રાજકોટ (Rajkot) જિલ્લામાં જામકંડોરાના દૂધીવદર નજીકનો ફોફળ-1 ડેમ ઓવરફ્લો (Dam overflow) થયો છે. ડેમ ઓવરફ્લો થતા નીચાણવાળા વિસ્તારોને એલર્ટ કરવામાં આવ્યા છે. દૂધીવદર, ઇશ્વરીયા, તરવડા, વેગડી ગામના લોકોને એલર્ટ કરાયા સાથે જ નદીના પટમાં અવર-જવર નહીં કરવા સૂચના આપવામાં આવી છે. દૂધીવદરથી મોટા ભાદરા તરફ જતા ફોફળના કોઝવે પર પાણી ફરી વળ્યાં છે. જેને લઈ હાલ રસ્તો વાહનચાલકો માટે બંધ કરવામાં આવ્યો છે. મહત્વનું છે કે, ધોરાજી શહેર અને જામકંડોરણા ગામ અને તાલુકા 52 ગામોને પીવાનું પાણી પૂરું પાડે છે આ ડેમ. ફોફળ ડેમ માંથી ધોરાજી તાલુકાના પાંચ ગામ અને જામકંડોરણા તાલુકાના પાંચ ગામોને સિંચાઇનું પાણી આપવામાં આવે છે.
મહત્વનું છે કે, ગઈકાલે ગોંડલ શહેર અને ગ્રામ્ય વિસ્તારમાં ધોધમાર વરસાદ ખાબક્યો હતો. ગોંડલ શહેરમાં 2 કલાકમાં ધમાકેદાર દોઢ ઇંચ વરસાદ વરસ્યો હતો. ગોંડલ તાલુકાના ગ્રામ્ય વિસ્તારમાં પણ નોંધપાત્ર વરસાદ હતો. તાલુકાના મોવિયા, જામવાડી, દેરડી, વાસાવડ, ચોરડી, ભોજપરા, ભુણાવા, રિબડા, શાપર સહિતના ગામોમાં વરસાદ વરસ્યો હતો.
ગુજરાતમાં રવિવાર રાતથી પડેલા વરસાદથી સમગ્ર રાજ્ય પાણીમાં તરબોળ થઇ ગયુ છે. ઠેર ઠેરથી તારાજીના દ્રશ્યો સામે આવી રહ્યા છે. રસ્તાઓ ઉપર પાણી ફરી વળ્યા છે. તો ક્યાંક લોકોના ઘરોમાં પાણી ઘૂસ્યા છે. શાળા-કોલેજ, ગાર્ડન, દુકાનો, ખેતરો તમામ સ્થળે માત્ર પાણી જ પાણી જોવા મળી રહ્યુ છે. હજુ આ સ્થળોએથી પાણી માંડ ઓસરવાનું શરુ કર્યુ છે. ત્યાં ફરી હવામાન વિભાગે 5 દિવસ ભારેથી અતિ ભારે વરસાદની આગાહી આપી છે. હવામાન વિભાગે દક્ષિણ ગુજરાત માટે રેડ એલર્ટ જાહેર કર્યું છે. જ્યારે મધ્ય ગુજરાત સહિત સૌરાષ્ટ્રના કેટલાક જિલ્લાઓમાં ભારે વરસાદની આગાહી કરવામાં આવી છે.
Published On - 7:42 am, Tue, 12 July 22