ટ્વીટર સાથેની ડીલમાં મસ્કને ભારે પડ્યુ એક ઈમોજી, જાણો શું છે સમગ્ર મામલો

ઇમોજી પરસ્પર સંચારમાં તેમની લાગણીઓ સાથે વાતચીત કરવાનો એક માર્ગ કેટલો મહત્વપૂર્ણ બની રહ્યો છે. ઈમોજી એટલા મહત્વપૂર્ણ બની ગયા છે કે કદાચ એક નાનકડું ઇમોજી અત્યારે વિશ્વના સૌથી મોટા કોર્પોરેટ યુદ્ધના પરિણામને બદલી શકે છે. આ મામલામાં ટ્વિટરે કોર્ટમાં પુરાવા તરીકે ઈમોજી રજૂ કરવાનો નિર્ણય લીધો છે. લાગણીઓ સાથે જોડાયેલા આ સંકેતોના આધારે, ટ્વિટર (Twitter) સાબિત કરવા માંગે છે કે એલોન મસ્ક (Elon Musk) શરૂઆતથી જ ટ્વિટરને ખરાબ કરવાનો પ્રયાસ કરી રહ્યા હતા.

જો કોર્ટમાં એ સાબિત થઈ જાય કે મસ્ક ટ્વિટર પર દબાણ લાવવા માંગતા હતા તો કદાચ મસ્ક માટે મુશ્કેલીઓ વધી શકે છે. એટલે કે મસ્ક દ્વારા મોકલવામાં આવેલ ઇમોજી તેમના માટે મોટી સમસ્યા બની શકે છે.

શું છે સમગ્ર મામલો?

ટ્વિટરે મંગળવારે એલોન મસ્ક પર 44 બિલિયન ડોલરની ટેક કંપની ખરીદવાના કરારનો ભંગ કરવા બદલ દાવો માંડ્યો હતો. ફોક્સ ન્યૂઝના અહેવાલ મુજબ, સોશિયલ મીડિયા કંપનીએ મસ્ક દ્વારા ઉપયોગમાં લેવાતા ઇમોજીનો ઉપયોગ કર્યો છે. જેથી એ સાબિત થઈ શકે કે તેણે કંપનીને નીચે દેખાડી છે.

મસ્કે ડીલ રદ્દ કરતા ટ્વિટર પર આરોપ લગાવ્યો હતો કે, તેણે પ્લેટફોર્મ પર બનાવટી અને બૉટોની સંખ્યાને લઈને ભ્રામક નિવેદનો કર્યા છે. ટ્વિટરના સીઈઓ પરાગ અગ્રવાલના ટ્વીટના જવાબમાં મસ્કે 16 મેના રોજ આ ઈમોજીનો ઉપયોગ કર્યો હતો. તે ટ્વિટમાં, પરાગ અગ્રવાલે કંપનીના મૂલ્યાંકનને સમર્થન આપ્યું હતું, જે મુજબ તેના દૈનિક સક્રિય વપરાશકર્તાઓમાંથી પાંચ ટકાથી ઓછા નકલી અથવા સ્પામ છે.

મસ્ક ટ્વિટર સાથેની ડીલમાંથી કરી પીછેહઠ

તમને જણાવી દઈએ કે એલોન મસ્કે થોડા દિવસો પહેલા જાહેરાત કરી હતી કે તેઓ ટ્વિટર સાથેની ડીલ કેન્સલ કરી રહ્યા છે. તેમણે કહ્યું હતું કે તેઓ આ સોશિયલ મીડિયા પ્લેટફોર્મ ખરીદવા માટે 44 બિલિયન ડોલરની ઓફર પાછી ખેંચી રહ્યા છે. તેનું કારણ એ છે કે કંપની ફેક એકાઉન્ટની સંખ્યા વિશે પૂરતી માહિતી આપવામાં નિષ્ફળ રહી છે. તે જ સમયે, ટ્વિટર કહે છે કે તે આ ડીલને જાળવી રાખવા માંગે છે અને આ માટે એલોન મસ્ક પર કેસ કરશે.