M બેવફા ચાયવાલા : પ્રેમમાં છેતરાયા, પછી ખોલી ચાની દુકાન, તુટેલા દિલના પ્રેમીઓને મળે છે ડિસ્કાઉન્ટ

તમે જોયું જ હશે કે પ્રેમમાં છેતરાયા પછી લોકો ઘણીવાર ખતરનાક પગલું ભરે છે. જો કોઈ વ્યક્તિ હતાશામાં રહેવા લાગે તો ઘણા પ્રેમીઓ એવા હોય છે, જે આત્મહત્યાનો પ્રયાસ કરે છે, પરંતુ પ્રેમમાં છેતરાયા પછી લોકો ધંધો કરતા હોય તેવું ભાગ્યે જ જોવા મળે છે. આજકાલ આવા જ દિલધડક પ્રેમીની કહાની સોશિયલ મીડિયા પર ખૂબ જ વાયરલ થઈ રહી છે. હકીકતમાં, મધ્યપ્રદેશના રાજગઢમાં, એક તુટેલા દિલના પ્રેમીએ ખીલચીપુર નગરના બસ સ્ટેન્ડ પર ચાની દુકાન ખોલી છે અને તેણે દુકાનને જે નામ આપ્યું છે તે અદ્ભુત છે. તેણે પોતાના ટી સ્ટોલનું નામ ‘M બેવફા ચાયવાલા’ રાખ્યું છે.

અહેવાલો અનુસાર, યુવકે દુકાનના નામની શરૂઆતમાં M અક્ષર મૂક્યો છે, કારણ કે આ અક્ષરથી તેની ગર્લફ્રેન્ડનું નામ શરૂ થાય છે. તેણે આ અનોખું નામ માત્ર તેની એક્સ ગર્લફ્રેન્ડને ચીડવવા માટે જ નહીં, પરંતુ ગ્રાહકોને પોતાની તરફ આકર્ષવા માટે રાખ્યું છે.

તુટેલા દિલના પ્રેમીઓને ઓછી કિંમતમાં મળે છે ચા

અનોખા નામની આ ચાની દુકાનની ખાસિયત એ છે કે, અહીં પ્રેમમાં બેવફાઈ કરનારા લોકોને ઓછી કિંમતે ચા મળે છે. જો કે ચાની કિંમત 5 અને 10 રૂપિયા રાખવામાં આવી છે, પરંતુ જ્યાં પ્રેમી યુગલોને ચા માટે 10 રૂપિયા ચૂકવવા પડે છે, પણ તુટેલા દિલના પ્રેમીઓને ચા પર 5 રૂપિયાની ઓફર મળે છે, એટલે કે તેમને માત્ર 5 રૂપિયામાં ચા મળે છે. દુકાન ચલાવનારા યુવકનું નામ અંતર ગુર્જર છે.

પ્રેમિકાએ છોડ્યો તો બની ગયો ચા વાળો

મીડિયા રિપોર્ટ્સ અનુસાર, યુવક લગભગ 5 વર્ષ પહેલાં એક લગ્ન સમારંભમાં એક યુવતીને મળ્યો હતો. ત્યારપછી બંનેની મિત્રતા થઈ અને પછી મોબાઈલ પર તેમની વચ્ચે સતત વાતચીત થતી રહી. આ દરમિયાન યુવકે યુવતી સાથે લગ્ન કરવાનું સપનું પણ જોયું હતું, પરંતુ યુવતીની સગાઈ બીજા છોકરા સાથે થતાં તેનું સપનું ચકનાચૂર થઈ ગયું હતું. પ્રેમમાં હોવા છતાં યુવતીએ તેની સાથે લગ્ન કરવાની સ્પષ્ટ ના પાડી દીધી અને તેનું સૌથી મોટું કારણ યુવક બેરોજગાર હતો.

પછી શું, યુવક તેની ગર્લફ્રેન્ડ દ્વારા મળેલા આ વિશ્વાસઘાતને ભૂલી શક્યો નહીં અને તેણે આત્મહત્યા કરવાનું વિચાર્યું, પરંતુ તેના મિત્રોએ તેને પ્રોત્સાહન આપ્યું અને સલાહ આપી કે બેવફા પ્રેમિકાને કંઈક બનીને બતાવ. અહેવાલો અનુસાર, પ્રેમમાં બેવફાઈ મળ્યા બાદ લગભગ દોઢ વર્ષ પછી તેણે ચાની દુકાન ખોલી અને તેનું નામ ‘M બેવફા ચાયવાલા’ રાખ્યું.