TV9 GUJARATI | Edited By: Avnish Goswami
Dec 06, 2021 | 11:36 AM
ભારતે ન્યુઝીલેન્ડને હરાવીને ન માત્ર સીરીઝ પર કબજો કર્યો પરંતુ કેટલાક રેકોર્ડ પણ તોડ્યા છે. આમાં તેની સૌથી મોટી જીતનો રેકોર્ડ નોંધાયો હતો, જ્યારે આ સાથે જ તેના દ્વારા હોમ ગ્રાઉન્ડ પર છેલ્લા 8 વર્ષથી તેનું શાસન અકબંધ રહ્યું હતું.
મુંબઈ ટેસ્ટમાં ભારતે ન્યુઝીલેન્ડને 372 રને હરાવ્યું. રનના હિસાબે ભારતની આ સૌથી મોટી જીત છે. આ પહેલા રનના મામલે ભારતની સૌથી મોટી જીતનો રેકોર્ડ સાઉથ આફ્રિકા સામે હતો.
2015માં ભારતે દક્ષિણ આફ્રિકા સામે દિલ્હીમાં રમાયેલી ટેસ્ટ મેચ 337 રને જીતી હતી. પરંતુ આજે 6 વર્ષ બાદ રનના માર્જીનથી જીતનો આ મોટો રેકોર્ડ આજે તૂટ્યો છે.
ન્યુઝીલેન્ડ સામે જીતેલી ટેસ્ટ શ્રેણી એ ભારતીય ટીમની ઘરઆંગણે સતત 14મી ટેસ્ટ શ્રેણી જીત છે. વર્ષ 2013થી લઈને અત્યાર સુધીના પ્રવાસમાં ભારતે આ તમામ જીત હાંસલ કરી છે. ભારતે 2013થી ઘરઆંગણે ટેસ્ટ શ્રેણી ગુમાવી નથી.
ભારત અને ન્યુઝીલેન્ડ વચ્ચે કાનપુરમાં રમાયેલી સિરીઝની પ્રથમ ટેસ્ટ મેચ ડ્રો રહી હતી. આ મેચ એક વિકેટ માટે ભારતે જીતની નજીક આવીને ચૂકી હતી.
મુંબઇ ટેસ્ટ મેચમાં ભારતીય ટીમે ન્યુઝીલેન્ડ સામે આપેલો વિશાળ પડકાર કિવી ટીમ માટે અશક્ય હતો. પ્રથમ દાવમાં કિવી બેટ્સમેનોને અશ્વિન અને સિરાજની જોડીએ 62 રનમાં જ પેવેલિયન મોકલી દેતા જ ભારતીય ટીમની જીત નિશ્વિત દેખાઇ રહી હતી.