ભારતની પહેલી એર ટેક્સી તૈયાર! NVIDIA ની ટેકનોલોજીથી હવે મિનિટોમાં કપાશે કલાકોનું અંતર
ભારતની પહેલી મેડ-ઈન-ઈન્ડિયા એર ટેક્સી તૈયાર થવાના આરે છે, જે ભારતમાં મુસાફરીની રીત સંપૂર્ણપણે બદલી નાખશે. ટૂંકમાં હવે ટ્રાફિકમાં કલાકો સુધી અટવાઇ જવાને બદલે ખૂબ જ ઓછા સમયમાં એક જગ્યાએથી બીજી જગ્યાએ પહોંચી શકાશે.
ઇલેક્ટ્રિક વર્ટિકલ ટેક-ઓફ એન્ડ લેન્ડિંગ (eVTOL) વિમાનોની સ્વદેશી ડેવલપર ઈપ્લેન કંપની (ePlane Company) એ ગુરુવારે જણાવ્યું હતું કે, તેણે ભારતની પ્રથમ ઇલેક્ટ્રિક એર ટેક્સી e200X ના નિર્માણ માટે NVIDIA સાથે સહયોગ (Collaborated) કર્યો છે.
એક ‘ડિજિટલ ટ્વિન’ તૈયાર કરવામાં આવશે
આ સહયોગમાં કોઈ નાણાકીય લેણદેણ જોડાયેલ નથી અને તે સંપૂર્ણપણે જ્ઞાનના આદાન-પ્રદાન (Knowledge Sharing) પર આધારિત છે. આ ભાગીદારી હેઠળ, ઈપ્લેન કંપની NVIDIA ઓમ્નિવર્સ લાઇબ્રેરીનો ઉપયોગ કરીને e200X વિમાનનું એક ‘ડિજિટલ ટ્વિન’ (ડિજિટલ પ્રતિકૃતિ) તૈયાર કરશે.
આ વર્ચ્યુઅલ પ્રતિકૃતિનો ઉપયોગ ફ્લાઇટ ફિઝિક્સ, ઓટોનોમસ એલ્ગોરિધમ્સ, સેન્સર ફ્યુઝન અને મિશન સિનેરિયોઝને ચકાસવા માટે કરવામાં આવશે, જેનું ભૌતિક રીતે પરીક્ષણ કરવું અત્યંત મુશ્કેલ અને ખર્ચાળ હોય છે.
NVIDIA પ્લેટફોર્મનો પણ ઉપયોગ કરશે
કંપનીએ એક નિવેદનમાં જણાવ્યું હતું કે, તે મહત્વપૂર્ણ એપ્લિકેશન્સને હોસ્ટ કરવા માટે ઓનબોર્ડ કમ્પ્યુટિંગ સિસ્ટમ તરીકે NVIDIA IGX પ્લેટફોર્મનો પણ ઉપયોગ કરશે. ખરાબ હવામાન, સેન્સરની ખામી અથવા અથડામણ જેવી સ્થિતિઓમાં ભૌતિક પરીક્ષણ (Physical Testing) કરવું ખર્ચાળ અને જોખમી હોઈ શકે છે, તેથી ‘ડિજિટલ ટ્વિન’ વિમાનને લાખો કિલોમીટરની આભાસી (Virtual) ઉડાન ભરવામાં સક્ષમ બનાવશે. આનાથી વિમાનની વાસ્તવિક ઉડાન પહેલાં જટિલ વાસ્તવિક પરિસ્થિતિઓ માટે એલ્ગોરિધમને તાલીમ આપવામાં મદદ મળશે.
ચીફ ટેકનોલોજી ઓફિસરે શું કહ્યું?
ઈપ્લેન (ePlane) ના સ્થાપક અને ચીફ ટેકનોલોજી ઓફિસર સત્ય ચક્રવર્તીએ જણાવ્યું હતું કે, આ સહયોગ કંપનીની એરોસ્પેસ સંબંધિત મહત્વાકાંક્ષાઓને મજબૂતી આપે છે.
તેમણે ઉમેર્યું હતું કે, “અમે માત્ર એક વિમાન નથી બનાવી રહ્યા; અમે એક ઇકોસિસ્ટમનું નિર્માણ કરી રહ્યા છીએ. NVIDIA સાથેનો સહયોગ અમને ડિજિટલ અને ભૌતિક દુનિયા વચ્ચેની રેખાને ભૂંસી નાખવાની પરવાનગી આપે છે. NVIDIA ઓમ્નિવર્સમાં અમારા ફ્લાઇટ ઓપરેશન્સ સ્યુટને ચકાસીને, અમે સિમ્યુલેશનમાં વિમાનની મર્યાદાઓને હજારો ગણી વધારી રહ્યા છીએ, જેથી અમારે વાસ્તવિકતામાં તે કરવાની જરૂર ન પડે.”
ગ્રાઉન્ડ ટેસ્ટિંગ પણ થશે
એવિઓનિક્સ સિસ્ટમ અને ઓટોનોમીના પ્રિન્સિપલ એન્જિનિયર બખ્તાકોલાહલન શ્યામસુંદરે જણાવ્યું હતું કે, પ્રથમ પ્રોટોટાઇપ (નમૂનો) પહેલેથી જ તૈયાર કરી લેવામાં આવ્યો છે. તેમણે ઉમેર્યું હતું કે, “અમે આગામી થોડા મહિનાઓમાં ગ્રાઉન્ડ ટેસ્ટિંગ (જમીન પર પરીક્ષણ) શરૂ કરવા જઈ રહ્યા છીએ. અમે વધુ બે પ્રોટોટાઇપ બનાવીશું અને અમારા વિમાનને DGCA સાથે પ્રમાણપત્ર મેળવવાની પ્રક્રિયામાંથી પસાર કરીશું. ચેન્નાઈમાં DGCA ના કેટલાક સભ્યો અમારી સાથે કામ કરી રહ્યા છે.”
ક્યાં તેની સેવા શરૂ થશે?
IIT મદ્રાસ દ્વારા શરૂ કરવામાં આવેલા આ સ્ટાર્ટઅપનો ઉદ્દેશ્ય ભીડભાડવાળા શહેરોમાં વાહનવ્યવહારની સમસ્યાઓનું સમાધાન લાવવાનો છે. પરીક્ષણ અને સર્ટિફિકેશન પૂર્ણ થયા પછી કંપની બેંગલુરુ, મુંબઈ અને ચેન્નાઈ જેવા મહાનગરોમાં તેની સેવાઓ શરૂ કરવાની યોજના બનાવી રહી છે.
આ ઉપરાંત, NVIDIA અને AI ગ્રાન્ટ્સ ઈન્ડિયા (AI પર કેન્દ્રિત એક બિન-લાભકારી સંસ્થા) એ તાજેતરમાં NVIDIA ના ‘ઇન્સેપ્શન પ્રોગ્રામ’ હેઠળ ભારતમાં શરૂઆતના તબક્કાની કંપનીઓને ટેકો આપવા માટે સહયોગની જાહેરાત કરી છે.
આ પહેલનો ઉદ્દેશ્ય આગામી 12 મહિનામાં 500 નવા AI સ્ટાર્ટઅપ્સને અદ્યતન AI ટૂલ્સ, મોડલ્સ અને ટેકનિકલ તાલીમ પૂરી પાડીને તેમને પ્રોત્સાહન આપવાનો છે, જેથી તેઓ વિચાર (Concept) થી લઈને ઉત્પાદન (Product) સુધી ઝડપથી આગળ વધી શકે.
