Dhanteras 2021: આ 7 વસ્તુઓ ઘરમાં સુખ-સમૃદ્ધિ લાવે છે, ધનતેરસના દિવસે તે લાવવાનું ભૂલશો નહીં

દર વર્ષે દિવાળીની સાથે ધનતેરસનો તહેવાર ઉજવવામાં આવે છે. ધનતેરસના દિવસે ખરીદીનો ટ્રેન્ડ જોવા મળે છે. એવું માનવામાં આવે છે કે આ દિવસે ખરીદી કરવાથી ઘરમાં સુખ અને સમૃદ્ધિ આવે છે. ધનતેરસનો શુભ તહેવાર 2 નવેમ્બર, મંગળવારે આવી રહ્યો છે. આ દિવસે મોટાભાગના લોકો સોનું, ચાંદી અને વાસણો વગેરે ખરીદે છે. પરંતુ જ્યોતિષી ડૉ. અરવિંદ મિશ્રાનું માનવું છે કે તમે ગમે તેટલી ખરીદી કરો, પરંતુ ધનતેરસના દિવસે 7 વસ્તુઓ ખરીદીને ઘરે લાવો. આ વસ્તુઓ તમારા ઘરમાં બરકત લાવે છે.

1. પિત્તળની વસ્તુ
ધનતેરસના દિવસે દરેક વ્યક્તિ સોનાની વસ્તુઓ ખરીદી શકતો નથી, તેથી તમે પિત્તળના વાસણો ખરીદો. ધનતેરસનો દિવસ ભગવાન ધન્વંતરિનો અવતરણ દિવસ છે. ભગવાન ધન્વંતરિ જ્યારે સમુદ્ર મંથન દરમિયાન નીચે ઉતર્યા હતા, ત્યારે તેમણે એક હાથમાં અમૃતથી ભરેલો પિત્તળનો કળશ ધારણ કર્યો હતો. આમ, ધનતેરસ પર પિત્તળના વાસણો ખરીદવું ખૂબ જ શુભ માનવામાં આવે છે.

2. ચાંદીનો સિક્કો
જો તમે ચાંદીના ઘરેણાં લઈ શકતા નથી, તો ચાંદીનો સિક્કો ખરીદો. આ સિક્કો ખરીદવામાં તમને વધારે ખર્ચ નહીં થાય અને ઘર માટે ખૂબ જ શુભ છે. દિવાળી દેવી લક્ષ્મીની પૂજાનો તહેવાર હોવાથી સારું રહેશે કે તમે એવો સિક્કો ખરીદો જેના પર દેવી લક્ષ્મીજી અને ગણપતિજીનું ચિત્ર હોય. દિવાળીના દિવસે પૂજા સમયે આ સિક્કાની પૂજા કરો.

3. સાવરણી
સાવરણીને દેવી લક્ષ્મીનું સ્વરૂપ માનવામાં આવે છે. તે ઘરમાંથી ગરીબી દૂર કરવાનું કામ કરે છે. તમારે ધનતેરસના દિવસે સાવરણી ખરીદવી જોઈએ.

4. અક્ષત
ચોખાને અક્ષત કહે છે. તેને સૌભાગ્ય અને સમૃદ્ધિનું પ્રતીક માનવામાં આવે છે. ધનતેરસના દિવસે અક્ષત ઘરમાં લાવવું જોઈએ. તેનાથી ધનમાં વધારો થાય છે.

5. ગોમતી ચક્ર
કોઈ પણ પરિવાર ત્યારે જ સમૃદ્ધ અને સુખી બની શકે છે જ્યારે પરિવારના તમામ લોકો સ્વસ્થ હોય. સ્વસ્થ રહેવા માટે ગોમતી ચક્ર ખરીદો અને ધનતેરસના દિવસે લાવો. દિવાળીના દિવસે તેમની પૂજા કરો. ત્યારબાદ તેને પીળા કપડામાં બાંધીને તિજોરીમાં રાખો. તેનાથી તમારા ઘરના લોકો સ્વસ્થ રહેશે અને પરિવારમાં સમૃદ્ધિ આવશે.

6. શ્રી યંત્ર
મા લક્ષ્મીને શ્રી યંત્ર ખૂબ જ પ્રિય છે. ધનતેરસના દિવસે શ્રી યંત્રને ઘરમાં લાવો અને દિવાળીના દિવસે તેની પૂજા કરો. જો ઘરમાં પહેલાથી જ શ્રી યંત્ર હોય તો તમારે ધનતેરસના દિવસે દેવી લક્ષ્મી અને ગણપતિની મૂર્તિઓ ખરીદવી જોઈએ અને દીપાવલીના દિવસે તેમની પૂજા કરવી જોઈએ.

7. ધાણાના બીજ
ધનતેરસના દિવસે ધાણાના બીજ ખરીદવા જોઈએ અને દિવાળીના દિવસે દેવી લક્ષ્મીને અર્પણ કરવા જોઈએ. ત્યારબાદ ઘરના બગીચા અથવા કુંડામાં બીજ વાવો. એવું માનવામાં આવે છે કે આ બીજમાંથી ઉગતા ધાણા ઘરમાં સુખ અને સમૃદ્ધિ લાવે છે.

નોંધ: અહી આપવામાં આવેલી જાણકારી ધાર્મિક આસ્થાઓ અને લોક માન્યતાઓ પર આધારિત છે. જેનો કોઈ વૈજ્ઞાનિક આધાર નથી. જનરુચિને ધ્યાનમાં રાખીને આ લેખને અહી પ્રસ્તુત કરવામાં આવ્યો છે.

આ પણ વાંચો : Diwali 2021: જાણો દિવાળી પર લક્ષ્મીજી સાથે વિષ્ણુ ભગવાનની પૂજા શા માટે કરવામાં આવતી નથી !

આ પણ વાંચો : Dhanteras 2021: ધનતેરસના દિવસે જો ભૂલથી પણ થઈ આ બે ભૂલ, તો ભોગવવી પડશે મોટી નુકસાની !