ઈપીએફ પાસબુકે એમ્પ્લોઈઝ પ્રોવિડન્ટ ફંડ ઓર્ગેનાઈઝેશન (EPFO) દ્વારા પૂરી પાડવામાં આવતી ઓનલાઈન સુવિધા છે. પાસબુકમાં કર્મચારી અને તેના એમ્પ્લોયર બંને દ્વારા EPF અને કર્મચારી પેન્શન સ્કીમ (EPS) ખાતામાં કરવામાં આવેલા વ્યવહારોની તમામ માહિતી અને અન્ય મહત્વપૂર્ણ વિગતોનો સમાવેશ થાય છે.
બંને પક્ષો (કંપની અને કર્મચારી) દ્વારા માસિક ધોરણે જે યોગદાન આપવામાં આવે છે, તે પાસબુકમાં એકત્રિત રકમ પર વ્યાજ મળે છે. જો તમે 1થી વધુ એમ્પ્લોયર(કંપની) સાથે કામ કર્યું હોય તો તમારી પાસે અનેક EPF એકાઉન્ટ્સ હશે અને દરેક એકાઉન્ટની અલગ પાસબુક હશે. જો તમે EPFOની અધિકૃત વેબસાઇટ પર યુનિવર્સલ એકાઉન્ટ નંબર (UAN)નો ઉપયોગ કરીને તમારી જાતને નોંધણી કરાવી હોય તો તમે તમારી પાસબુકની ઝડપી ઍક્સેસ મેળવી શકો છો. એકવાર તમે નોંધણી કરાવી લો પછી વિગતો અને અપડેટ 6 કલાક પછી તમને ઉપલબ્ધ થશે. ઉપરાંત, તમે માત્ર એક ક્લિકથી પાસબુક ડાઉનલોડ કરી શકો છો.
તે 12 અંકનો એક નંબર છે જે તમામ નવા સભ્યો અને સંગઠનો માટે ફરજિયાત છે, જ્યારે તેઓ EPFમાં જોડાય છે. આ નંબર તમારા એકાઉન્ટ માટે ઓળખ નંબરનો હેતુ પૂરો કરે છે કારણ કે સભ્ય ID તેની સાથે જોડાયેલા છે.
UAN પાસબુકનો એક ખૂબ જ મહત્વપૂર્ણ ઘટક તેનો EPF એકાઉન્ટ નંબર છે. નોંધાયેલ સંસ્થાઓ પાસે આ એકાઉન્ટ નંબર રાજ્ય, પ્રાદેશિક કાર્યાલય, કોડ અને સ્થાપના અને સભ્ય કોડ દર્શાવતા આલ્ફાન્યુમેરિક ફોર્મેટમાં છે.
EPF પાસબુકમાં સ્થાપનાનું નામ, સરનામું અને ID, સભ્યનું નામ, જન્મ તારીખ, સંસ્થાની જોડાવાની તારીખ વગેરે જેવી ઘણી મૂળભૂત વિગતો હોય છે. પાસબુક કર્મચારી અને એમ્પ્લોયર બંનેના કોલમ હેઠળ ઓપનિંગ બેલેન્સ દર્શાવે છે. ઓપનિંગ બેલેન્સમાં પાછલા નાણાકીય વર્ષમાં કુલ યોગદાન અને વ્યાજનો પણ સમાવેશ થાય છે. કર્મચારી તેમજ તેના એમ્પ્લોયર દ્વારા કરવામાં આવેલ માસિક યોગદાન અહીં પ્રતિબિંબિત થાય છે.
જ્યારે EPSમાં યોગદાન અલગથી દર્શાવવામાં આવ્યું છે. પીએફ પરનો વ્યાજ દર વર્ષના અંતે કર્મચારી તેમજ એમ્પ્લોયરના યોગદાન માટે જમા કરવામાં આવે છે, પરંતુ તેની ગણતરી દરેક મહિનાના ચાલી રહેલ બેલેન્સ પર કરવામાં આવે છે. તેમજ પાસબુકમાં કયા વ્યાજના દર પર વ્યાજ જમા થશે તેનો ઉલ્લેખ કરે છે.
જો કોઈ અંગત કારણોસર, તમે વર્ષમાં કોઈ ઉપાડ કર્યો હોય તો તે EPF પાસબુકમાં પણ જોવા મળશે. વ્યાજ સાથે કર્મચારીનું કુલ રકમ અને વ્યાજ સાથે એમ્પ્લોયરનું કુલ રકમ(બેલેન્સ) છે. ઉપરાંત, EPF બેલેન્સને આવતા વર્ષ માટે ઓપનિંગ બેલેન્સ તરીકે કેરી ફોરવર્ડ કરવામાં આવે છે. કર્મચારીઓને EPFમાં 12% ના ફરજિયાત હિસ્સા કરતાં વધુ યોગદાન આપવાનો વિકલ્પ મળે છે. કર્મચારીઓ દ્વારા આપવામાં આવેલ વધારાનું યોગદાન સ્વૈચ્છિક ભવિષ્ય નિધિ હેઠળ આવરી લેવામાં આવે છે અને પાસબુકમાં અલગથી જોવા મળે છે.
EPFOની સત્તાવાર વેબસાઇટ ખોલો અને હોમ પેજની ઉપર જમણી બાજુએ ઉપલબ્ધ ‘અમારી સેવાઓ’ પર ક્લિક કરો. ડ્રોપ ડાઉનમાંથી ‘કર્મચારીઓ માટે’ વિકલ્પ પસંદ કરો, મેમ્બર પાસબુક પર ક્લિક કરો, UAN નંબર અને પાસવર્ડ દાખલ કરો અને લોગિન પર ક્લિક કરો, એકવાર તમે સફળતાપૂર્વક લોગિન કરો, પછી વધુ ઍક્સેસ માટે ઈ-પાસબુક ડાઉનલોડ કરો વિકલ્પ પર ક્લિક કરો.
ભારત સરકાર દ્વારા શરૂ કરાયેલ, ઉમંગ મોબાઈલ એપ્લિકેશન એ એક ડિજિટલ પ્લેટફોર્મ છે જે વપરાશકર્તાઓને બહુવિધ સરકારી ઓનલાઈન પોર્ટલ સંબંધિત વિગતો સરળતાથી મદદ કરે છે. EPFO ઓનલાઈન પોર્ટલ એ ઉમંગ એપ્લિકેશન સાથે જોડાયેલા પોર્ટલમાંથી એક છે. આ મોબાઇલ એપ્લિકેશનને સ્માર્ટફોન પર ડાઉનલોડ કરીને અને તેના પર નોંધણી કરીને, વપરાશકર્તાઓ તેમની EPF પાસબુકની વિગતો માત્ર થોડા ક્લિક્સમાં ઍક્સેસ કરી શકે છે.
તમારા એમ્પ્લોયર દ્વારા ટ્રાન્ઝેક્શન કરવામાં આવે કે તરત જ EPFO તમારી EPF પાસબુક અપડેટ કરે છે. EPF પાસબુક આપેલ યોગદાનનો મહિનો અને વર્ષ દર્શાવે છે. તે વ્યવહારની તારીખ બતાવતું નથી. તમારી EPF પાસબુકમાં ટ્રાન્ઝેક્શન દર્શાવવામાં સામાન્ય રીતે 20 દિવસ જેટલો સમય લાગે છે. જો તમારી EPF પાસબુક અપડેટ ન થઈ હોય, તો ખાતરી કરો કે તમે પોર્ટલ પર લોગિન કર્યું છે અને અપડેટ કરેલી પાસબુક મેળવો.