GOLD : દેશમાં સોનાની માંગમાં સતત થઇ રહ્યો છે વધારો, વર્ષ 2021માં ભારતીયોએ 797.3 ટન સોનું ખરીદ્યું, 2020ની સરખામણીમાં 78.6% વધુ ખપત થઇ
ચોથા ક્વાર્ટરમાં મુખ્યત્વે 343 ટનની અસાધારણ માંગના પરિણામે ભારતની સોનાની માંગ 79 ટકા વધીને 797.3 ટન થઈ છે.
Gold consumption in India: કોરોનાકાળ છતાં દેશમાં સોના તરફનું આકર્ષણ ઘટ્યું નહિ પરંતુ વધ્યું છે. ગ્રાહક સેન્ટિમેન્ટમાં સુધારો અને કોવિડ-19 સંબંધિત અવરોધો પછી વધતી માંગને પગલે ભારતમાં સોનાનો વપરાશ 2021માં વધીને 797.3 ટન થયો હતો. પીટીઆઈના અહેવાલ મુજબ આ વર્ષે પણ તેજીનો ટ્રેન્ડ ચાલુ રહેવાની ધારણા છે.
વર્ષ 2021માં સોનાની માંગમાં 78.6 ટકાનો વધારો
રિપોર્ટ અનુસાર વર્લ્ડ ગોલ્ડ કાઉન્સિલ (WGC) એ તેના રિપોર્ટ ‘gold demand trends 2021’માં જણાવ્યું છે કે 2021માં સોનાની માંગ 78.6 ટકા વધીને 797.3 ટન થઈ છે જે 2020માં 446.4 ટન હતી. સોમસુંદરમ પીઆર, પ્રાદેશિક મુખ્ય કાર્યકારી અધિકારી WGC એ જણાવ્યું હતું કે વર્ષ 2021 એ સોના વિશે પરંપરાગત વિચારસરણીની મજબૂતાઈની પુનઃ પુષ્ટિ કરી છે અને પુનરુત્થાનના ઘણા સબક આપ્યા છે જે આવનારા વર્ષો માટે નીતિગત વિચારસરણીને આકાર આપશે.
સોનાના દાગીનાની માંગ બમણી થઈ
PR અનુસાર ચોથા ક્વાર્ટરમાં મુખ્યત્વે 343 ટનની અસાધારણ માંગના પરિણામે ભારતની સોનાની માંગ 79 ટકા વધીને 797.3 ટન થઈ છે. આ માંગ ત્રીજા ક્વાર્ટરમાં દર્શાવવામાં આવેલા અમારા અંદાજ કરતાં વધી ગઈ છે અને શ્રેષ્ઠ ક્વાર્ટર સાબિત થઈ છે. વર્ષ 2022 માટે સોમસુંદરમે કહ્યું કે જો વર્તમાન પરિસ્થિતિ ચાલુ રહે અને કોઈ ખાસ વિક્ષેપ ન આવે તો સોનાની માંગ 800-850 ટન આસપાસ રહેવાની ધારણા છે. તેમણે કહ્યું કે 2021માં સોનાના આભૂષણોની માંગ પાછલા વર્ષની સરખામણીમાં બમણી થઈ અને પ્રિ-એપિડેમિક લેવલને વટાવીને છ વર્ષમાં ઉચ્ચતમ સ્તરે પહોંચી ગઈ. ચોથા ક્વાર્ટરમાં રેકોર્ડ માંગ 265 ટન હતી.
કિંમતના આધારે જ્વેલરીની માંગ
મૂલ્યની દ્રષ્ટિએ જ્વેલરીની માંગ 96 ટકા વધીને રૂ. 2,61,140 કરોડ થઈ છે. 2020માં તે 1,33,260 કરોડ રૂપિયા હતી. 2021માં કુલ રોકાણની માંગ 43% વધીને 186.5 ટન થઈ છે. મૂલ્યની દ્રષ્ટિએ માંગ 45 ટકા વધીને રૂ. 79,720 કરોડ થઈ છે. જોકે, દેશમાં સોનાનું કુલ રિસાયક્લિંગ 21 ટકા ઘટીને 75.2 ટન થયું છે. ભારતમાં સોનાની કુલ આયાત 165 ટકા વધીને 924.6 ટન થઈ છે.
વિશ્વમાં સોનાની માંગ 4,021 ટન
વર્લ્ડ ગોલ્ડ કાઉન્સિલ (WCG)ના એક અહેવાલમાં જણાવાયું છે કે ડિસેમ્બરમાં પૂરા થયેલા ત્રિમાસિક ગાળામાં ગયા વર્ષના સમાન સમયગાળાની સરખામણીમાં 50 ટકાનો મોટો વધારો થવાને કારણે 2021માં સોનાની વૈશ્વિક માંગ 10 ટકા વધીને 4,021.3 ટન થઈ હતી. રિપોર્ટ અનુસાર 2020માં સોનાની કુલ માંગ 3,658.8 ટન હતી. રિપોર્ટમાં કહેવામાં આવ્યું છે કે સતત 12મા વર્ષે સેન્ટ્રલ બેંક શુદ્ધ સોનાની ખરીદદાર હતી તેણે 463 ટન સોનું ખરીદ્યું હતું જે 2020ની સરખામણીમાં 82 ટકા વધુ છે.
આ પણ વાંચો : Budget 2022માં ઈન્કમ ટેક્સ પર મળે રાહત, ફ્યુલ પર ઘટાડવામાં આવે કર: રિપોર્ટ
આ પણ વાંચો : જો Budget 2022માં આ સેક્ટર માટે થાય છે વિશેષ જાહેરાત, તો પેદા થશે પુષ્કળ નોકરીઓ