પંજાબના મોહાલીમાં ( Mohali) પોલીસની નિર્દયતા કિસ્સો સામે આવ્યો છે. એક પરિવારને માર મારવાની સાથે ગોળી મારીને ઈજા પહોચાડવામાં આવી હોવાનો વીડિયો સામે આવતા ચકચાર મચી ગઈ છે. આ સમગ્ર કિસ્સામાં પંજાબ પોલીસે (Punjab Police), ગોળી મારીને ઈજા પહોચાડનારા પોલીસ કર્મચારીને સસ્પેન્ડ કરી દીધા છે તો સમગ્ર ઘટનાની તપાસ માટે સ્પેશીયલ ઈન્વેસ્ટીગેશન ટીમ ( Special Investigation Team – SIT) ની રચના કરી છે.
પંજાબના મોહાલીના ડેરાબસ્સીના એએસઆઈ બલવીરસિંહે (ASI Balveer Singh) જાહેર માર્ગ ઉપર મહિલાને થપ્પડ મારી દીધી હતી. પરિવારે પોલીસ સાથે બબાલ પણ કરી હતી. આ દરમિયાન ગુસ્સા ઉપરનો કાબુ ગુમાવી ચૂકેલા એએસઆઈ બલવીરસિંહે મહિલાના ભાઈના પગમાં ગોળી મારી દીધી હતી. જેના પગલે મોહાલીમાં હોબાળો મચી ગયો હતો.
આ કિસ્સાની પંજાબ પોલીસે ગંભીર નોંધ લીધી છે. યુવાનના પગમાં ગોળી મારનાર એએસઆઈ બલવીરસિંહને તાત્કાલિક અસરથી સસ્પેન્ડ કરી દીધો છે. જ્યારે આ સમગ્ર ઘટના અંગે, પંજાબ પોલીસે સ્પેશીયલ ઈન્વેસ્ટીગેશન ટીમની રચના કરી છે. SITના અહેવાલ બાદ, દોષીત સામે વધુ કાર્યવાહી હાથ ધરાશે. જો કે પરિવાર અને પોલીસ વચ્ચે માથાકુટ ક્યા મુદ્દે થઈ તે હજુ સત્તાવાર રીતે સામે આવ્યુ નથી.