હવામાન વિભાગે (Meteorological Department) રાજ્યમાં આગામી 5 દિવસ વરસાદી માહોલ (Monsoon 2022) રહેવાની આગાહી આપી છે. જે અંતર્ગત ગુજરાતના વિવિધ વિસ્તારોમાં મેઘમહેર જોવા મળી રહી છે. ખાસ કરીને દક્ષિણ ગુજરાત અને મધ્ય ગુજરાતના કેટલાક વિસ્તારોમાં વરસાદી (Rain) માહોલ છવાયો છે. મંગળવારથી બુધવાર સવાર સુધીમાં ગુજરાતમાં વલસાડ (Valsad) , નવસારી, ડાંગ, સુરત, પંચમહાલ સહિતના વિસ્તારોમાં વરસાદ વરસ્યો છે.
વલસાડ જિલ્લામાં ધોધમાર વરસાદ વરસી પડતા ભાદરવા માસમાં અષાઢી માહોલ જોવા મળ્યો હતો. વલસાડ શહેર, વાપી, પારડી સહિતના વિસ્તારોમાં ધોધમાર વરસાદ પડ્યો છે. વલસાડ શહેરમાં તો મધરાતથી જ ધોધમાર વરસાદ વરસ્યો છે. વરસાદના પગલે વાતાવરણમાં ઠંડક પ્રસરતા લોકોને ઉકરાટથી રાહત મળી હતી.
તો નવસારી શહેરમાં વરસાદી માહોલ જોવા મળી રહ્યો છે. નવસારીમાં વહેલી સવારથી ધોધમાર વરસાદ વરસ્યો છે. સવારે 2 કલાકમાં 1 ઈંચ વરસાદ વરસ્યો છે. જો કે વરસાદ થતા અસહ્ય બફારાથી લોકોને રાહત મળી છે. તો બીજી તરફ ભાદરવા મહિનામાં વરસાદી માહોલ રહેતા ગણેશ મંડળના આયોજકોમાં ચિંતા વ્યાપી છે. તો પંચમહાલ જિલ્લામાં હાલોલ પંથકમાં વાતાવરણમાં પલ્ટો આવ્યો છે. લાંબા સમયના વિરામ બાદ હાલોલ સહિતના વિસ્તારોમાં વરસાદ થતા વાતાવરણમાં ઠંડક પ્રસરી છે.
હવામાન વિભાગે આગાહી કરી છે કે ગુજરાતમાં લો પ્રેશર એરિયા બનશે તો વરસાદનું જોર વધશે. 9 અને 10 સપ્ટેમ્બરે વરસાદનું જોર વધવાની શક્યતા છે. આ દરમિયાન દક્ષિણ ગુજરાતમાં વરસાદ પડી શકે છે. દક્ષિણ ગુજરાતમાં વલસાડ, નવસારી, ડાંગ અને તાપીમાં વધુ વરસાદ વરસવાની શક્યતા છે. બીજીતરફ સૌરાષ્ટ્રમાં અમરેલી, ભાવનગર અને ગીર સોમનાથ આસપાસના વિસ્તારોમાં ભારે વરસાદ પડશે.. પશ્ચિમ બંગાળમાં લો પ્રેશર સિસ્ટમ બની રહી હોવાથી વરસાદનું જોર વધશે.. બીજીતરફ અમદાવાદમાં 2થી 3 ડિગ્રી તાપમાન વધવાની આગાહી છે.. હાલમાં 35 ડિગ્રી તાપમાન છે.. જે વધીને 37 ડિગ્રીએ પહોંચશે.. જોકે અમદાવાદ અને ગાંધીનગરમાં છૂટો-છવાયો વરસાદ પડવાની પણ આગાહી છે.