વેસ્ટ ઈન્ડિઝ સામેની ત્રણ મેચની ODI શ્રેણી પહેલા ભારતીય ક્રિકેટ ટીમમાં એક મહત્વપૂર્ણ ફેરફાર થયો છે. ગુવાહાટીમાં બીજી ODI દરમિયાન ફાસ્ટ બોલર પ્રસિદ્ધ કૃષ્ણાને હેમસ્ટ્રિંગમાં ઈજા થઈ હતી, ત્યારબાદ પસંદગીકારોએ તેના સ્થાને અન્ય એક ખેલાડીની પસંદગી કરી છે. મીડિયા રિપોર્ટ્સ અનુસાર, ઝડપી બોલર અંશુલ કંબોજને તેના સ્થાને સિનિયર ભારતીય ટીમમાં સામેલ કરવામાં આવ્યો છે.

અંશુલ કંબોજે અધવચ્ચે જ મેચ છોડી દીધી

અહેવાલો અનુસાર, અંશુલ કંબોજ પુડુચેરીમાં ઓસ્ટ્રેલિયા A સામેની બીજી બિનસત્તાવાર ટેસ્ટ મેચમાં રમી રહ્યો હતો. આ મેચ 30 સપ્ટેમ્બરના રોજ શરૂ થઈ હતી અને તે ભારત A ની પ્લેઇંગ ઇલેવનનો ભાગ હતો. જોકે, નેશનલકોલ-અપ મળ્યા પછી તરત જ કંબોજ મેચ અધવચ્ચે છોડીને ભારતીય ટીમમાં જોડાવા માટે ચાલ્યો ગયો. તેના સ્થાને પ્રફુલ હિંજને ભારત A ની પ્લેઇંગ ઇલેવનમાં સામેલ કરવામાં આવ્યો છે.

અંશુલ કંબોજ સારા ફોર્મમાં

પુડુચેરી ટેસ્ટમાં અંશુલ કંબોજ સારા ફોર્મમાં હતો. પ્રથમ ઇનિંગમાં કંબોજે શાનદાર બોલિંગ કરી હતી. તેણે 17.3 ઓવરમાં માત્ર 34 રન આપીને ત્રણ મહત્વપૂર્ણ વિકેટ લીધી હતી. જોકે, બીજી ઇનિંગમાં તે ફક્ત બે ઓવર જ નાખી શક્યો, કારણ કે તેને તરત જ સિનિયર ODI ટીમમાં બોલાવવામાં આવ્યો અને તેને મેદાન છોડવું પડ્યું હતું.

શ્રેણીની છેલ્લી મેચ ચંદીગઢમાં રમાશે

ભારતીય ટીમે ત્રણ મેચની ODI શ્રેણીમાં 2-0થી અજેય લીડ મેળવી લીધી છે અને ટ્રોફી પોતાના નામે કરી લીધી છે. શ્રેણીની ત્રીજી અને અંતિમ મેચ 3 ઓક્ટોબરે ન્યૂ ચંદીગઢમાં રમાશે. પ્રસિદ્ધ કૃષ્ણાની ઈજા અને નમન ધીરના ખેંચાણ પછી ભારતીય ફાસ્ટ બોલિંગ ટીમમાં કંબોજનો સમાવેશ એક નવો અને મજબૂત વિકલ્પ પૂરો પાડે છે.

કંબોજને પ્લેઇંગ ઇલેવનમાં તક મળશે?

કેપ્ટન શુભમન ગિલ અને ટીમ મેનેજમેન્ટ 3 ઓક્ટોબરે કંબોજને પ્લેઇંગ ઇલેવનમાં ડેબ્યૂ કરવાની તક આપે છે કે નહીં તે જોવું રસપ્રદ રહેશે. અંશુલ કંબોજે અત્યાર સુધી ટીમ ઇન્ડિયા માટે એક ટેસ્ટ મેચ રમી છે, પરંતુ ODI ફોર્મેટમાં આ તેની પહેલી તક હોઈ શકે છે.

Breaking News: ડે-ટેસ્ટમાં પિંક બોલ, સમય બગાડવા પર સજા… ICCએ ક્રિકેટના નિયમોમાં કર્યા ફેરફાર