Twitterની ઓફિસે બાથરૂમ સિંક લઈને પહોંચ્યા Elon Musk, સોશિયલ મીડિયા પર વાયરલ થયો વીડિયો

હંમેશા પોતાના કામને લઈને ચર્ચામાં રહેતા એલોન મસ્ક આજે ફરી ચર્ચામાં આવ્યા છે. દુનિયાના સૌથી અમીર વ્યક્તિઓમાંથી એક એલોન મસ્કે હાલમાં એક ટ્વિટ કરી છે જેને કારણે તેઓ ફરી ચર્ચામાં આવ્યા છે. એલોન મસ્કે એક વીડિયો શેયર કર્યો છે. જેમાં તેઓ ટ્વિટરના હેડક્વાર્ટરમાં બાથરુમ સિંક હાથમાં લઈને આવતા દેખાય છે. એલોન મસ્ક છેલ્લા ઘણા સમયથી ટ્વિટર સાથેની ડીલને કારણે ચર્ચામાં હતા. તેમનો આ વીડિયો સોશિયલ મીડિયા પર વાયરલ થઈ રહ્યો છે.

એલોન મસ્ક 28 ઓકટોબરના રોજ 44 બિલિયનની ટ્વિટર અધિગ્રહણની ડીલ પૂરી કરશે. તેમણે પોતાના બાયોને પણ ‘ચીફ ટ્વિટ’માં બદલી દીધુ છે. પોતાના ઈનોવેશનને કારણે જાણીતા એલોન મસ્ક ટ્વિટરના સેન ફ્રાન્સિસ્કોમાં સ્થિત મુખ્યાલયમાં પહોંચ્યા હતા. તેમણે ત્યાં જઈને કરેલી અનોખી હરકતનો વીડિયો ટ્વિટર પર શેયર કર્યો હતો.

આ રહ્યો એલોન મસ્કનો વાયરલ વીડિયો

ટ્વિટર પર વીડિયો શેયર કરીને તેમણે લખ્યુ છે કે, Entering Twitter HQ – let that sink in!. જોકે તેમણે આ વાક્ય ક્યા સંદર્ભમાં લખ્યુ તે વિસ્તારથી નથી જણાવ્યુ. પણ તેમની આ વિચિત્ર હરકતનો વીડિયો સોશિયલ મીડિયા પર ભારે વાયરલ થયો છે. શિયલ મીડિયા યુઝર્સ આ વીડિયોને શેયર કરવાની સાથે સાથે તેના પર પોતાની પ્રતિક્રિયા પણ આપી રહ્યા છે.

એલોન મસ્કે બેંકરો સાથે વીડીયો કોન્ફરન્સ કોલમાં શુક્રવાર સુધીમાં તેનું $44 બિલિયન ટ્વિટર એક્વિઝિશન બંધ કરવાનું વચન આપ્યુ છે. રિપોર્ટ અનુસાર, મસ્કને ફંડ ટ્રાન્સફર કરવાના અંતિમ તબક્કામાં બેંકોએ અંતિમ ક્રેડિટ એગ્રીમેન્ટ પૂર્ણ કરી લીધુ છે અને દસ્તાવેજો પર હસ્તાક્ષર કરવાની પ્રક્રિયામાં છે.મીડિયા રિપોર્ટસ અનુસાર, દક્ષિણ કોરિયાના મિરે એસેટ ફાઇનાન્સિયલ ગ્રૂપ એલોન મસ્કના ટ્વિટર સોદા માટે $44 બિલિયનના સોદાને ફાયનાન્સ કરવામાં મદદ કરવા માટે લગભગ 300 બિલિયન કોરિયન વોન ($208 મિલિયન)ની યોજના બનાવી છે.