Breaking News : IND vs AUS : ઓસ્ટ્રેલિયા સામે શ્રેયસ અય્યર-શુભમન ગિલની દમદાર સદી
ઈન્દોર વનડેમાં ટીમ ઈન્ડિયાના બે સ્ટાર ખેલાડીઓ શ્રેયસ અય્યર અને શુભમન ગિલે સદી ફટકારી હતી. બંને સદી ફટકાર્યા બાદ લાંબો સમય ટકી શક્યા નહીં અને બંનેએ વિકેટ ગુમાવી હતી, પરતું તે પહેલા બંને પોતાનું કામ કરી ગયા હતા અને ભારતને મોટા સ્કોર તરફ અગ્રેસર કર્યું હતું.
ભારત અને ઓસ્ટ્રેલિયા (Australia) વચ્ચે ચાલી રહેલ ત્રણ મેચની વનડે સીરિઝની બીજી મેચમાં બે ભારતીય ખેલાડીઓએ સદી ફટકાતી ટીમને મજબૂત સ્થિતિમાં પહોંચાડી હતી. ઈજા બાદ કમબેક કરનાર ટીમ ઈન્ડિયાના મજબૂત બેટ્સમેન શ્રેયસ અય્યરે (Shreyas Iyer) લાંબા સમય બાદ સદી ફટકારી હતી અને વર્લ્ડ કપ પહેલા જરૂરી ફોર્મ પરત મેળવ્યું હતું, જ્યારે ઓપનિંગ બેટ્સમેન શુભમન ગિલે (Shubman Gill) પણ શાનદાર ફોર્મ ચાલુ રાખતા ઓસ્ટ્રેલિયા સામે દમદાર સદી ફટકારી હતી.
શ્રેયસ અય્યરની વિસ્ફોટક સદી
વર્લ્ડ કપ પહેલા શ્રેયસ અય્યર ફોર્મમાં આવી ગયો છે અને તેણે ઈન્દોર વનડેમાં વિસ્ફોટક સદી ફટકારી છે. ઓસ્ટ્રેલિયા સામેની બીજી વનડેમાં મોટા ખેલાડીઓ નથી રમી રહ્યા, આવી સ્થિતિમાં આ સદી ખાસ બની જાય છે. પહેલી મેચમાં શ્રેયસ માત્ર 3 રન બનાવી આઉટ થયો હતો, એવામાં તેના ફોર્મ અને ફિટનેસને લઈ સવાલો ઊભા થયા હતા જેનો આ અનુભવી બેટ્સમેને જોરદાર જવાબ આપ્યો હતો. લગભગ એક વર્ષ બાદ ODI ફોર્મેટમાં શ્રેયસ અય્યરે સદી ફટકારી હતી. આ તેની કારકિર્દીની ત્રીજી ODI સદી છે.
શુભમન ગિલની દમદાર સેન્ચુરી
મોહાલીમાં પોતાના હોમ ગ્રાઉન્ડ પર રમાયેલી છેલ્લી ODIમાં સદીની તક ગુમાવનાર ગિલે ઈન્દોરમાં વિસ્ફોટક સદી ફટકારી હતી. શુભમન ગિલની આ છઠ્ઠી ODI સદી છે અને ખાસ વાત એ છે કે આ 6 માંથી 5 સદી માત્ર 2023માં આવી છે. શુભમનનું ફોર્મ વર્લ્ડ કપ પહેલા ભારત માટે ખૂબ જ મોટો પ્લસ પોઈન્ટ છે. શુભમને ઈન્દોરમાં ઓસ્ટ્રેલિયા સામે 97 બોલમાં 104 રન ફટકાર્યા હતા. તે કેમરુન ગ્રીનની બોલિંગમાં કેચ આઉટ થયો હતો. શુભમન અને શ્રેયસ બંનેએ દમદાર સદી ફટકારી ટીમ ઈન્ડિયાને મજબૂત સ્થિતિમાં લાવી દીધું છે અને ટીમ મોટા સ્કોર તરફ આગળ વધી રહી છે.
Published On - 4:45 pm, Sun, 24 September 23
