બ્રિટિશ લગ્નમાં છવાયો ભારતીય સ્વાદ ! ગોરાઓએ પીરસ્યા ઢોસા અને પાણીપુરી, વીડિયો થયો વાયરલ

ભારતીય ભોજનનો જાદુ હવે માત્ર ભારતમાં જ નહીં પરંતુ વિદેશમાં પણ જોવા મળી રહ્યો છે. સોશિયલ મીડિયા પર વાયરલ થયેલા એક વીડિયોએ ભારતીયોને ગર્વ અનુભવવાની તક આપી છે. યુકેના ગ્લોસ્ટરશાયરમાં યોજાયેલા એક લગ્ન સમારંભમાં વિદેશી રસોઇયાઓએ મહેમાનો માટે ગરમાગરમ ઢોસા બનાવ્યા અને ભારતીય અંદાજમાં પાણીપુરી પણ પીરસી હતી.

ભારતીય સ્ટ્રીટ ફૂડનો આનંદ

વાયરલ વીડિયોમાં જોવા મળે છે કે ગોરા રસોઇયાઓ કુશળતાથી તવા પર ઢોસા બનાવી રહ્યા છે, જ્યારે અન્ય સ્ટાફ મહેમાનોને પાણીપુરીનો સ્વાદ માણાવી રહ્યો છે. ખાસ વાત એ છે કે વિદેશી મહેમાનો પણ ભારતીય સ્ટ્રીટ ફૂડનો આનંદ ઉત્સાહપૂર્વક માણતા જોવા મળે છે.

આ વીડિયો ઇન્સ્ટાગ્રામ પર @pappu_dosa નામના એકાઉન્ટ પરથી શેર કરવામાં આવ્યો હતો. કેપ્શનમાં લખવામાં આવ્યું છે કે, “દક્ષિણ ભારતીય ભોજન વિશેનું સત્ય ઢોસા કરતાં પણ વધુ ઝડપથી ફેલાઈ રહ્યું છે. અમે માત્ર અમારી દુકાનમાં જ નહીં પરંતુ કેટરિંગ સેવા પણ આપીએ છીએ.”

રમૂજી અને રસપ્રદ કોમેન્ટ્સ કરી

આ વીડિયોને અત્યાર સુધીમાં 2.2 મિલિયનથી વધુ વ્યૂઝ અને 72 હજારથી વધુ લાઇક્સ મળી ચૂક્યા છે. વીડિયો વાયરલ થતાં ભારતીય યુઝર્સે પણ રમૂજી અને રસપ્રદ કોમેન્ટ્સ કરી હતી. એક યુઝરે લખ્યું, “આ તો યુનો રિવર્સ વસાહતીકરણ છે.” જ્યારે બીજા યુઝરે મજાકમાં કહ્યું, “હવે તો ઢોસાને પણ બ્રિટિશ પાસપોર્ટ મળી ગયો.”

લોકો આશ્ચર્યચકિત થયા

બીજી તરફ, એક સ્થાનિક યુઝરે જણાવ્યું કે આ રેસ્ટોરન્ટ યુકેના બ્રિસ્ટોલમાં આવેલી છે અને અહીંનું દક્ષિણ ભારતીય ભોજન ખરેખર ખૂબ જ સ્વાદિષ્ટ છે. ગોરા રસોઇયાઓને ભારતીય વાનગીઓ એટલી કુશળતાથી બનાવતા જોઈને ઘણા લોકો આશ્ચર્યચકિત થયા હતા.

ભારતીય ભોજનની વધતી વૈશ્વિક લોકપ્રિયતા દર્શાવતો આ વીડિયો સોશિયલ મીડિયા પર લોકોને ખૂબ પસંદ આવી રહ્યો છે.

જુઓ વીડિયો…