England vs Pakistan Final match: પાકિસ્તાને ફાઈનલમાં ઇંગ્લેન્ડ સામે 138 રનનુ આપ્યુ લક્ષ્ય, કુરને 3 વિકેટ ઝડપી

ટી20 વિશ્વકપ 2022 માં પાકિસ્તાન અને ઈંગ્લેન્ડ વચ્ચે ફાઈનલ મેચ મેલબોર્નમાં રમાઈ રહી છે. ઈંગ્લેન્ડના કેપ્ટન બેન સ્ટોકે ટોસ જીતીને પ્રથમ ફિલ્ડીંગ પસંદ કરી હતી. પાકિસ્તાની ટીમની શરુઆત ખરાબ રહી હતી. સેમ કરને જબરદસ્ત બોલીંગ કરીને 3 વિકેટ ઝડપી હતી, જ્યારે આદીલ રાશીદે 2 વિકેટ મેળવી હતી.

નિર્ધારીત 20 ઓવરમાં 8 વિકેટ ગુમાવીને માત્ર 137 રન નોંધાવ્યા હતા. આમ પાકિસ્તાને ઇંગ્લેન્ડને આસાન સ્કોર આપ્યો હતો. શાન મસૂદે સૌથી વધુ 38 રન નોંધાવ્યા હતા. જ્યારે કરને 3 વિકેટ ઝડપી હતી.

બાબર-રિઝવાનની જોડી ઝડપથી તોડવામા કરન સફળ

પાકિસ્તાનની શરુઆત ખરાબ રહી હતી. ઓપનીંગ જોડી 29 રનના સ્કોર પર જ તુટી ગઈ હતી. મોહમ્મદ રિઝવાન 15 રન નોંધાવીને પરત ફર્યો હતો. તેને સેમ કરને બોલ્ડ કરી દીધો હતો. આમ બાબર આઝમ અને રિઝવાનની જોડી તૂટતા જ ઈંગ્લેન્ડને રાહત શરુ થઈ ગઈ હતી. ત્યાર બાદ બીજી વિકેટના રુપમાં મોહમ્મદ હારિસની વિકેટ ગુમાવી હતી. જ્યારે બાબર આઝમ 12 મી ઓવરમાં પેવેલિયન પરત ફર્યો હતો.

બાબરની વિકેટ આદીલ રશીદે ઝડપી હતી. બાબરે 28 બોલમાં 32 રન નોંધાવ્યા હતા. આ દરમિયાન 2 ચોગ્ગા નોંધાવ્યા હતા. બાબરની વિકેટ બાદ પાકિસ્તાનની ગતિ સંપૂર્ણ પણે ધીમી થઈ ગઈ હતી અને એક બાદ એક વિકેટનો સિલસિલો શરુ થઈ ગયો હતો.

કરન, રાશીદ અને જોર્ડને કહેર વર્તાવ્યો

બાબર બાદ ઈફ્તિખાર અહેમદ પણ શૂન્યમાં પરત ફર્યો હતો. તેણે 6 બોલ રમીને એક પણ રન બનાવ્યા વિના જ વિકેટ ગુમાવી હતી. મસૂદે સૌથી વધુ રન નોંધાવ્યો હતો. મસૂદે 38 રન 28 બોલનો સામનો કરીને 1 છગ્ગા અને 2 ચોગ્ગાની મદદથી બનાવ્યા હતા. તેને શાદાબ ખાને સાથ પૂરાવ્યો હતો પરંતુ તે પણ 20 રનનુ યોગદાન નોંધાવી પરત ફર્યો હતો. જોકે અંતિમ ઓવરોમાં પણ પાકિસ્તાને વિકેટો ગુમાવી હતી અને રન નહીં નિકળતા આસાન લક્ષ્ય ઇંગ્લેન્ડ સામે રાખ્યુ હતુ.

4 ઓવરમાં સેમ કરને માત્ર 12 રન જ આપ્યા હતા અને 3 વિકેટ ઝડપી હતી. જ્યારે આદિલ રાશીદે 4 ઓવરમાં 22 રન ગુમાવીને 2 વિકેટ ઝડપી હતી. રાશીદે એક ઓવર મેઈડન કરી હતી. ક્રિસ જોર્ડને પણ 4 ઓવરમાં 27 રન ગુમાવીને 2 વિકેટ ઝડપી હતી. બેન સ્ટોક્સે 32 રન 4 ઓવરમાં આપીને 1 વિકેટ ઝડપી હતી. આમ કરન અને રાશીદે પાકિસ્તાની બેટ્સમેનો માટે મુશ્કેલી સર્જી દીધી હતી.