આંતરરાષ્ટ્રીય ફોર્મ્યુલા કાર રેસિંગનો ક્રેઝ ભારતમાં શરુ થઇ ચુક્યો છે. જેનુ પ્રથમ પગથિયા રુપ હૈદરાબાદમાં દેશની પ્રથમ ફોર્મ્યુલા 4 ઇન્ડીયન ચેમ્પિયનશીપ (Formula 4 Indian Championship) અને ફોર્મ્યુલા ઇન્ડીયન રીઝનલ ચેમ્પિયનશીપ (Formula Regional Indian Championship) લોન્ચ કરવામાં આવી છે. રવિવારે FIA દ્વારા ગ્રેટ સ્ટ્રીટ સર્કીટ પર ગ્રાંડ ચેમ્પિયનશીપનો પ્રારંભ કરવામાં આવ્યો હતો. ચેમ્પિયનશીપ આગળના વર્ષે ફેબ્રુઆરી-માર્ચમાં ચાર શહેરો માં આયોજીત થનાર છે. જે ચાર શહેરોમાં નવી દિલ્હી, ચેન્નાઇ, કોયમ્બતૂર અને હૈદરાબાદનો સમાવેશ થાય છે.
હૈદરાબાદ શહેર પોલીસ કમિશ્નર અંજની કુમારે ધ્વજ ફરકાવવા સાથે F3 સ્ટ્રીટ સર્કિટ રેસ નો પ્રારંભ કરવામાં આવ્યો હતો. આ રેસમાં ભાગ લેનારા ભારતીય વિજેતાઓને FIA સુપર લાયસન્સ પોઈન્ટ આપવામાં આવનાર છે. જેના થી ભારતીય રેસરો આંતરરાષ્ટ્રીય ફોર્મ્યુલા સિરીઝમાં ભાગ લઈ શકશે.
શહેરના પ્રખ્યાત કેબલ બ્રિજથી શરૂ થયેલી રેસ ઝડપથી સમાપ્ત થઈ ગઇ હતી. દર્શકો પણ ગાડીઓની ઝડપ અને શક્તિ થી પ્રભાવિત થયા હતા. આ સાથે, હૈદરાબાદમાં ફોર્મ્યુલા ઇન્ડીયન રિજનલ ચેમ્પિયનશિપ અને મોટર સ્પોર્ટ્સમાં ફોર્મ્યુલા 4 ઇન્ડીયન ચેમ્પિયનશિપ ફરી થી શરૂ થઈ છે.
રેસિંગ પ્રમોશનના પ્રમુખ, અખિલેશ રેડ્ડીએ કહ્યું, આપણી વસ્તી સવાસો કરોડ છે. અમે હવે પ્રતિભાશાળી રેસિંગ ડ્રાઇવરો માટે પ્લેટફોર્મ તૈયાર કર્યુ છે. વિશ્વના શ્રેષ્ઠ રેસરો સાથે સ્પર્ધા કરવા અને એફ 1 મોટર સ્પોર્ટ્સના ટોચ પર પહોંચવા માટે એ શ્રેષ્ઠ પ્લેટફોર્મ છે.
અમે મોટરસ્પોર્ટ્સના લાંબા ગાળાના વિકાસમાં રોકાણ કરવા અને ભારતમાં રેસિંગ ડ્રાઈવરો માટે મહત્ત્વપૂર્ણ મંચ નક્કી કરવા માટે પ્રતિબદ્ધ છીએ. અખિલેશ રેડ્ડીએ કહ્યું કે રેસિંગની પ્રથમ સીઝન 22 ફેબ્રુઆરી-માર્ચ નવી દિલ્હી, ચેન્નઈ, કોઈમ્બતુર અને હૈદરાબાદમાં યોજાશે અને વૈશ્વિક રેસિંગ પ્રતિભાઓને આકર્ષીત કરશે.
આગળ કહ્યુ, RPPL ના ઉપાધ્યક્ષ અને મેનેજિંગ ડિરેક્ટર નવજીત ગાડોકેએ કહ્યું, અમારું રોકાણ ભારતીય મોટર સ્પોર્ટ્સમાં ક્રાંતિ લાવશે. તેમણે કહ્યું કે મોટર સ્પોર્ટ્સ માટે વર્લ્ડ ક્લાસ સિસ્ટમ બનાવવાનો અને ભારતમાં રમતને વધુ લોકપ્રિય બનાવવાનો હેતુ છે.
ભૂતપૂર્વ ફોર્મ્યુલા વન રેસ ડ્રાઈવર નરેન કાર્તિકેયન અને 1983 વર્લ્ડ કપ વિજેતા ટીમ ઈન્ડિયાના કેપ્ટન કપિલ દેવને ભારતીય ફોર્મ્યુલા રેસ એમ્બેસેડર તરીકે નિમણૂક કરવામાં આવી છે.