વધતા જતા ડિજિટલ ટ્રાન્ઝેક્શનના યુગમાં બેંક ખાતામાં છેતરપિંડી(Bank Fraud )ની ઘટનાઓ પણ વધી છે. જયારે બેંક ખાતામાંથી ગેરકાયદેસર રીતે અનધિકૃત વ્યવહારો થાય છે તેને ઑનલાઇન છેતરપિંડી, ડિજિટલ ફ્રોડ અથવા સાયબર ફ્રોડ તરીકે વ્યાખ્યાયિત કરવામાં આવી છે. હેકર્સ તમારા એકાઉન્ટની વિગતો મેળવીને તેમાંથી પૈસા ઉપાડી લે છે. ખાતામાં ફ્રોડ થયા પછી લોકો ઘણીવાર એવું વિચારીને ચૂપ બેસી જાય છે કે પૈસા પરત મળવાના નથી પરંતુ તે એવું નથી. તમે તમારા સંપૂર્ણ પૈસા પાછા મેળવી શકો છો.ભારતીય રિઝર્વ બેંકે આ માટેની પદ્ધતિ જણાવી છે. રિઝર્વ બેંકનું કહેવું છે કે કોઈપણ અનધિકૃત ટ્રાન્ઝેક્શન પછી પણ તમે તમારા સંપૂર્ણ પૈસા પાછા મેળવી શકો છો. આ માટે તકેદારી જરૂરી છે. RBI નું કહેવું છે કે આવા કોઈપણ ટ્રાન્ઝેક્શન વિશે તરત જ બેંકને માહિતી આપવાથી તમે નુકસાનથી બચી શકો છો.
જો કોઈ તમારા બેંક ખાતામાંથી ખોટી રીતે પૈસા ઉપાડી લે છે અને તમે ત્રણ દિવસની અંદર આ બાબતે બેંકને ફરિયાદ કરો છો, તો તમારે આ નુકસાન સહન કરવું પડશે નહીં. RBI એ એમ પણ કહ્યું છે કે ગ્રાહકના ખાતામાંથી છેતરપિંડીથી ઉપાડેલી રકમ બેંકને નિર્ધારિત સમયની અંદર માહિતી આપ્યા પછી 10 દિવસમાં તેના બેંક ખાતામાં પરત કરવામાં આવશે. આરબીઆઈએ એમ પણ કહ્યું છે કે જો 4-7 દિવસ પછી બેંક એકાઉન્ટ ફ્રોડની જાણ થાય છે તો ગ્રાહકને 25,000 રૂપિયા સુધીનું નુકસાન સહન કરવું પડશે.
હવે મોટાભાગના લોકોના મનમાં પ્રશ્ન ઉઠે છે કે જો આવો વ્યવહાર થયો હોય તો પૈસા કેવી રીતે પરત કરવામાં આવશે? આ ઉપરાંત જો તમે બેંક ખાતામાંથી પૈસા ઉપાડ્યા પછી ફરિયાદ કરો છો, તો બેંક ક્યાંથી પૈસા પરત કરશે? ખરેખર, આવા સાયબર ફ્રોડને ધ્યાનમાં રાખીને બેંકો દ્વારા વીમા પોલિસી પણ લેવામાં આવે છે. બેંક તમારી સાથે થયેલી છેતરપિંડી વિશેની તમામ માહિતી સીધી વીમા કંપનીને જણાવશે અને ત્યાંથી વીમાના પૈસા લઈને તમારું નુકસાન ભરપાઈ કરશે. સાયબર ફ્રોડથી બચવા માટે વીમા કંપનીઓ પણ લોકોને સીધું કવરેજ આપી રહી છે.
Published On - 11:24 am, Sat, 30 July 22