વિદેશમાં પણ વાગ્યો ભારતીય ચલણનો ડંકો, હવે આ દેશ ભારત સાથે રૂપિયામાં કરશે વેપાર
વિશ્વમાં વધતા ડોલરના પ્રભાવને ઘટાડવા માટે અનેક દેશ પોતાના નાણામાં અન્ય દેશ સાથે વ્યવહાર કરી રહ્યા છે ત્યારે વધુ એક દેશે ભારત સાથે ભારતીય રૂપિયામાં વેપાર કરવાની વાત કરી છે.
જેમ જેમ ભારત આર્થિક રીતે મજબૂત થઈ રહ્યું છે તેમ તેમ તેની કરન્સીની માગ પણ વધી રહી છે. ઘણા દેશો હવે ભારત સાથે ડોલરમાં વેપાર કરવાને બદલે ભારતીય ચલણમાં વેપાર કરી રહ્યા છે. હવે આ દેશોમાં વધુ એક નામ ઉમેરાયું છે. આ દેશ ભારતનો પાડોશી છે અને ભારત સાથે તેના રાજકીય અને વ્યાપારી સંબંધો પણ સારા છે. ખાસ વાત એ છે કે આ દેશ ડોલર પર પોતાની નિર્ભરતા ઘટાડવા માટે ભારતીય ચલણમાં બિઝનેસ કરશે. તે આ માટે તૈયારી કરી રહ્યો છે.
બ્લૂમબર્ગના રિપોર્ટ અનુસાર, ભારતનો પાડોશી દેશ બાંગ્લાદેશ ડોલરની જગ્યાએ ભારતીય ચલણમાં બિઝનેસ કરવાની તૈયારી કરી રહ્યું છે. ટૂંક સમયમાં તે ભારત સાથે ભારતીય ચલણ એટલે કે રૂપિયામાં વેપાર કરશે. એવું કહેવામાં આવી રહ્યું છે કે બાંગ્લાદેશના આ પગલાથી ભારતને પણ ફાયદો થશે. તેનાથી બંને દેશો માટે ટ્રાન્ઝેક્શન કરતી વખતે ખર્ચમાં ઘટાડો થશે. તે જ સમયે, નિષ્ણાતોનું કહેવું છે કે બાંગ્લાદેશે વિદેશી મુદ્રા ભંડાર પરનો બોજ ઘટાડવા માટે આ નિર્ણય લીધો છે.
સોનાલી બેંક પણ આવી જ તૈયારીઓ કરી રહી છે
બાંગ્લાદેશ ભારતનો પડોશી દેશ છે. બંને દેશોની સરહદો એકબીજાને મળે છે. બંને દેશો વચ્ચે દર વર્ષે હજારો કરોડ રૂપિયાનો વેપાર થાય છે. અત્યાર સુધી આ બિઝનેસ ડોલરમાં થતો હતો. પરંતુ હવે બાંગ્લાદેશ ભારત સાથે ભારતીય ચલણમાં વેપાર કરશે. આ માટે બાંગ્લાદેશની 2 બેંકો ભારત સાથે રૂપિયાની લેવડ-દેવડ કરવાની મોટી યોજના પર કામ કરી રહી છે. ખાસ વાત એ છે કે ઇસ્ટર્ન બેંક ઓફ બાંગ્લાદેશે આ માટે ICICI બેંક અને સ્ટેટ બેંક ઓફ ઇન્ડિયામાં નોસ્ટ્રો એકાઉન્ટ પણ ખોલાવ્યું છે. ઈસ્ટર્ન બેંક પણ આ અંગે ટૂંક સમયમાં જાહેરાત કરી શકે છે. તે જ સમયે બાંગ્લાદેશની સોનાલી બેંક પણ આવી જ તૈયારીઓ કરી રહી છે.
બાંગ્લાદેશના વિદેશી મુદ્રા ભંડારમાં ઘટાડો
મહત્વનું છે કે, જ્યારથી યુક્રેન અને રશિયા વચ્ચે યુદ્ધ શરૂ થયું છે, ત્યારથી આખી દુનિયામાં સંકટ છે. બંને દેશો વચ્ચેના યુદ્ધને કારણે ગેસ, તેલ, ઘઉં અને અન્ય ઘણી વસ્તુઓની આયાત-નિકાસને અસર થઈ છે. તેનાથી મોંઘવારી વધી છે. આવી સ્થિતિમાં ઘણા દેશોમાં ડોલરની અછત સર્જાઈ છે, જેના કારણે વિદેશી મુદ્રા ભંડાર ઘટી રહ્યો છે. સાથે જ બાંગ્લાદેશ પણ તેનાથી પ્રભાવીત થયો છે. બાંગ્લાદેશનું ફોરેન એક્સચેન્જ રિઝર્વ 7 વર્ષમાં સૌથી નીચા સ્તરે પહોંચી ગયું છે. તેવી જ રીતે, વિશ્વમાં ચીન પછી બાંગ્લાદેશ ભારતમાંથી સૌથી વધુ આયાત કરે છે. જેના કારણે તેણે આ પગલું ભર્યું છે.
