બેન સ્ટોક્સની ODI ટીમમાં વાપસી બાદ જોફ્રા આર્ચરે આવું કેમ કહ્યું – ઈંગ્લેન્ડે કર્યું ખોટું?

ઈંગ્લેન્ડે (England) ODI વર્લ્ડ કપ માટે પ્રારંભિક ટીમની પસંદગી કરી છે. આ ટીમની સૌથી મોટી વાત બેન સ્ટોક્સની વાપસી છે. બેન સ્ટોક્સ (Ben Stokes) ODI વર્લ્ડ કપ રમવા માટે નિવૃત્તિમાંથી પરત ફર્યો છે. તેણે જુલાઈ 2022માં ODIમાંથી નિવૃત્તિ જાહેર કરી હતી. પરંતુ, હવે તે 2023ના વર્લ્ડ કપ (World Cup 2023) માં નિષ્ણાત બેટ્સમેન તરીકે રમતો જોવા મળશે.

બેન સ્ટોક્સ IN, હેરી બ્રુક OUT

હવે દરેક વસ્તુની બે બાજુ હોય છે. તો ઈંગ્લેન્ડની ODI ટીમમાં સ્ટોક્સની એન્ટ્રી સાથે પણ આવું જ થયું છે, જેને જોઈને ઝડપી બોલર જોફ્રા આર્ચર પણ આશ્ચર્યચકિત થઈ ગયો છે. તેણે કહ્યું કે ઈંગ્લેન્ડ ક્રિકેટ બોર્ડે આ બિલકુલ ખોટું કર્યું છે.

ઇંગ્લિશ ફાસ્ટ બોલરે આપ્યો અભિપ્રાય

જોફ્રા આર્ચરને પણ ઈંગ્લેન્ડની ODI વર્લ્ડ કપ ટીમમાં સ્થાન મળ્યું નથી. જો કે, આ ઇંગ્લિશ ફાસ્ટ બોલરને એટલો અફસોસ નથી જેટલો તેને સ્ટોક્સ ટીમમાં જોડાયા પછી કોઈની સાથે થયેલો અન્યાય જોઈને થાય છે. વાસ્તવમાં સ્ટોક્સના આગમન સાથે હેરી બ્રુકનું ODI વર્લ્ડ કપ રમવાનું સપનું ચકનાચૂર થઈ ગયું છે. તેને 15 સભ્યોની ટીમમાં સ્થાન મળ્યું નથી અને આર્ચર આ નિર્ણયથી શોકમાં છે.

હેરી બ્રુક સાથે જે બન્યું તેનાથી જોફ્રા આર્ચર નિરાશ

જોફ્રા આર્ચરે BBC સાથેની ખાસ વાતચીતમાં કહ્યું કે હેરી બ્રુક સાથે આવું ન થવું જોઈતું હતું. ઈંગ્લેન્ડે તેને ODI ટીમમાંથી બહાર કરીને જે કર્યું તે ઘણું ખોટું હતું. હું હજુ પણ વિશ્વાસ કરી શકતો નથી કે બ્રુક ટીમમાં નથી. ECB પસંદગીકારોના આ નિર્ણયે મને હચમચાવી દીધો છે.

બ્રુકે પ્રથમ 3 ODIમાં 80 રનની ઇનિંગ રમી

તે સ્પષ્ટ છે કે સ્ટોક્સને પસંદ કરીને અને હેરી બ્રુકને છોડીને, ઇંગ્લેન્ડે યુવા જોશ કરતાં અનુભવને પ્રાધાન્ય આપવાનો પ્રયાસ કર્યો છે. પરંતુ, શું આ યુવા ખેલાડી સાથે ન્યાય છે, જેણે પોતાની ડેબ્યૂ સીરિઝની પ્રથમ 3 મેચમાં 80 રનની મોટી ઇનિંગ રમી છે. બ્રુકે આ વર્ષે દક્ષિણ આફ્રિકા સામેની 3 મેચની ODI શ્રેણીમાં ડેબ્યૂ કર્યું હતું.

બ્રુકને પડતો મૂકવો એક અઘરો નિર્ણય

સ્ટોક્સની વાપસીના પરિણામ સ્વરુપે ઈંગ્લેન્ડના ભૂતપૂર્વ કેપ્ટન માઈક આથર્ટન પણ હેરી બ્રુકના ODI વર્લ્ડ કપ ટીમમાંથી બહાર થવાના નિર્ણય પર વિચાર કરી રહ્યા છે. લ્યુક રાઈટે કહ્યું કે આ નિર્ણય લેવો મુશ્કેલ હતો. બ્રુક એક પ્રતિભાશાળી ક્રિકેટર છે. તે ત્રણેય ફોર્મેટમાં ઈંગ્લેન્ડ માટે રમનાર ખેલાડી છે. પરંતુ, સ્ટોક્સના આગમન પછી, અમારે એક નિષ્કર્ષ પર પહોંચવાનું હતું, તેથી અમે આ નિર્ણય લીધો હતો.

આ પણ વાંચો : Rishabh Pant: કાર અકસ્માત બાદ પહેલીવાર મેદાનમાં રમવા ઉતર્યો રિષભ પંત, ફટકારી શાનદાર સિક્સર, જુઓ Video

બેન સ્ટોક્સ હવે નિષ્ણાત બેટ્સમેન તરીકે રમશે

બેન સ્ટોક્સ ઈંગ્લેન્ડ માટે અત્યાર સુધીમાં 105 ODI રમી ચૂક્યો છે, જેમાં તેણે 3 સદી અને 21 અડધી સદીની મદદથી 2924 રન બનાવ્યા છે. અત્યાર સુધી તે ટીમમાં ઓલરાઉન્ડરની ભૂમિકામાં હતો. પરંતુ, આ વખતે તે નિષ્ણાત બેટ્સમેન તરીકે રમશે. મતલબ કે તેનું સંપૂર્ણ ધ્યાન તેની બેટિંગ પર રહેશે.