ધોની-સચિન પછી હવે આ ક્રિકેટર પર આવી રહી છે ફિલ્મ, ભારત છોડવાની પડી હતી ફરજ

ભારતમાં ક્રિકેટ સૌથી વધુ રમાતી અને જોવાતી રમત છે. ચાહકો ઘણા ક્રિકેટ દિગ્ગજોને પોતાનો રોલ મોડેલ માને છે. જેના કારણે તેમની જીવનકથાઓએ ફિલ્મ નિર્માતાઓને દેશભરના ચાહકોને આકર્ષિત કરતી બાયોપિક બનાવવા માટે પ્રેરણા આપી છે. એમએસ ધોની, સચિન તેંડુલકર, મોહમ્મદ અઝહરુદ્દીન, મિતાલી રાજ અને પ્રવીણ તાંબે એવા ક્રિકેટરો છે જેમના પર અત્યાર સુધી ફિલ્મો બની છે. હવે આ યાદીમાં વધુ એક ભારતીય ખેલાડીનું નામ ઉમેરવા જઈ રહ્યું છે.

ઉન્મુક્ત ચંદના જીવન પર ફિલ્મ

ભૂતપૂર્વ ભારતીય ક્રિકેટર ઉન્મુક્ત ચંદના જીવન પર આધારિત ડોક્યુમેન્ટરી ફિલ્મ ‘અનબ્રોકન: ધ ઉન્મુક્ત ચંદ સ્ટોરી’ 12 સપ્ટેમ્બરના રોજ દેશભરના સિનેમાઘરોમાં રિલીઝ થવા જઈ રહી છે. રાઘવ ખન્ના દ્વારા દિગ્દર્શિત આ ફિલ્મ PVRના સહયોગથી ચાહકો સુધી પહોંચશે. આ ડોક્યુમેન્ટરી ફિલ્મ માત્ર ક્રિકેટ પ્રેમીઓ માટે જ નહીં પરંતુ જીવનમાં નિષ્ફળતાઓ પછી ફરીથી ઉભા થવાની હિંમત ધરાવતા તમામ લોકો માટે પ્રેરણાનો સ્ત્રોત છે.

‘અનબ્રોકન: ધ ઉન્મુક્ત ચંદ સ્ટોરી’

અનબ્રોકન ફિલ્મ ઉન્મુક્ત ચંદના જીવનમાં આવેલા ઉતાર-ચઢાવને દર્શાવે છે, જેણે 2012માં અંડર-19 વર્લ્ડ કપમાં ભારતને જીત અપાવી હતી. તે સમયે તેને ભારતીય ક્રિકેટના આગામી સુપરસ્ટાર માનવામાં આવતો હતો, પરંતુ તે ક્યારેય ટીમ ઈન્ડિયામાં પોતાનું સ્થાન બનાવી શક્યો નહીં. જેના કારણે 28 વર્ષની ઉંમરે, તેણે ભારતીય ક્રિકેટમાંથી નિવૃત્તિ લેવાનું અને અમેરિકામાં નવી તકો શોધવાનું નક્કી કર્યું. આ ફિલ્મ તેની શરૂઆતની સફળતા, નિષ્ફળતાઓ અને તેના સપનાઓને ફરીથી જીવવાની હિંમત પર આધારિત છે.

ઉન્મુક્ત ચંદની ક્રિકેટ કારકિર્દી

ઉન્મુક્ત ચંદે અત્યાર સુધીમાં 67 ફર્સ્ટ ક્લાસ મેચ, 120 લિસ્ટ A મેચ અને 99 ટી20 મેચ રમી છે. આ દરમિયાન તેણે 9000 થી વધુ રન બનાવ્યા છે. તે IPLમાં પણ રમી ચૂક્યો છે. જોકે, તેને હજુ સુધી યુએસ ટીમ માટે આંતરરાષ્ટ્રીય ક્રિકેટમાં પ્રવેશવાની તક મળી નથી.

આ પણ વાંચો: વિરાટ કોહલી અને અનુષ્કા શર્માને કેફેમાંથી બહાર કાઢી મૂકવામાં આવ્યા, ભારતીય ખેલાડીનો ચોંકાવનારો ખુલાસો

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો