહી છે. ત્યારે નશાના કારોબાર (drug business)સાથે જોડાયેલા વધુ બે આરોપીઓ પોલીસે પકડી પાડયા છે. પોલીસ કસ્ટડીમાં રહેલા આ બંને આરોપીઓ પર નશાના ઉપયોગમાં લેવાતી કફ સિરપની (Cuff syrup)બોટલો હેરાફેરી કરવાનો આરોપ લાગ્યો છે. અમદાવાદમાં અલગ અલગ જગ્યાએ આવી કફ સીરપ ગેરકાયદેસર રીતે વેચાણ કરતા હતા. પકડાયેલા આરોપીઓનું નામ છે આરીફ બેગ મિર્ઝા અને યાસીન ઉર્ફે ઘાંચી શેખ. છેલ્લા થોડા સમયથી બહેરામપુરા અને જમાલપુર વિસ્તારમાં ગેરકાયદેસર રીતે કોડિન કન્ટેન્ટ ધરાવતી સિરપને ડોક્ટરની પરમીશન વગર જ ગેરકાયદેસર રીતે વેચતા હતા. આ અંગે પોલીસને ચોક્કસ માહિતી મળતા પોલીસે દાણીલીમડા લાલજી પરમાર હોલના ત્રણ રસ્તા પાસેથી આ બન્ને શખ્સોને અટકાવતા તેમની પાસેથી 200 નંગ જેટલી કફ સિરપની બોટલ મળી આવી હતી.
મહત્વનું છે કે પકડાયેલા બંને આરોપીઓની પ્રાથમિક પૂછપરછ કરતા સામે આવ્યુ કે છેલ્લા 6 માસથી ગેરકાયદેસર રીતે સફી નામનો વ્યક્તિ આરોપીઓને આ કફ સીરપનો જથ્થો પૂરો પાડતો હતો. જેને પગલે પોલીસે કફ સિરપની બોટલો અને રિક્ષા કબજે કરી કાયદેસર કાર્યવાહી હાથ ધરી છે. જોકે પકડાયેલા આરોપીઓમાં યાસીન ઉર્ફે ઘાંચી શેખ વિરુદ્ધ અગાઉ પણ દાણીલીમડા પોલીસ સ્ટેશન હત્યાના પ્રયાસનો ગુનો નોંધાયો છે. અને ગેરકાયદેસર પ્રવૃત્તિના કારણે બે વખત યાસીનને તડીપાર પણ કરવામાં આવ્યો હતો.
પ્રાથમિક તબક્કે આ કેસમાં સફી નામના વ્યક્તિનું નામ સામે આવ્યું છે. પરંતુ સવાલ એ થાય છે કે સફી મારફતે જ અમદાવાદમાં ગેરકાયદેસર રીતે કફ સીરપનો વેપલો ચાલતો હતો ? કે કોઈ ડ્રગ ફાર્માસ્યુટિકલ કંપની પણ તેના ગેરકાયદેસર વેચાણ માટે જવાબદાર છે. જોકે આ તમામ સવાલોના જવાબ પોલીસ પૂછપરછના અંતે અને આરોપી સફીની ધરપકડ બાદ સામે આવી શકે તેમ છે. ત્યારે જોવાનું એ રહ્યું કે પોલીસ આ કેસમાં કેટલી ઊંડાણમાં ઉતરી તપાસ કરે છે.