ગણપતિ બાપ્પાને પ્રસન્ન કરવાની સાચી રીત કઈ ? કયા ફૂલ અને કયા ભોગ ધરાવવા ? જાણો પૂજા કરવાની યોગ્ય વિધિ
ગણેશ ચતુર્થીનો પવિત્ર તહેવાર આવી રહ્યો છે અને દરેક ભક્ત વિઘ્નહર્તા બાપ્પાના સ્વાગત માટે ઉત્સાહથી તૈયારીઓ કરી રહ્યો છે. સનાતન ધર્મમાં ગણેશજીની પૂજાનું વિશેષ મહત્વ છે, કારણ કે કોઈપણ શુભ કામની શરૂઆત તેમની પૂજા વગર અધૂરી ગણાય છે. આ બધા વચ્ચે શું તમે જાણો છો કે, પૂજા દરમિયાન કયા ફૂલ અને કયો ભોગ ધરાવવાથી બાપ્પા સૌથી વધુ પ્રસન્ન થાય છે?
ગણેશ ચતુર્થીનો તહેવાર ભગવાન ગણેશને સમર્પિત છે. આ દિવસે ઘરમાં ગણપતિની સ્થાપના કરીને વિધિ-વિધાનથી પૂજા કરવામાં આવે છે. એવી માન્યતા છે કે, ભગવાન ગણેશ વિઘ્નહર્તા છે અને તેમની પૂજા કરવાથી ઘરમાં સુખ-સમૃદ્ધિ આવે છે. ગણપતિ બપ્પાની પૂજામાં ફૂલ, દૂર્વા (ધરો) અને ભોગનું ખાસ મહત્વ માનવામાં આવે છે.
ધાર્મિક માન્યતા અનુસાર, ભગવાન ગણેશને દૂર્વા ઘાસ અને લાલ રંગના ફૂલ વિશેષરૂપે પ્રિય છે. માનવામાં આવે છે કે, સાચા મનથી કરવામાં આવેલી પૂજાથી ગણેશજી પ્રસન્ન થાય છે અને ઘરમાં સુખ-સમૃદ્ધિ આવે છે.
ગણપતિ બપ્પાને કયા ફૂલ પ્રિય છે?
ધાર્મિક માન્યતાઓ અનુસાર, ગણેશજીને લાલ ફૂલ પ્રિય બતાવવામાં આવ્યા છે. પૂજામાં લાલ જાસૂદ, લાલ ગુલાબ અને બીજા સુગંધિત ફૂલો ચઢાવી શકાય છે. આ સાથે દૂર્વાની 21 ગાંઠો અર્પિત કરવી પણ શુભ માનવામાં આવે છે. દૂર્વા ચઢાવતી વખતે તેને સાફ અને તાજી રાખવી જોઈએ.
- જાસૂદ: લાલ રંગનું જાસૂદનું ફૂલ ગણેશજીને અતિ પ્રિય છે. તે અર્પિત કરવાથી વિઘ્નો અને બાધાઓ દૂર થાય છે.
- બીજા ફૂલ: જાસૂદ ઉપરાંત તમે લાલ ગુલાબ, ગલગોટો (ગેંદો), ચમેલી, ચાંદની કે પારિજાતના ફૂલ પણ અર્પિત કરી શકો છો.
- દૂર્વા ઘાસ (ધરો): ફૂલની સાથે-સાથે બપ્પાને 21 ગાંઠ વાળી દૂર્વા ચઢાવવી સૌથી અનિવાર્ય અને શુભ માનવામાં આવે છે.
ગણપતિજીને કયો ભોગ ધરાવવો?
ભગવાન ગણેશને મોદક ખૂબ જ પસંદ છે. આ સિવાય લાડુ, ગોળ, નાળિયેર, કેળાં અને મીઠાઈ પણ ધરાવી શકાય છે. મોદક બપ્પાનો સૌથી પસંદગીનો પ્રસાદ છે. માન્યતા છે કે, પૂજામાં 21 મોદકનો ભોગ ધરાવવાથી ગણેશજી અત્યંત પ્રસન્ન થાય છે. આ સિવાય બેસનના લાડુ, મોતીચૂર કે બુંદીના લાડુ પણ ગણેશજીને ખૂબ પસંદ છે.
ગણેશજીની પૂજાની સાચી રીત
સૌથી પહેલા પૂજાના સ્થાનને સાફ કરો અને ગણપતિની પ્રતિમા સ્થાપિત કરો. ત્યારબાદ ભગવાનને જળ, રોલી, અક્ષત (ચોખા), ફૂલ અને દૂર્વા અર્પિત કરો. આ પછી મોદક કે પોતાની શ્રદ્ધા અનુસાર ભોગ ધરાવો. ધૂપ-દીપ પ્રગટાવીને ગણેશજીની આરતી કરો. પૂજાના અંતમાં પોતાની મનોકામના ભગવાન સામે રાખો અને પ્રસાદ બધા લોકોમાં વહેંચો.
