રોડ પ્રોજેક્ટ માટે નાના રોકાણકારો પાસેથી પૈસા એકત્ર કરશે સરકાર, મળશે બેંકની એફડીથી વધારે રીટર્ન

ટૂંક સમયમાં નાના રોકાણકારોને વધુ સારું વળતર મેળવવા માટે બીજો વિકલ્પ મળવા જઈ રહ્યો છે. કેન્દ્રીય મંત્રી નીતિન ગડકરીએ આજે ​​માહિતી આપી છે કે સરકાર પાસે રોડ પ્રોજેક્ટ (Road Project) માટે વિદેશી રોકાણકારો પાસેથી નાણાં એકત્ર કરવાની કોઈ યોજના નથી. તેઓ ઇચ્છે છે કે નાના રોકાણકારોને રોડ પ્રોજેક્ટ્સમાં વૃદ્ધિનો લાભ મળવો જોઈએ, તેથી આગામી સમયમાં સરકાર નાના રોકાણકારો પાસેથી નાણાં એકત્ર કરશે અને તેના બદલામાં તેમને 8 ટકા વાર્ષિક વળતર મળશે. જે કોઈપણ બેંક એફડી કરતા વધુ સારું વળતર છે. નીતિન ગડકરીએ માહિતી આપી હતી કે નાના રોકાણકારો પાસેથી નાણાં એકત્ર કરવાનો પ્રસ્તાવ સેબીને મોકલવામાં આવ્યો છે અને તેને મંજૂરી મળતાં જ તેના પર કામ શરૂ કરવામાં આવશે.

શું છે સરકારની યોજના

મહારાષ્ટ્ર ચેમ્બર ઓફ કોમર્સ, ઇન્ડસ્ટ્રી એન્ડ એગ્રીકલ્ચર દ્વારા આયોજિત એક કાર્યક્રમને સંબોધતા ગડકરીએ કહ્યું કે તેઓ અમીરોને વધુ અમીર બનાવવા માંગતા નથી. તેઓ ખેડૂતો, સામાન્ય લોકો અને સરકારી કર્મચારીઓ પાસેથી વધુ સારા વળતર સાથે નાણાં એકત્રિત કરવા માંગે છે.

ગડકરીએ કહ્યું કે આ સ્કીમમાં દરેક નાના રોકાણકાર પાસેથી 1 લાખ રૂપિયાનું લઘુત્તમ રોકાણ લેવામાં આવશે, જે ચોક્કસ રોડ પ્રોજેક્ટ માટે હશે. બેંક ડીપોઝીટ પર કમાણી 4.5-5 ટકાની તુલનામાં સોવરેન ગેરંટી સાથે 8 ટકા પ્રતિવર્ષ રીટર્ન પર રોકાણની રકમ પરત કરવામાં આવશે. ગડકરીએ કહ્યું કે રોકાણની દરખાસ્ત મૂડી બજારના નિયમનકાર સેબીને મોકલવામાં આવી છે અને મંજૂરી મળ્યા બાદ તેને શરૂ કરવામાં આવશે.

વિદેશી રોકાણકારો પાસેથી નાણાં એકત્ર કરવાની કોઈ યોજના નથી

તેમણે કહ્યું કે છેલ્લા કેટલાક વર્ષોમાં ઘણા મોટા વિદેશી રોકાણકારોએ ભારતમાં તેમનું રોકાણ કર્યું છે, પરંતુ હવે જરૂરી છે કે આપણે આપણા પ્રોજેક્ટ્સ માટે જાતે જ ભંડોળ એકત્ર કરીએ. એક ઉદાહરણ યાદ કરતાં તેમણે કહ્યું કે થોડાં વર્ષો પહેલાં એક વિદેશી રોકાણકારે રૂ. 1,500 કરોડના મસાલા બોન્ડ રોડ શોમાં રોકાણ કરવાનો ઇનકાર કર્યો હતો. કેન્દ્રીય મંત્રીએ કહ્યું કે હવે તે જ સંસ્થાઓ રોકાણ માટે આગળ વધી રહી છે.

જોકે, હવે અમે વિદેશી રોકાણકારો પાસેથી નાણાં એકત્ર કરવાની યોજના નથી બનાવી રહ્યા. ગડકરીએ કહ્યું કે નેશનલ હાઈવે ઓથોરિટી ઓફ ઈન્ડિયા (NHAI) હાલમાં 5.75 અથવા 5.85 ટકાના ખૂબ જ સ્પર્ધાત્મક દરે લોન એકત્ર કરી રહી છે અને હાલમાં બંને બેંકો 25,000 કરોડની લોનની દરખાસ્તો સાથે એકબીજાની વચ્ચે સ્પર્ધા કરી રહી છે.

આ સાથે કેન્દ્રીય મંત્રીએ કહ્યું કે સરકાર ઈથેનોલ પર પોતાનો ભાર વધારી રહી છે. જેના કારણે ભારતનું આયાત બિલ તો ઘટશે જ પરંતુ આવનારા સમયમાં ખેડૂતોની આવકમાં પણ વધારો થશે. તે જ સમયે, તેમણે માહિતી આપી હતી કે દેશના ઘણા નગરો અને શહેરોમાં, રેલવે ક્રોસિંગ પર રોડ ઓવર બ્રિજ બનાવવા માટે 8,000 કરોડ રૂપિયાના પ્રોજેક્ટ પર પણ કામ ચાલી રહ્યું છે.

આ પણ વાંચો :  Budget 2022: ઇન્ફ્રાસ્ટ્રક્ચર પર ખર્ચ વધવાથી બેરોજગારી દર થશે ઓછો, જાણો શું છે સરકારનો પ્લાન