ખેડામાં 31st પહેલા જ મોટા પ્રમાણમાં વિદેશી દારૂનો જથ્થો જપ્ત કરવામાં આવ્યો છે. નડિયાદ પોલીસ ઉંઘતી રહી અને ગાંધીનગર સ્ટેટ વિજિલન્સની ટીમે લાખોની કિંમતનો વિદેશી દારૂનો જથ્થો ઝડપી પાડ્યો છે. આ દારૂનો જથ્થો ખેડા જિલ્લા પંચાયતના સભ્યના પતિ અને આખડોલ ગામના પૂર્વ સરપંચના પતિનો હોવાનું તપાસમાં સામે આવ્યુ છે. વિજિલન્સની ટીમે દારૂના જથ્થા સાથે એક વ્યક્તિની ધરપકડ કરી છે. જ્યારે પાંચ આરોપીઓ ફરાર થવામાં સફળ રહ્યા હતા. કુલ 19 વ્યક્તિઓ સામે ગુનો નોંધાયો છે. જેમાંથી એક આરોપી પકડાયો છે. બાકીના તમામ વોન્ટેડ છે. વિજિલન્સની ટીમે બુટલેગર હિતેશ કનુભાઈ પરમારની ધરપકડ કરી છે. પોલીસે પ્રોહિબિશનનો ગુનો નોંધી કાયદેસરની કાર્યવાહી હાથ ધરી છે. એક ટ્રેક્ટર તથા ટ્રોલી મળી કુલ રૂપિયા 17 લાખ 45 હજાર 700નો મુદ્દામાલ કબ્જે કર્યો છે.
નડિયાદના રૂરલ પોલીસની હદમાં આવેલ આખડોલ ગામની સીમમાંથી વિદેશી દારૂના વેપલાનો પર્દાફાશ સ્ટેટ મોનિટરીંગ સેલે કર્યો છે. ગત ગુરુવારની રાત્રે ગામની સીમમાં જે સાયરસ ડી.જે.વાળાના ઘરેથી થોડે દૂર ખુલ્લી જગ્યામાં વિદેશી દારૂના કન્ટીંગ પર સ્ટેટ વિજિલન્સની ટીમ ત્રાટકી હતી. અહીં ટ્રેક્ટરની ટ્રોલીમાં ઈંગ્લિશ દારૂની 337 બોટલો અને અન્ય મુદ્દામાલ મળી કુલ 7392 બોટલો વિદેશી દારૂ મળી આવ્યો છે. પોલીસે અહીંથી એક ટ્રેક્ટર અને ટ્રોલી મળી કુલ 17 લાખ 45 હજાર 700નો મુદ્દામાલ કબ્જે કર્યો છે. જેમાં સ્થળ પરથી હિતેશ કનુભાઈ પરમાર નામના શખ્સની ધરપકડ કરવામાં આવી છે.
ઈનપુટ ક્રેડિટ- ધર્મેન્દ્ર કપાસી- ખેડા