ભરૂચના ચકચારી ગોલ્ડ ટ્રેડિંગ કૌભાંડમાં ઠગાઇનો આંકડો એક અબજને પાર પહોંચ્યા બાદ હવે આ મામલાની તપાસમાં રાષ્ટ્રીય તપાસ એજન્સીઓ જોડાઈ શકે છે. સૂત્રો અનુસાર આંતરરાષ્ટ્રીય કૌભાંડની આગામી તપાસમાં ED અને IT જેવી એજન્સીઓ ભૂમિકા ભજવી શકે છે. હાલમાં ઝડપાયેલા 6 શખ્શો માત્ર 2-5 હજાર માટે રેકેટમાં મહત્વનો રોલ અદા કરતા હતા. આ પૈસા કોના સુધી પહોંચ્યા? તેનો જવાબ હજુ સુધી પોલીસ શોધી શકી નથી. આંતરરાષ્ટ્રીય કૌભાંડમાં મૂળ સુધી પહોંચવા રાષ્ટ્રીય એજન્સીઓ સક્રિય થાય તેવા સંકેત મળી રહયા છે.
દુબઈ કનેક્શન ધરાવતી ઠગ ટોળકી દેશના 16 રાજ્યમાં સેંકડો હાઈપ્રોફાઈલ લોકો પાસેથી 100 કરોડ કરતા વધુ રૂપિયા પડાવી લીધા છે. આ મામલે ભરૂચ પોલીસે ગેંગનો પર્દાફાશ કર્યા બાદ 96 લોકોએ પોલીસનો સંપર્ક કર્યો છે. ભરૂચ સાઇબર ક્રાઇમ દ્વારા કૃષ્ણકુમાર ઉર્ફે બિંદુ કમલેશ કુમાર તિવારી નામના કોટક મહિન્દ્રા બેંકનાં અધિકારીની ધરપકડ કરવામાં આવી છે. કૃષ્ણકુમાર અને તેના જેવા અન્ય બેંકના ભ્રષ્ટ કર્મચારીઓની મદદથી હાઈપ્રોફાઈલ લોકોના નામ અને કોન્ટેક્ટ નંબર મેળવવામાં આવતા હોવાની પોલીસને શંકા છે.
પોલીસને ચકમો આપવા માટે રૂપિયા અલગ – અલગ એકાઉન્ટમાં ટ્રાન્સફર કરી મુખ્ય સૂત્રધાર સુધી પહોંચાડવામાં આવે છે. ટોળકી દરેક સફળ શિકાર બાદ મોબાઈલ નંબર અને વેબસાઈટ બદલી નાખે છે. આખું રેકેટ દુબઈથી ઓપરેટ થતું હોવાનું અત્યારસુધીની તપાસમાં બહાર આવ્યું છે.
ગુજરાતના તમામ સમાચાર અને બ્રેકિંગ ન્યૂઝ ગુજરાતીમાં વાંચો tv9gujarati.com પર
ગુજરાતના તમામ જિલ્લાના સમાચાર વાંચવા માટે જોડાયેલા રહો…
Published On - 11:52 am, Thu, 30 March 23