Supernovas vs Velocity Final WT20 Challenge 2022 Report: સુપરનોવાઝ ત્રીજીવાર ચેમ્પિયન બન્યુ, વેલોસિટીનુ ફરી એકવાર તુટ્યૂ સપનુ

વિમેન્સ T20 ચેલેન્જ ટુર્નામેન્ટ (Women’s T20 Challenge 2022) માં, સુપરનોવાઝે ફરી એકવાર પોતાનું વર્ચસ્વ જાળવી રાખ્યું અને ટાઇટલ કબજે કર્યું. પુણેમાં શનિવારે રમાયેલી ફાઇનલમાં હરમનપ્રીત કૌરની આગેવાની હેઠળની સુપરનોવાઝે (Supernovas) પોતાની જબરદસ્ત બોલિંગના જોરે રોમાંચક મેચમાં વેલોસિટીને 4 રનથી હરાવ્યું હતું. આ રીતે, સુપરનોવાઝે ટૂર્નામેન્ટની ચોથી સિઝનમાં જ ત્રીજી વખત ટાઇટલ જીત્યું. તે જ સમયે, ફાઇનલમાં ફરી એકવાર વેલોસિટી (Velocity) નિરાશ થઈ અને પ્રથમ ટાઇટલની રાહ વધુ વધી. વેસ્ટ ઈન્ડિઝની દિગ્ગજ ખેલાડી ડીઆન્ડ્રા ડોટીન (62 રન, 2 વિકેટ) ની ઉત્તમ ઓલરાઉન્ડ રમતે સુપરનોવાઝને ચેમ્પિયનશિપ સુધી પહોંચવામાં મદદ કરી. જો કે લૌરા વૂલફોર્ડ (અણનમ 65 રન) અને સિમરન બહાદુરે (20 રન અણનમ) અંતમાં શાનદાર ભાગીદારીના આધારે ટીમને જીત અપાવવાનો સારો પ્રયાસ કર્યો હતો, પરંતુ અંતે તે પૂરતું નહોતું.

મહારાષ્ટ્ર ક્રિકેટ એસોસિએશન સ્ટેડિયમમાં 28 મેના રોજ રમાયેલી આ ફાઇનલમાં વેલોસિટીને 166 રનનો ટાર્ગેટ હતો, પરંતુ ટીમનો ટોપ ઓર્ડર સંપૂર્ણપણે નિષ્ફળ ગયો હતો. શેફાલી વર્મા, યાસ્તિકા ભાટિયા અને કિરણ નવગીરે પાવરપ્લેમાં માત્ર 38 રન બનાવીને પેવેલિયન પરત ફર્યા હતા. તે જ સમયે, કેપ્ટન દીપ્તિ શર્મા સહિત ટીમની 5 વિકેટ માત્ર 64 રનમાં જ ગુમાવી દીધી હતી અને આવી સ્થિતિમાં, દક્ષિણ આફ્રિકાની દિગ્ગજ બેટ્સમેન લૌરા વુલફોર્ડ (65 રન, 40 બોલ, 5 ચોગ્ગા, 3 છગ્ગા) એ એક છેડેથી બાજી સંભાળવા પ્રયાસ કર્યો હતો. લૌરા અને સ્નેહ રાણા વચ્ચે છઠ્ઠી વિકેટ માટે 40 રનની ભાગીદારી થઈ હતી, જેણે વેલોસિટીને 104 રન સુધી પહોંચાડી હતી, પરંતુ અહીં ફરી ઈનિંગ ખોરવાઈ ગઈ અને 117 રનમાં 8 વિકેટ પડી ગઈ.

વૂલફોર્ડ-સિમરનનો જબરદસ્ત પ્રયાસ

અહીંથી નવ નંબરના બેટ્સમેન સિમરન બહાદુરે (20 રન, 10 બોલ, 3 ચોગ્ગા, 1 છગ્ગા) વૂલફોર્ડને ટેકો આપ્યો અને ટીમને જીતની ખૂબ નજીક પહોંચાડી દીધી. સિમરને 19મી ઓવરમાં સતત ત્રણ ચોગ્ગા ફટકાર્યા, આ ઓવરમાં વેલોસિટીને 17 રન આપ્યા. આવી સ્થિતિમાં છેલ્લી ઓવરમાં 17 રનની જરૂર હતી. સોફી એક્લેસ્ટનના પહેલા જ બોલ પર વૂલફોર્ડે સિક્સર ફટકારી હતી. પરંતુ આ પછી વિશ્વની નંબર વન બોલરે વધુ તક આપી નહીં અને વેલોસિટીને 161 રનમાં રોકીને ખિતાબ જીતી લીધો. સ્પિનર્સ એલાના કિંગ (3/32) અને એક્લેસ્ટન (2/28) સુપરનોવા માટે સૌથી સફળ રહ્યા હતા.

ડોટિન-હરમનપ્રીતની દમદાર ઇનિંગ્સ

આ પહેલા સુપરનોવાસે ફરી એકવાર પોતાના ટોપ ઓર્ડરની તાકાત બતાવી હતી. ઓપનર ડિઆન્ડ્રા ડોટિન (62 રન, 44 બોલ, 1 ફોર, 4 સિક્સ) અને કેપ્ટન હરમનપ્રીત કૌર (43 રન, 29 બોલ, 1 ફોર, 3 સિક્સ)ની આક્રમક બેટિંગ ટીમને મોટા સ્કોર તરફ લઈ ગઈ. જો કે, બાદમાંના બેટર તેને ચાલુ રાખી શક્યા ન હતો અને આ જ કારણ હતું કે 15 ઓવરમાં 131 રન અને માત્ર 2 વિકેટ ગુમાવ્યા બાદ પણ ટીમ સાત વિકેટે 165 રન જ બનાવી શકી હતી.

બે જીવનનો ફાયદો ઉઠાવતા ડોટિને તેની 44 બોલની ઇનિંગમાં એક ફોર અને ચાર સિક્સર ફટકારી હતી, જ્યારે હરમનપ્રીતે 29 બોલની ઇનિંગમાં એક ફોર અને ત્રણ સિક્સર ફટકારી હતી. બંનેએ બીજી વિકેટ માટે 5.3 ઓવરમાં 58 રનની ભાગીદારી કરી હતી. ડોટિને અગાઉ ઓપનર પ્રિયા પુનિયા (29 બોલમાં 28 રન) સાથે ઓપનિંગ વિકેટ માટે 73 રનની ભાગીદારી કરીને ટીમને શાનદાર શરૂઆત અપાવી હતી. સુપરનોવાઝે છેલ્લી 5 ઓવરમાં માત્ર 34 રન બનાવ્યા અને 5 વિકેટ ગુમાવી દીધી. વેલોસિટી માટે કેટ ક્રોસ, દીપ્તિ શર્મા અને સિમરન દિલ બહાદુરે બે-બે વિકેટ લીધી હતી.