Direct Tax Collection માં ચાલુ વર્ષે અત્યાર સુધીમાં 21%નો વધારો, કર આવક રૂપિયા 4.6 લાખ કરોડ થઈ

Direct Tax Collection : સ્થાનિક અર્થતંત્ર મજબૂત રહે છે અને દેશનું ટેક્સ કલેક્શન સતત ઝડપી ગતિએ વધી રહ્યું છે. નાણા મંત્રાલય દ્વારા આપવામાં આવેલા આંકડા મુજબ નાણાકીય વર્ષમાં અત્યાર સુધીમાં એટલે કે એપ્રિલથી જૂન 17 સુધીમાં દેશનું કુલ નેટ ડાયરેક્ટ ટેક્સ કલેક્શન 4.63 લાખ કરોડ રૂપિયા રહ્યું છે જે ગત સમાન સમયગાળાની સરખામણીમાં 21 ટકા વધુ છે.

તે જ સમયે ગ્રોસ ટેક્સ કલેક્શન ગયા વર્ષની સરખામણીમાં 22 ટકાના વધારા સાથે રૂપિયા 5.16 લાખ કરોડ થયું છે. ગ્રોસ ટેક્સ કલેક્શન એ રિફંડ ઈશ્યુ કરતા પહેલાનો ડેટા છે જ્યારે નેટ ટેક્સ કલેક્શન એ રિફંડ ઈશ્યુ કર્યા પછીનો ડેટા છે.

કોર્પોરેટ ઇન્કમ ટેક્સ રૂપિયા 2.26 લાખ કરોડ

નાણા મંત્રાલય દ્વારા આપવામાં આવેલા આંકડા અનુસાર ગ્રોસ ટેક્સ કલેક્શનના આંકડામાં કોર્પોરેટ આવકવેરો રૂપિયા 2.26 લાખ કરોડ હતો. જ્યારે પર્સનલ ઇન્કમ ટેક્સ, જેમાં સિક્યોરિટી ટ્રાન્ઝેક્શન ટેક્સ એટલે કે STT પણ સામેલ છે, તે 2.89 લાખ કરોડ રૂપિયા સુધી પહોંચી ગયો છે.

એડવાન્સ ટેક્સ કલેક્શન 27.34 ટકા વધ્યું

આ સાથે નાણાકીય વર્ષ 2025માં અત્યાર સુધીમાં એડવાન્સ ટેક્સ કલેક્શન 27.34 ટકા વધીને 1.49 લાખ કરોડ રૂપિયા થઈ ગયું છે. તેમાંથી રૂ. 1.14 લાખ કરોડ કોર્પોરેટ આવકવેરો છે અને રૂ. 34,470 કરોડ વ્યક્તિગત આવકવેરો છે. સરકારે ચાલુ નાણાકીય વર્ષમાં અત્યાર સુધીમાં રૂ. 53300 કરોડના રિફંડ ઈશ્યુ કર્યા છે. આ રકમ ગયા વર્ષની સરખામણીમાં લગભગ 34 ટકા વધુ છે.

વર્ષ 2024-25 માટે 38.31 લાખ કરોડ રૂપિયાની કુલ કર આવકનો અંદાજ

આ વર્ષે ફેબ્રુઆરીમાં રજૂ કરવામાં આવેલા વચગાળાના બજેટમાં, સરકારે નાણાકીય વર્ષ 2024-25 માટે 38.31 લાખ કરોડ રૂપિયાની કુલ કર આવકનો અંદાજ મૂક્યો છે. તેમાંથી પ્રત્યક્ષ કર દ્વારા રૂ. 21.99 લાખ કરોડ અને પરોક્ષ કર દ્વારા રૂ. 16.31 લાખ કરોડ એકત્ર કરવાનો લક્ષ્યાંક છે. ગયા નાણાકીય વર્ષમાં સરકારે પ્રત્યક્ષ કર દ્વારા 19.58 લાખ કરોડ રૂપિયા એકત્ર કર્યા હતા. આ રકમ નાણાકીય વર્ષ 2022-23 કરતા 17 ટકા વધુ હતી.

આ પણ વાંચો : Budget 2024 : મધ્યમ વર્ગ માટે રાહત અને રોજગારી પર રહેશે ભાર, આ મહત્વની જાહેરાત થઈ શકે છે