Breaking News : ભારતીય કંપનીઓને અમેરિકા તરફથી મોટી રાહત, 4 દિગ્ગજ કંપનીઓ પ્રતિબંધોની યાદીમાંથી બહાર

અમેરિકાએ ચાર ભારતીય કંપનીઓને મોટી રાહત આપતા તેમને પ્રતિબંધોની યાદીમાંથી દૂર કરવાનો નિર્ણય લીધો છે. યુએસ ટ્રેઝરી ડિપાર્ટમેન્ટે પોતાની સ્પેશિયલી ડિઝિગ્નેટેડ નેશનલ્સ (SDN) યાદીમાંથી ચાર ભારતીય કંપનીઓના નામ હટાવ્યા છે. આ નિર્ણયથી સંબંધિત કંપનીઓને આંતરરાષ્ટ્રીય વેપાર અને નાણાકીય વ્યવહારોમાં ફરી સરળતા મળશે.

પ્રતિબંધોની યાદીમાંથી દૂર કરવામાં આવેલી કંપનીઓમાં હૈદરાબાદ સ્થિત RRG Engineering Technologies Private Limited અને Lokesh Machines Limited, અમદાવાદની Galaxy Bearings Limited તેમજ દિલ્હીની Shaurya Aeronautics Private Limitedનો સમાવેશ થાય છે. લગભગ બે વર્ષ પહેલાં અમેરિકાએ આ કંપનીઓને પ્રતિબંધિત યાદીમાં સામેલ કરી હતી.

શા માટે લાગ્યા હતા પ્રતિબંધ?

2024 દરમિયાન અમેરિકાની Office of Foreign Assets Control (OFAC) એ એક્ઝિક્યુટિવ ઓર્ડર 14024 હેઠળ કુલ 21 ભારતીય સંસ્થાઓ સામે પ્રતિબંધો જાહેર કર્યા હતા. તેમાં 19 કંપનીઓ અને બે વ્યક્તિઓનો સમાવેશ થતો હતો. અમેરિકાનો આરોપ હતો કે આ સંસ્થાઓએ રશિયન સરકારને નાણાકીય, તકનીકી અથવા અન્ય પ્રકારની સહાય પૂરી પાડી હતી, જેના કારણે તેમના પર કાર્યવાહી કરવામાં આવી હતી.

હવે પ્રતિબંધો કેમ હટાવવામાં આવ્યા?

યુક્રેન પર રશિયાના આક્રમણ બાદ અમેરિકા અને તેના સહયોગી દેશોએ રશિયા સામે અનેક આર્થિક પ્રતિબંધો લાગુ કર્યા હતા. આ પ્રતિબંધોને અસરકારક બનાવવા માટે વિવિધ દેશોની કંપનીઓ પર પણ કાર્યવાહી કરવામાં આવી હતી.

ભારત સરકારે તે સમયે અમેરિકા સાથે આ મુદ્દે ચર્ચા કરી હતી. વિદેશ મંત્રાલયે સ્પષ્ટ કર્યું હતું કે ભારત આંતરરાષ્ટ્રીય સમુદાયનો જવાબદાર સભ્ય છે અને નિકાસ નિયંત્રણ સંબંધિત વૈશ્વિક નિયમોનું પાલન કરે છે. સાથે જ ભારતીય કંપનીઓ નિયમોનું ઉલ્લંઘન ન કરે તે માટે સરકાર સમયાંતરે જાગૃતિ અને માર્ગદર્શન કાર્યક્રમો પણ ચલાવે છે.

OFACએ શું જણાવ્યું?

અમેરિકાના ટ્રેઝરી વિભાગના જણાવ્યા અનુસાર, SDN યાદીમાં ફેરફાર એક મોટા અપડેટનો ભાગ છે. આ અપડેટમાં મેક્સિકોના ડ્રગ ટ્રાફિકિંગ નેટવર્ક સાથે જોડાયેલા અનેક વ્યક્તિઓ અને સંસ્થાઓ સામે પણ કાર્યવાહી કરવામાં આવી છે.

OFACએ જાન્યુઆરીથી માર્ચ 2026 દરમિયાન Trade Sanctions Reform and Export Enhancement Act (TSRA) હેઠળ કરવામાં આવેલી લાઇસન્સિંગ પ્રવૃત્તિઓ અંગેનો ત્રિમાસિક અહેવાલ પણ જાહેર કર્યો છે.

બે કંપનીઓ શેરબજારમાં લિસ્ટેડ

પ્રતિબંધોમાંથી મુક્ત થયેલી ચાર કંપનીઓમાંથી Galaxy Bearings Limited અને Lokesh Machines Limited શેરબજારમાં લિસ્ટેડ કંપનીઓ છે. લોકેશ મશીન્સના ગ્રાહકોમાં અમેરિકાની John Deere અને Cummins, સ્વીડનની Volvo તેમજ જાપાનની Honda અને Suzuki જેવી વૈશ્વિક કંપનીઓનો સમાવેશ થાય છે.

બીજી તરફ, RRG Engineering Technologies Private Limited ભારતના એવિએશન ક્ષેત્રમાં કાર્યરત છે. કંપનીના ચેરમેન અને મેનેજિંગ ડિરેક્ટર જી. એમ. ગંગા રાવે 2018માં નાગરિક ઉડ્ડયન મંત્રાલયની UAV (માનવરહિત હવાઈ વાહન) ટેક્નોલોજી વિકાસ માટે રચાયેલી ટાસ્ક ફોર્સમાં ઉદ્યોગ નિષ્ણાત તરીકે મહત્વપૂર્ણ ભૂમિકા ભજવી હતી.

અમેરિકાના આ નિર્ણયને ભારતીય કંપનીઓ માટે સકારાત્મક સંકેત માનવામાં આવી રહ્યો છે. નિષ્ણાતોના મતે, આ પગલાથી સંબંધિત કંપનીઓના વૈશ્વિક વેપાર, નાણાકીય વ્યવહારો અને આંતરરાષ્ટ્રીય ભાગીદારીને નવી ગતિ મળી શકે છે.

ભારતીયોને Freelance Visa આપી રહ્યું છે જર્મની, યુરોપ જઈ કામ કરવાનો મોકો, જાણો રીત