ખાલિસ્તાની આતંકીઓ દ્વારા ધમકી આપવાના કેસમાં ચોંકાવનારી વિગતો સામે આવી રહી છે. પકડાયેલા બે આરોપીઓની પૂછપરછમાં ચોંકાવનારો ઘટસ્ફોટ થયો છે. રિમાન્ડ પર રહેલા આરોપીઓની હાલ પૂછપરછ ચાલી રહી છે. જેમા આરોપી રાહુલ દ્રીવેદીએ ચોંકાવનારો ખૂલાસો કર્યો છે. આરોપી રાહુલ ટેલિફોન એક્સચેન્જનો માસ્ટર માઈન્ડ હોવાનુ તપાસમાં સામે આવ્યુ છે. આરોપી રાહુલ દુબઈમાં રહીને ઈન્ટરનેશનલ કોલિંગની મિનિટ્સ વેચતો હતો.
આરોપી 35 મહિના દુબઈમાં રહીને ડમી ટેલિફોન એક્સચેન્જ ઓપરેટ કરવાનુ શીખ્યો હતો. જે ઈન્ટરનેશનલ વોઈસ કોલને ડોમેસ્ટિક વોઈસ કોલમાં કન્વર્ટ કરતો હતો. આરોપી ડમી ટેલિફોન એક્સચેન્જ ચલાવનારા 3 આંતરરાષ્ટ્રીય વ્યક્તિઓના સંપર્કમાં હતો. દુબઈમાં વસવાટ કરતા વિદેશીઓ સાથે કમિશન પર ભાગીદારીમાં ધંધો કરતો હોવાનુ પૂછપરછમાં સામે આવ્યુ છે.
આપને જણાવી દઈએ કે તાજેતરમાં મોટેરા સ્ટેડિયમમાં રમાયેલી ભારત-ઓસ્ટ્રેલિયા ક્રિકેટ મેચ વખતે વડાપ્રધાન નરેન્દ્ર મોદી અને ઓસ્ટ્રેલિયાના PMની હાજર રહ્યા હતા અને હજારોની સંખ્યામાં ક્રિકેટ પ્રેમીઓને મેચ ન જોવા માટે ધમકી ભર્યો પ્રિ રેકોર્ડ વોઇસ કલીપ વાયરલ કરી હતી. ત્યારે સાયબર ક્રાઈમ બ્રાંચે આરોપી રાહુલ દ્વિવેદ્રી અને નરેન્દ્ર કુશવાહની ધરપકડ કરી છે. જેમના તાર ખાલીસ્તાનના આતંકવાદી સાથે સંડોવાયેલા છે.
જે પ્રિ-રેકોર્ડેડ વોઇસ કલીપ વાયરલ થઈ હતી તે ખાલીસ્તાન આતંકવાદી ગુરપતવંતસિંહના અવાજવાળી કલીપ હતી. જેમાં મેચ નહીં જોવા અને ‘ઘરમાં રહો, સુરક્ષિત રહો’ એવી ધમકી આપી હતી. આ ઉપરાંત પીએમ મોદીને સંબોધી ઉશ્કેરાટ ભર્યું ભાષણ કરવામાં આવ્યું હતું. પ્રિ રેકોર્ડ ક્લિપને લઈ સાયબર ક્રાઇમ બ્રાન્ચે તપાસ શરૂ કરી હતી ત્યારે ટેક્નિકલ એનાલિસિસ આધારે મધ્યપ્રદેશના સતના જિલ્લા અને રિવા જિલ્લામાંથી નકલી ટેલિકોમ એક્સચેન્જ દ્વારા દહેશત ફેલાવનાર ખાલીસ્તાનના બે સાગરીતોની ઝડપીને સમગ્ર નેટવર્કનો પર્દાફાશ કર્યો.