અમરેલીના રાજુલાની રાજગાદી કબજે કરવા માટે કતલની રાત સુધી કાવાદાવા થઈ રહ્યા છે. ત્યારે રાજુલા વિધાનસભા બેઠક પર મતદારોને પ્રોલભન આપવાની વધુ એક ફરિયાદ નોંધાઈ છે. જાફરાબાદના ભાકોદર ગામ નજીક અપક્ષ ઉમેદવાર તરફી મતદાન કરવા રાશન કીટનું વિતરણ ઝડપાયું છે. જાફરાબાદ પોલીસ સ્ટેશનમાં અપક્ષ ઉમેદવાર સહિત 16 લોકો સામે TDOએ ફરિયાદ નોંધાવી છે. સાથે જ પોલીસે બે પીકઅપ વાહન સહિત રાશન કીટનો જથ્થો પણ જપ્ત કર્યો છે. અપક્ષ ઉમેદવાર ગીતા પરમાર સુરેન્દ્રનગર જિલ્લાના દસાડા ગામના રહેવાસી છે.. રાજુલા-જાફરાબાદ બેઠક પર ચૂંટણી પંચે બે અલગ અલગ ફરિયાદ નોંધાવી છે.
આ તરફ રાજકોટમાં પણ મતદાન પૂર્વે કારમાંથી 10 લાખની રોકડ મળી આવી છે. ગુજરાત વિધાનસભા ચૂંટણીના પ્રથમ તબક્કાના મતદાનને હવે ગણતરીના કલાકો બાકી છે. તેવા સમયે રાજકોટમાં મતદાન પૂર્વેની રાત્રે કારમાંથી 10 લાખની રોકડ મળી હતી. જેમાં ચુંટણી પંચ દ્વારા આચાર સંહિતાના અમલના પગલે પોલીસ દ્વારા વાહનોનું ચેકિંગ કરવા આવી રહ્યું છે. જેમાં પોલીસ ચેકિંગ દરમિયાન 10 લાખ રૂપિયા રોકડા મળ્યા હતા. જેમાં પોલીસના ખીરસરા ચેક પોસ્ટ પરથી મળી 10 લાખની રોકડ મળી હતી. જે અંગે ચૂંટણી વિભાગે ઇન્કમ ટેક્સ વિભાગને જાણ કરી છે. તેમજ તેના પગલે આઇટી વિભાગે તપાસ શરૂ કરી છે.